اختفاء الخصية عند الأطفال

طبعًا أول حاجة بتيجي في بال كتير من الأهالي أول ما بنقول "اختفاء الخصية"، إنهم يفتكروا إنها "خصية معلقة".
بس الحقيقة مش كل خصية مختفية بتكون خصية معلقة.
في المقال ده هنعرف يعني إيه اختفاء الخصية، وإيه الفرق بينه وبين الخصية المعلقة، وإزاي نطمن على طفلنا لو حصل معاه كده.
و تعالوا دلوقتى نعرف 

يعني إيه خصية معلقة؟

الخصية المعلقة معناها إن خصية واحدة أو الخصيتين مش موجودين في مكانهم الطبيعي في كيس الصفن.

وظيفة الخصية وكيس الصفن

وظيفة الخصية

• إنتاج وتخزين الحيوانات المنوية اللي دورها تخصيب البويضة لما الطفل يكبر.
• إنتاج 90–95% من هرمون التستوستيرون، المسؤول عن ظهور صفات البلوغ عند الذكور.

وظيفة كيس الصفن

• بيحافظ على الخصية في درجة حرارة أقل من حرارة الجسم بدرجتين، وده الشرط الأساسي عشان الخصية تشتغل بكفاءة.

طيب الخصية اللي بتختفي أحيانًا بتروح فين؟

الاحتمال الأول ان الخصية دي تكون خصية نطاطة

• خصية طبيعية جدًا.
• بتتحرك من كيس الصفن للقناة الأربية وقت خوف الطفل، أو البرد، أو البكاء.
• بترجع مكانها الطبيعي لما الطفل يهدأ أو يدفى.
• بتحصل أكتر عند الأطفال اللي عضلة الفخذ عندهم قوية.
• مش بتحتاج عملية، مجرد متابعة كل 6 شهور.
• غالبًا بتثبت طبيعي مع تقدم العمر.

الاحتمال التاني: خصية ذات حبل منوي قصير

• الدكتور يقدر يحس بيها في المنطقة الأربية أثناء الفحص.
• لما يحاول يسحبها لكيس الصفن، بترجع تطلع تاني.
• العلاج الوحيد: العملية.

و الخصيه ذات الحبل المنوى القصير دى , علاجها لازم يكون عمليه, و علشان نطمنكوا هنقول العمليه دى بيحصل فيها ايه بالظبط:

خطوات العملية

1. فتح جرح صغير (حوالي 1 سم) في المنطقة الأربية.
2. استخدام نظارة مكبرة عشان حماية الأوعية الدموية المغذية للخصية.
3. تسليك الخصية من الأنسجة المحيطة.
4. إطالة الحبل المنوي (عن طريق شد الخصية عكس الاتجاه).
5. إصلاح أي فتق أربي لو موجود.
6. عمل جيب صغير في كيس الصفن وتثبيت الخصية فيه.

ليه لازم نعالج الخصية المعلقة أو ذات الحبل القصير؟

• عشان الخصية تقدر تقوم بوظائفها.
• لتجنب العقم وتأخر الإنجاب مستقبلاً.
• لحماية الطفل من المضاعفات زي ضمور الخصية أو الأورام.

الخلاصة

مش كل خصية مختفية عند الأطفال معناها خصية معلقة.
في حالات بتكون طبيعية زي الخصية النطاطة ومش بتحتاج تدخل.
لكن لو السبب فى اختفاء الخصية ان الحبل المنوي قصير، لازم التدخل الجراحي.
الخوف من عملية نص ساعة مينفعش يأثر على حياة الطفل كلها.
ودلوقتى تعالوا نسمع الفيديو دا عشان نعرف معلومات اكتر عن الخصية النطاطة و الخصية المعلقة و اي الفرق بينهم مع
مع دكتور محمد علام - إستشاري جراحات الأطفال والمناظير والاختلافات الخلقية