الفتق السري عن الاطفال وحديثي الولادة

الفتق السري ده واحد من الاختلافات الخلقية اللى بتحصل للاطفال و حديثى الولاده سواء بنات او ذكور ، و هو عبارة عن انتفاخ بيحصل فى منطقة السرة بسبب ان فى جزء من الأمعاء خرج من مكانه  

طيب اى السبب فى ان الطفل يحصله فتق سرى و ان الامعاء تخرج من مكانها ؟

السبب في أن الطفل يحصله فتق سرى هي السره نفسها ، و تعالوا اوضحلكم ازاى

السره دى هى المكان بيعدى منه الحبل السرى ، و الحبل السرى ده هو اللى بيوصل للجنين و هو فى رحم الام الاكسجين و المواد الغذائيه و كمان هو اللى بيكون مسؤول عن أنه يخرج فضلات الجنين للدورة الدموية بتاعت الام ،

ووقت الولادة بنقص الحبل السرى ده و بيفضل فى جزء صغير جدا منه فى سره البيبي ، و ده بيقع لوحده بعد الولاده بأسبوعين و بتبدأ الفتحة الصغيرة اللى كان بيعدى منها الحبل السرى تتقفل ،

و اللى بيحصل للاطفال اللى بيكون عندهم فتق سرى ان الفتحة دى مبتتقفلش ، و بتفضل مفتوحة و ده بيكون السبب في أن جدار البطن يكون ضعيف ،

فلما الطفل يعيط او يحزق او يكح جامد ، يبيدأ جزء من الأمعاء يخرج ناحية الجزء الضعيف ده من جدار البطن ويعمل انتفاخ في السرة أو فتق سرى   

طيب هو الفتق السري ده ممكن يضر الطفل او يسببله اى مشاكل ؟

هنا عاوز كل ام تتطمن الفتق السرى ملوش اضرار ، الجزء اللى بيخرج من الأمعاء ده مش هيحصله اختناق ، و مش دايما بنحتاج اصلا اننا نعالجه ، فى حالات بنصبر فيها على الطفل لحد ما يوصل لسن 3 او 4 سنين حتى لو الفتق كان كبير شويه ، وده لأن كل ما الطفل بيكبر كل ما عضلات البطن بتبدأ انها تلم و بكدا الفتحة اللى الأمعاء بتخرج منها هى كمان هتلم و الفتق ممكن يروح لوحده . 

 طيب معنى الكلام ده ان فى حالات ممكن نستنى عليها لحد ما توصل لسن 3 او 4 سنين و حالات لأ ؟ 

الاجابه هتكون اه ، لكن فى شويه اعراض لو بدأت الام تلاحظها على طفلها لازم يتعمل للطفل تداخل جراحى و بسرعه لان الفتق السري البسيط ده ممكن يسببله مشاكل كتير جدا
و الاعراض دى هى :  

1- لو الطفل كان عنده ترجيع بشكل مستمر و لفتره طويله
2- لو ضغطنا على سرة الطفل ولقيناه حس بوجع ، لان الطبيعى ان الفتق السرى مش بيسبب اى الم للطفل
3- لو بدأنا نلاحظ ان لون السره بدأ يتغير و بقى ازرق او احمر
4- لو بدأنا نلاقى ان فى افرازات بتخرج من السره و ليها ريحة وحشة
5- لو ضغطنا على الجزء اللى خرج من الامعاء و لقيناه مش بيرجع مكانه ، ده معناه ان الفتق بدأ يحصله اختناق

كل الاعراض دى بتقول ان الفتق السري بقى خطر على الطفل ولازم نلحقة فى اسرع وقت ، لانه ممكن يسبب للطفل غرغرينه فى الامعاء و تسمم دموى لاقدر الله 

و تعالوا دلوقتى نعرف اى اللى هيحصل لو الطفل وصل لسن 4 سنين و الفتق السري لسه موجود ؟

و قتها هنحتاج اننا نعمل للطفل عمليه بسيطة جدا عشان نشيل كيس الفتق ، بس لما هنيجى نعمل العمليه

و تعالوا نعرف شويه تفاصيل عن العمليه عشان تطمنوا اكتر

عملية الفتق السرى بتتعمل بجرح صغير جدا فوق السره على طول ، و بنبدأ اننا نطلع كيس الفتق و نشيله و بعدين بنخيط الجرح بخيط تجميلى ، و هنا فى حاجتين لازم نأكد عليهم  

1. الجرح مش بيسب اى اثر لان الجرح نفسة احنا بنعمله على شكل الدايره بتاعت السره نفسها و بنخيطة بخيط تجميلى رفيع جدا ، و بعد فتره بسيطة من العمليه مش بيكون ليه اى اثر
2. تانى حاجة الفتق السرى عند الاطفال مش بنحتاج ابدا اننا نركبله شبكة

و دلوقتى بعد ما عرفنا كل حاجة عن الفتق السرى تعالوا ناخد بالنا من شويه حاجات مهمه عشان مانكونش بنضر اطفالنا من غير ما نعرف 

لو قريتى على الانترنت ان ممكن نلبس الطفل حزام على السره ، او نحط حاجة معدن على السره و نضغط عليها برباط عشان الفتق يروح ، اوعى تعملى كده لان انتى كده بتضرى طفلك و تعالى اقولك ليه ,  جلد الطفل بيكون حساس جدا فلما نحط عليه حاجة معدن ده ممكن يعمل للطفل حساسيه و التهابات فى الجلد ، ده غير ان بسبب البكتريا اللى هتتكون على جلد الطفل ممكن يحصله قرح فى الجلد و ده ممكن يسبب تأكل فى الجلد ، اما بالنسبة للحزام فهو ممكن يعمل للطفل انتفاخ فى المعدة و مغص ، فأنتى كده بتتعبى طفلك زياده  لازم نعرف كمان ان فى العادى الفتق السري مش بيسبب اى وجع للطفل ، بس لو ده حصل لازم اننا نكشف فورا زى ما قولنا من شويه لان الفتق السري كده بقى خطر على الطفل  الفتق السري كمان مش بيعمل مغص للطفل ، و لو ده حصل للطفل فخليكى عارفة ان المغص او الانتفاج اللى عند الطفل مش بسبب الفتق السرى ،فلازم هنا نكشف و نعرف اى سبب المغص ده. تانى حاجة لازم ناخد بالنا منها ان فى نوعين من الاختلافات الخلقية ناس كتير بتتلغبط بنهم ، و هما الفتق الاربى و الفتق السرى ، الفتق السري احنا لسه متكلمين عنه بالتفصيل و فهمنا اننا ممكن نستنى عليه ، اما بقى الفتق الاربى ده مينفعش نستنى ابدا عليه و الطفل اللى عنده فتق اربي لازم يدخل فورا عمليات حتى لو كان لسه مولود

واكيد التشخيص السليم لحاله الفتق السري عند طفلك لازم يكون مع دكتور متخصص في جراحة الاطفال عشان تعالجي طفلك بالعلاج الصح وفي الوقت المناسب