علاج الفتق السرى عند الأطفال

الفتق السري  من الاختلافات الخلقية اللى بتيجى لكتير من الأطفال الولاد والبنات اول ما يتولدوا , بس كتير من الأهالى بيكونوا مش عارفين يتعاملوا مع الفتق السرى ده إزاى , فتعالوا نعرف مع بعض ازاى بنتعامل مع الفتق السرى ، و ايه هو علاجه
بس فى الأول تعالوا نفتكر مع بعض الفتق السرى ده بيكون عباره عن ايه:
الفتق السرى ده بيكون عباره عن ورم شبه البالونه كده و بيكون موجود فوق السره 

طيب ليه الفتق السرى ده بيحصل للأطفال ؟

بيحصل بسبب ضعف عضلات البطن , و الضعف ده بيظهر على شكل انتفاخ و تورم في منطقه السرة
و علشان كده بنقول ان الأطفال المولودين قبل ميعادهم ، و الأطفال المولودين وزنهم كيلو او كيلو و نص
هما اكتر اطفال معرضه ان يجيلها فتق سرى:

و دلوقتى خلونا نقول إزاى نتعامل مع أطفالنا لو عندهم فتق سرى:

1. اول حاجه لازم نبقى عارفين ان الكحه و الحذق و الإمساك و العياط مش هما السبب فى الفتق السرى, هما بيظهروا الفتق بس مش اكتر
2. تانى حاجه مينفعش الطفل اللى عنده فتق سرى نربطله حزام سره, او نحط عمله معدنيه على بطنه و نربطها , لأن ده بيكون مؤلم للطفل, و ممكن يسببله التهابات جلديه مكانتش موجوده عنده اصلا , و الحاله الوحيده اللى ممكن نستخدم فيها حزام السره ، هو علشان ندارى منظر السره ، بس ميكونش مشدود جامد علشان ميسببش إلتهابات للطفل
3. الفتق السرى مش بنعمله اى عمليه جراحيه قبل م الطفل عمره يكون من 3 الى 4 سنين لأنه فى الغالب بيروح لوحده بعد سنه او اتنين كم عمر الطفل , غير فى حالات معينه زى:

• ان الفتق السرى يكون حصله إختناق ، و دى حاله نادر جدا إنها تحصل
• و إختناق الفتق السرى ده معناه ان الأمعاء اتحشرت و مش قادره ترجع مكانها، و علشان نعرف الفتق حصله إختناق ولا لا , بنضغط على السره , بنلاقى الفتق بقى ناشف او محجر ، و لما بنضغط عليه بنلاقيه مش بيرجع ولا بيدخل لجوه ، و فى الحاله دى ممكن نلاقى الطفل بدأ يرجع او حصله إنتفاخات فى بطنه فى الحاله دى بنحتاج نتدخل جراحيا فورا علشان نعالج الفتق السرى
• تانى حاله ممكن نعمل فيها جراحه للفتق السرى , ان لو بعد سنتين من عمر الطفل لقينا الفتحه كبيره جدا و مش بتقل, ساعتها بيكون صعب انها تقفل بعد كده فلازم نعالجها جراحيا

و بعد م عرفنا ايه الحالات اللى بنستخدم فيها الجراحه فى الفتق السرى,

تعالوا نعرف مع بعض ايه اللى بيحصل بالظبط فى العمليه:

• بنخدر الطفل تخدير كلى من خلال دكتور متخصص فى تخدير الأطفال
• و بعد كده الدكتور شق صغير تحت البطن
• و يرجع الجزء اللى كان خارج من الأمعاء مكانها تانى
• و بعد كده بنقفل العضلات ، و بنقفل الطبقات اللى كانت مفتوحه طبقه طبقه ، و بعد كده بنقفل الجلد بغرز تجميليه علشان متبانش

و لو طفلك هيعمل عمليه الفتق السرى , يبقى فى كذا حاجه لازم نخلى بالنا منها :

1. لازم ميجيش مياه على الجرح اول 5 ايام , و نحافظ اننا نغير على الجرح باستمرار
2. مينفعش الطفل يقوم بأى مجهود جسدى كبير بعد العمليه ( سواء لعب او جرى ) لمده شهر او 6 اسابيع

ربنا يحمى و يحفظ كل أطفالنا يارب