ايه هو اللسان المربوط عند الرضع ؟

ربنا لسه رازقك بيببى جديد ، بس و انتى بترضعيه لاحظتى انه مش قادر يرضع او دايما بيشرق كل ما يرضع و انتى مش عارفه ايه سبب ده
و خلينا نقول ان سبب ده هو اختلاف خلقى الطفل بيتولد بيه اسمه اللسان المربوط

عباره عن ايه اللسان المربوط ده ؟
ده بيكون عباره عن نسيج بيربط اللسان بقاع الفم عند الطفل ، بس فى حاله اللسان المربوط هنلاقى النسيج ده أقصر من الطبيعى
فبالتالى ده بيخلى الطفل مش قادر يرضع بصوره طبيعيه 

طيب ايه اللى بيخلى الأطفال تتولد عندها لسان مربوط؟

فى الحقيقه مفيش سبب واضح و صريح نقدر نقول ان هو السبب فى ان الطفل يتولد عنده لسان مربوط
لكن لقوا ان اللسان المربوط ممكن يجى فى الأطفال نتيجه عوامل وراثيه ،
يعنى لو حد من أهل الطفل باباه او مامته مثلا كانوا مولودين عندهم لسان مربوط ، ساعتها ممكن الطفل يتولد عنده لسان مربوط

طيب إزاى نقدر نعرف إذا كان طفلنا عنده لسان مربوط ولا لا؟

• اول حاجه و غالبا دى اللى الأم بتلاحظها ، بتلاقى الطفل مش عارف يرضع بصوره طبيعيه
• و حتى لو كان قادر يرضع بنسبه بسيطه ، هنلاقيه بيشرق بصوره مستمره
• و نتيجه ان الطفل مش قادر يرضع بصوره هنلاقيه بيعيط بصوره مستمره بسبب الجوع
• تانى حاجه ممكن الأم تلاحظها انها تلاقى لسان الطفل واخد شكل قلب من كتر ما هو مشدود
• و اخر حاجه ممكن نلاحظها لو الطفل كان سنه كبير شويه ، هنلاقى عنده صعوبه فى الكلام و مش قادر يحرك لسانه بشكل طبيع

طيب اللسان المربوط ده إحنا بنعالجه عند الأطفال إزاى ؟

فى الحقيقه إحنا بنفضل إننا نعالج اللسان المربوط عند الأطفال بمجرد ما نكتشفه ، حتى لو كان ساعه الولاد
لأن طول ما الطفل عمره صغير نقدر نعمل الإجراء الجراحى البسيط ده من غير مخدر او بمخدر موضعى بسيط
لأن النسيج ده بيكون فيه نهايات عصبيه و أوعيه دمويه قليله ، و ده بيقلل إحساس الطفل بالوجع

طيب لو الطفل كان عمره كبير شويه؟

ساعتها هنحتاج إننا نخدر الطفل تخدير كلى علشان نعمله العمليه
و برضوا وقت العمليه بيكون قليل جدا 

طيب لو الطفل كان عمره كبير شويه؟

ان مش كل الأطفال اللى عندها لسان مربوط محتاج نعمله عمليه
لو الطفل كان عنده لسان مربوط لكن مش مأثر على النطق او الرضاعه ، ساعتها مش لازم نعمله عمليه

علشان كده دايما بنقول ان اول ما نلاحظ غريبه فى أطفالنا نفحصه فورا عند جراح أطفال متخصص علشان نطمن
و ناخد الإجراء المناسب علشان نحافظ على صحه أطفالنا

ربنا يحمى و يحفظ كل أطفالكوا