الشفه الأرنبيه وسقف الحلق المشقوق عند الأطفال وحديثى الولاده

الشفه الأرنبية وسقف الحلق المشقوق (أو اللي بنسميه "شق الشفه وسقف الحلق") هما إختلافات خلقيه بتحصل للطفل وهو لسه بيتكون في بطن الأم و بالتحديد من الأسبوع السادس للأسبوع العاشر
. ببساطه، الشفه الأرنبية دى عباره فتحة أو شق بيكون في الشفه العليا، أما سقف الحلق المشقوق فهو شق في سقف بق الطفل (اللي هو الجزء اللي فوق اللسان).
الإختلافين دول ممكن ييجوا لوحدهم أو ييجوا مع بعض، وبيأثروا على شكل الوش وكمان على الأكل والكلام والنفس. 

الطفل اللي بيتولد بالشفه الأرنبيه ممكن تلاحظي عليه:

1. شق واضح في الشفه العليا

الشفه بيكون فيها فتحه و الفتحه دى ممكن تكون في جنب واحد أو الجنبين.
أوقات الفتحة دي بتوصل لحد المناخير، وده بيأثر على شكل المناخير كمان. 

2. صعوبة في الرضاعة 

• الطفل بيلاقي صعوبه في الإمساك بالصدر أو الببرونة.
• اللبن ممكن يخرج من مناخيره لأنه مش قادر يشفط كويس.

3. تأثير على الصوت أو النطق (لو فيه سقف حلق مشقوق كمان)

• لما الطفل يكبر ويبدأ يتكلم، ممكن يبان إن صوته مخنف ( كأن الطفل بيتكلم من مناخيره)
• ممكن يبقى عنده تأخر في الكلام أو صعوبة في نطق بعض الحروف.

4. مشاكل في التنفس من الأنف (في بعض الحالات) 

• لو الشفه الأرنبية أثرت على شكل المناخير، ممكن الطفل يبقى بيتنفس بصعوبة أو بيتنفس من بقه أغلب الوقت. 
  

5. شكل غير طبيعي للأنف أو الشفه

• المناخير ممكن تبقى مايله شويه او نلاقيها نازله لتحت
• الشفه ممكن تبان مش متساوية أو فيها فراغ واضح.

دى كانت أعراض الشفه الأرنبيه لو جت للطفل

1. صعوبة في الرضاعة أو الأكل

• الطفل مش بيعرف يرضع كويس، سواء من صدر الأم أو الببرونة.
• اللبن ممكن يخرج من مناخيره و هو بيرضع
• بياخد وقت طويل في الأكل، و ممكن يزهق بسرعة.

2. اختناق أو شرقة أثناء الأكل

• ممكن يحصل له كحة أو "شرقة" كتير وهو بيرضع.
• أوقات الأكل يدخل مجرى التنفس بدل ما ينزل للمعدة.

3. صوت أنفي أو غير واضح لما يبدأ يتكلم

• لو الطفل كبر شوية، ممكن صوته يبقى فيه مخنف كأن صوته طالع من مناخيره.
• كلامه ممكن يبقى مش مفهوم، خصوصًا الحروف اللي محتاجه ضغط من الفم.

4. التهابات متكررة في الأذن

• سقف الحلق ليه علاقه بقناة الأذن، فلو فيه شق، السائل بيتجمع في الأذن.
• ده ممكن يعمل التهابات مستمره، أو حتى ضعف في السمع.

5. نقص في الوزن أو ضعف في النمو

• لأن الطفل مش بيقدر ياكل كويس، وزنه ممكن ما يزيدش بالطريقة الطبيعية. 
  

6. شق ظاهر في سقف البق (في بعض الحالات)

• لو الشق كبير أو في الجزء الأمامي من سقف الحلق، ممكن تشوفيه وانتِ بتبصي جوه بقّه.
  

تعالوا بقى نعرف

مفيش سبب واحد واضح نقدر نقول انه لو كان موجود الطفل هيتولد ، بس في شوية حاجات ممكن تزود فرصه إن الطفل يتولد كده، زي:

• عوامل وراثيه (لو في حد في العيله كان عنده شفه ارنبيه او سقف حلق مشقوق قبل كده )
• نقص فيتامينات معينه عند الأم أثناء الحمل (زي حمض الفوليك و بالذات فى الشهور الأولى من الحمل)
• تدخين أو شرب كحول أثناء فتره الحمل.
• أدوية معينه الأم خدتهم وهي حامل زى ادويه الصرع
• أمراض مزمنه عند الأم (زي السكر).

الموضوع ممكن يكون خطير لو متعالجش، وتعالوا نعرف ايه المشاكل اللى ممكن تحصل لو متعالجوش :

• صعوبه في الأكل والرضاعه.
• مشاكل في الكلام والتخاطب.
• تأخر في النمو الطبيعي للطفل.
• مشاكل في السمع.
• تأثير نفسي بسبب شكل الوش.

العلاج بيكون بالجراحه، وبيتعمل على مراحل حسب الحاله ،

• جراحة الشفه الأرنبية غالبًا بتتعمل من سن 3 لـ 6 شهور.
• جراحة سقف الحلق بتتعمل من سن 9 لـ 18 شهر او وزن الطفل يكون وصل 10 كيلو
• ممكن الطفل يحتاج جلسات تخاطب بعدين.
• أوقات بيحتاج دكتور انف و اذن أو دكتور أسنان لو في مشاكل تانيه.

كل ما بدأنا العلاج بدري، كل ما كانت النتائج أحسن، وكمان بيساعد الطفل يتكلم ويأكل بشكل طبيعي لما يكبر.

الشفه الأرنبية مش نوع واحد، ليها كذا شكل حسب مكان وحجم الشق، ودي أشهر الأنواع:

1. الشفه الأرنبية من ناحيه واحده (Unilateral cleft lip)

يعني الشق موجود في جنب واحد بس من الشفه العليا، غالباً ناحية الشمال أو اليمين. وده أكتر نوع شائع

2. الشفه الأرنبية من الناحيتين (Bilateral cleft lip)

يعني الطفل عنده شق في الجنبين من الشفه العليا، وده بيكون أوضح شوية في الشكل، وغالباً بيأثر على الجزء اللي في النص (زي عضمه اللثه الأمامية).

3. الشفه الأرنبية الكامله (Complete cleft lip)

ده نوع الشق اللي واصل من الشفه لحد المناخير، وبيأثر على شكل المناخير كمان.

4. الشفه الأرنبية الغير كامله (Incomplete cleft lip)

يعني الشق في الشفه بس، ومش واصل لحد المناخير و ده بيكون بسيط

أيوه، لو متعالجوش ممكن الطفل يعاني طول حياته من:

• صعوبات في النطق.
• مشاكل في الأكل والبلع.
• إحراج اجتماعي وتأثير على ثقته في نفسه.
• التهابات متكرره في الأذن وضعف في السمع.

و فى النهايه خلينا نقول ان اللى يقدر يحدد انسب قرار و وقت للعمليه هو جراح الأطفال المتخصص
علشان نوصل لأفضل نتيجه ترضى الأهل و الطفل
و ربنا يحمى و يحفظ كل أطفالكوا