أي أنواع الخصيه المعلقة عند الأطفال وأي طرق علاجها ؟ 

الخصية المعلقة من أشهر الإختلافات الخلقية اللي بتحصل للأطفال حديثي الولادة وأول ما الأهل بيكتشفوا أن الطفل مولود بخصية واحدة بيدوروا علي طرق العلاج بس الأهم من طرق العلاج هو التشخيص.

لأن أول خطوه فى نجاح عملية الخصية المعلقة هو التشخيص الصحيح ليها , لأن الخصية المعلقة عند الأطفال ليها أنواع وعلي حسب كل نوع بيتحدد العلاج المناسب

فتعالوا نعرف سوا اي أنواع الخصية المعلقة عند الأطفال , و هنبدأ بالنوع الأشهر والأسهل في التشخيص و هو الخصية المعلقة المحسوسة

ودا لأننا بنقدر نشخصها بالفحص الإكلينيكى , و بنقدر نحس وجودها فى المنطقه الإربية لما الدكتور بيفحص الطفل بيقدر يحط ايده علي الخصية ويحركها من مكانها لحد كيس الصفن , سواء كانت فى أول القناة الإربية او في منتصفها او في أخرها عند أول كيس الصفن

و هنا خلينا نقول ملاحظه مهمه قبل ما نتكلم عن العملية

( و هى إننا مش بنعمل عمليه الخصيه المعلقه لأى طفل قبل ما عمره يكمل 6 شهور , لأننا بنحط إحتمال ان خصيه الطفل ممكن تنزل بشكل طبيعى خلال اول 6 شهور من عمره  

طيب ازاي بنعالج الخصية المحسوسة ؟  

عملية الخصية المحسوسة سهله وبسيطة , و كل اللى بنحتاج نعمله هو إطاله للحبل المنوى للخصيه دي , و بعد كده بيعمل تثبيت للخصية عن طريق عمل جيب في كيس الصفن.

أما تاني نوع من الخصية المعلقة هي الخصية المعلقة الغير محسوسة
وهي نوعها باين من أسمها هي خصية غير محسوسة يعني مش عارفين نحسها وقت الفحص و مش عارفين نحدد مكانها فين , وهل هي اتخلقت أصلا ولا الطفل دا مولود بخصية واحده بس , ودا هنعرفه عن طريق حاجه اسمها المنظار الأستكشافي و ده اللي هيحددلنا مكان الخصية فين بالظبط و هل هى فعلا فى تجويف البطن ولا لأ ؟ 

طيب عملية الخصية المعلقة الغير محسوسة هتكون زي عملية الخصية المعلقة المحسوسة ؟ 

لا العمليتين مختلفين شوية عن بعض لأننا في عملية الخصية المعلقة الغير محسوسة لازم نعملها علي مرحلتين ,
اول مرحله بنعمل فيها منظار استكشافى عشان نحدد مكان الخصيه و نشوف هل الخصية جوه تجويف البطن ولا متخلقتش , و هنا لو لقينا الخصية موجودة فى تجويف البطن , وقتها هنعمل إطاله للحبل المنوى و نستنى 6 شهور , و بعد كده هنعمل تانى مرحله فى العمليه ودي  , بتكون عباره عن تسليك الخصيه و تثبيتها فى جيب في كيس الصفن . 

طب كدا عرفنا اي انواع الخصيه المعلقه عند الأطفال و علاجها بيكون اي .
بس فى الحقيقه فى نوعين كمان من الخصية الأهل بيحتاروا في نوعهم وعلاجهم
و اول نوع منهم اسمه الخصيه النطاطه :
و دى بتكون خصيه طبيعيه جدا , كل اللى بيحصل إن لما الطفل يخاف او يسقع الخصية بتنط لفوق في تجويف البطن ولما يتدفي ويهدي الخصية ترجع مكانها تاني في كيس الصفن
و علاج الخصيه النطاطه هو اننا نسيبها في حالها وهي بتبدأ تثبت كل ما الطفل يكبر فى السن
, بس المهم نتابع مع دكتور جراحه اطفال كل 6 شهور علشان نتأكد انها متحولتش لخصية معلقة

وفي نوع أخير اسمه الخصية ذات الحبل المنوى القصير( و دى بنعتبرها من انواع الخصيه المعلقه المحسوسه):
واسمها خصية ذات حبل منوي قصير لأن دي خصية حبلها المنوي قصير عن الطبيعي فبتكون متعلقة مش نازله لكيس الصفن وعشان نعالجها بنحتاج نعملها عملية على مرحلة واحده نطول فيها الحبل المنوى ونثبتها في جيب فى كيس الصفن .
واللي بيفرق بينها وبين الخصية المحسوسة هو التشخيص السليم والتشخيص عن طريق السونار

و علشان نفهم أكتر عن أنواع الخصيه المعلقه عند الأطفال ، تعالوا نسمع الفيديو ده مع بعض :  

علاج الخصية المعلقة عند طفلك مهم جدا لأنه بيحافظ علي صحة طفلك وعلي مستقبله وبيحميه من مشاكل كبيرة زي العقم او الإصابه بالاورام لاقدر الله , فلازم تتابعي مع دكتور متخصص في جراحة الأطفال وتاخدي قرار العملية في أنسب وقت يحدده الدكتور

و علشان تعرفوا ايه أنسب ميعاد نعمل فيه عمليه الخصيه المعلقه ، تعالوا نسمع الفيديو ده مع بعض :