ليه بنفضل طهارة الأطفال فى أول 3 شهور؟

أمهات كتير أول ما تعرف إن ربنا هيرزقها بيبى ولد ، اول حاجه بتكون شايله همها هي ، هطاهره امتى و فين، و ليه فى ناس بتقول ان طهارته فى اول 3 شهور احسن ،وياترى هتكون قادره تاخد بالها منه بعد الولاده ولا لا ؟تعالوا نعرف اجابات كل الاسئلة دى مع بعض فى المقال دهبس قبل ما نجاوب على كل الاسئله دى ، تعالوا فى الأول نفتكر الطهارة دى كانت عباره عن ايه ؟

و قولنا إن الطهارة دى عباره عن عمليه بسيطه بنعملها للأطفال الذكور بعد ما يتولدوا علشان نشيل الجلد الزياده اللى بيكون موجود حوالين رأس العضو الذكرى للطفل ، و الجلدة الزياده دى بنسميها القلفة

و فى الحقيقه فى كتير من الأهالى دايما بيسألوا إحنا ليه بنشيل حاجة الطفل مولود بيها ، يعنى اكيد ربنا ليه حكمه فى انه يخلقها ؟

و فعلا فى الحقيقه كلام أهالى أطفالنا صح، لأن ربنا سبحانه و تعالى خلق القلفة دى حوالين رأس العضو الذكرى للطفل علشان تحميه من حركة السوائل اللى بتكون موجوده فى بطن الأم ، لأن رأس العضو الذكرى دى بيكون فيها أعصاب حسية ، و القلفة دى وظيفتها انها تحمى رأس العضو الذكرى

طيب بعد ما عرفنا ليه الجلده أو القلفه دى مهمه ،

ليه بنشيلها بعد ما الطفل يتولد

لأن دورها بيخلص بمجرد مالطفل يتولد ، و بعد كده لازم نشيلها ، لأنها لو فضلت موجوده ممكن تعمل للطفل مشاكل كتيره زى:

• إلتهابات و بكتيريا متراكمه تحت الجلد
• و ممكن لاقدر الله تسببله فى المستقبل سرطان القضيب
• و كمان ممكن ينقل لزوجته فى المستقبل بكتيريا و فطريات من المتراكمه تحت الجلد و ده يسببلها سرطان عنق الرحم

علشان كده بنقول طول مالطفل معندوش اى حاجه تخلينا نمنع أو نأجل الطهاره ، يبقى يفضل إننا نطاهر الطفل على طول
طيب بعد ما اطمنا إن الطفل معندوش أى حاجه ممكن تأجل طهارته ، ياترى ايه أنسب وقت نقدر نطاهر فيه الطفل  ؟ 
فى الحقيقه إحنا بنفضل نطاهر الطفل فى أول 3 شهور من عمره بعد ما يتولد
و ده لأسباب كتير جدا منها : 

• إن الطفل لو كان عمره أقل من 3 شهور نقدر نطاهره فى العياده ، على عكس لو كان أكبر من 3 شهور لازم نطاهره فى المستشفى
• كمان لو الطفل كان عمره أقل من 3 شهور ساعتها بياخد بنج موضعى بس ، سواء كان رش او حقن او دهان
• و علشان نكون متأكدين إن الطفل مش هيحس بأى ألم ، ممكن نديله بنج رش أو دهان بالإضافة للحقن
• كمان سبب من الأسباب اللى بتخلينا نفضل طهارة الطفل فى أول 3 شهور ، هو إن إحساس الطفل بالألم فى السن ده مبيكونش كبير ، لأن مراكز الإحساس عنده بيكون نموها لسه مكملش
• و كمان الأطفال فى أول 3 شهور حركتهم مش بتكون كتيره فبالتالى ده بيسهل علينا عمليه الطهاره بصوره كبيره
• و أخر حاجه ، إن الأنسجه اللى بتغذى العضو الذكرى للطفل بتكون لسه مكبرتش أوى و ده بيخلى نسبه حدوث نزيف للطفل أثناء الطهاره قليله جدا

و علشان نعرف اكتر عن انسب ميعاد نقدر نطاهر فيه الطفل تعالوا نسمع الفيديو ده مع بعض : 

و بعد ما عرفنا ليه بنفضل نطاهر الطفل فى أول 3 شهور ، تعالوا نعرف ايه أحسن الأدوات اللى نقدر نطاهر بيها الطفل و متسببلوش أى ألم :  
1-  اول جهاز و ده يعتبر إختيار الجراحين الأول ، اسمه جهاز الجومكو ، و الجهاز ده بيكون مكون من قطعتين :
- اول قطعه بتكون شبه القمع كده ، و دى بتكون موجوده بمقاسات كتير مختلفه علشان تناسب حجم العضو الذكرى لكل طفل، و دى وظيفتها انها تحمى العضو الذكرى من أى ضرر

تانى قطعه بنستخدمها علشان نثبت بيها العضو الذكر للطفل علشان يسهل علينا قص الجلد

2- تانى جهاز نقدر نستخدمه فى طهاره الأطفال ، اسمه الحلقه البلاستيكيه
و ده برضوا بيكون عباره عن حلقه بلاستيك بنلفها حوالين الجلده الزياده اللى بتكون موجوده حوالين رأس العضو الذكرى للطفل و بتاخد حوالى 10 ايام علشان الجلده الزياده تقع
و علشان نعرف الفرق بين الطهاره بيالحلقه البلاستيكيه و بين الطهاره بجهاز الجومكو ، تعالوا نسمع الفيديو ده مع دكتور محمد علام :

و فى النهايه خلينا نقول ان أطفالنا أغلى هديه ربنا أنعم بيها علينا
فياريت نحافظ عليها و دايما نختار الإختيار الافضل لصحتهم
و ربنا يحمى و يحفظ كل أطفالكوا