علاج الفتق الإربي عند الأطفال بدون عملية

كتير من الأمهات والآباء أول ما يعرفوا إن طفلهم عنده فتق إربي، بيبقوا قلقانين من فكرة العملية ويسألوا: "هو مفيش علاج للفتق الإربي غير الجراحة؟ هل في أدوية أو أعشاب تعالج الموضوع؟"
في المقال ده هنوضح بشكل علمي وبسيط إيه هو الفتق الإربي عند الأطفال، أسبابه، وليه العلاج الوحيد والنهائي ليه بيكون بالعملية الجراحية، وكمان هنشرح خطوة بخطوة إزاي بتتعمل العملية، ومخاطر تأجيلها. 

ما هو الفتق الإربي عند الأطفال؟

الفتق الإربي هو بروز جزء من الأمعاء من تجويف البطن للقناة الأربية (المنطقة بين البطن والفخذ)، وده بيظهر على شكل انتفاخ أو ورم صغير مكان الحفاض (البامبرز).

هل ممكن علاج الفتق الإربي عند الأطفال من غير عملية؟

الإجابة: لأ.

• الفتق الإربي مشكلة خلقية نتيجة إن القناة الأربية مفتوحة.
• مفيش علاج دوائي يقفل الفتحة دي.
• مفيش أي أعشاب أو وصفات منزلية تقدر تعالج الفتق.
• الحل الوحيد هو العملية الجراحية اللي بيتم فيها ربط كيس الفتق وإغلاق الفتحة بشكل نهائي.

• و علشان نعرف أكتر ليه مينفعش نعالج الفتق الإربى بالأعشاب ، تعالوا نسمع الفيديو ده مع بعض :

و عشان تكونى متطمنه على طفلك اكتر تعالي نعرف

عملية الفتق الإربي للأطفال بتتعمل إزاي؟

عملية الفتق الإربي عند الأطفال من العمليات البسيطة والآمنة جدًا، وخصوصًا لو اتعملت عند دكتور متخصص في جراحة الأطفال.
الأم ممكن تكون قلقانة من كلمة "عملية"، لكن الحقيقة إن خطواتها واضحة وسهلة، وطفلك غالبًا بيرجع لحياته الطبيعية بسرعة. 

• في البداية، الطفل بيتخدرتحت اشراف دكتور متخصص فى تخدير الاطفال عشان ينام وميحسش بأي ألم طول فترة العملية.
• بعدها الجراح بيعمل فتحة صغيرة جدًا في المنطقة الإربية، غالبًا لا تتجاوز 1 – 2 سم، ودي بتكون كافية إنه يوصل لكيس الفتق.
• بعد كده، بيتفصل كيس الفتق بدقة عن الأنسجة المحيطة باستخدام أدوات جراحية دقيقة جدًا، وبعدها بيتربط علشان يمنع نزول الأمعاء مرة تانية.
• الجرح بيتقفل بخيوط تجميلية رفيعة جدًا، ومع الوقت أثرها بيختفي تقريبًا ومبيبانش.

الجميل كمان إن الطفل غالبًا بيرجع البيت في نفس اليوم أو اليوم اللي بعده على طول، وبعد يومين أو 3 يقدر يتحرك ويلعب عادي. ومع نهاية الأسبوع الأول، بيرجع يمارس حياته بشكل طبيعي تمامًا وكأن العملية مكنتش موجودة.

مخاطر تأجيل عملية الفتق الإربي عند الأطفال

لو أجلنا العملية، ممكن يحصل اختناق الفتق، وده معناه:

• جزء من الأمعاء يدخل جوه القناة الأربية ويتحشر فيها.
• الدم ما يوصلش للأمعاء بشكل طبيعي.
• ده ممكن يسبب غرغرينا أو مضاعفات خطيرة جدًا تهدد حياة الطفل.

و لو عايزين تعرفوا اكتر عن الفتق الإربى المختنق تعالوا نسمع الفيديو ده مع بعض:

الخلاصة

الفتق الإربي عند الأطفال مش بيتعالج غير بالجراحة.
كل ما اتشخص بدري وتعملت العملية في وقتها، كل ما الطفل يتعافى أسرع وبأمان أكبر.
صحة أطفالنا أمانة، وقرار إجراء عملية الفتق الاربي خطوة ضرورية لحمايتهم من أي مخاطر.