علاج القيلة المائية بدون جراحة للاطفال

ممكن تكوني اكتشفتي ان طفلك عنده انتفاخ أو تورم في المنطقة اللي بين العضو الذكري والفخد , وبعد كدا عرفتي انها اختلاف خلقي اسمه قيلة مائية او مايه حوالين الخصية , أكيد ساعتها خوفتي تكون حاجه خطيرة تأثر علي صحة طفلك ,او تسببله اي مضاعفات خطيرة , واكيد خدتي رأي كذا حد من الأهل , ممكن حد منهم قالك انه سمع ان القيلة المائية ممكن تتشفط بالسرنجة عند اي دكتور وخلاص , فتعالي قبل ما تاخدي اي قرار غلط في علاج القيلة المائية عند طفلك 

نفهم سوا القيلة المائية اي هي بالظبط واي انسب علاج ليها ؟

القيلة المائية هي اختلاف خلقي بيحصل للطفل وهو لسه جنين , بسبب ان بعد ما الخصيتين نزلوا لكيس الصفن من خلال قناة اسمها القناة الإربية , وفتحة القناة الإربية اللي نزلوا منها دي متقفلتش بعد نزلوهم لكيس الصفن , فضلت مفتوحة وكانت الفتحة دي اقل من 4 ملي , ودا طبعا سمح ان ينزل مايه من تجويف البطن الي كيس الصفن وعمل للطفل القيلة المائية دي. 

طب هي اصلا القيلة المائية دي من الأختلافات الخلقية الخطيرة زي الفتق الإربي مثلا ؟

فالحقيقة لا القيلة المائية إختلاف خلقي مش خطير علي البيبي زي الفتق الإربي , لكن هي ليها كذا نوع وعلي حسب نوعها اكيد هيتحدد خطورتها وعلاجها
فاحنا عندنا نوع من القيلة المائية بيكون حوالين الخصية ونوع تاني بيكون حوالين الحبل المنوي والنوعين دول هما اكتر أنواع القيلة المائية انتشارا بين الاطفال وحديثي الولادة  

طيب اي علاج النوعين دول؟

في النوعين دول أحنا مش بنعمل اي تدخل جراحي ,لان الطبيعي ان في خلال سنه لسنه ونص من عمر الطفل القيلة دي هتختفي لوحدها , والجسم هيمتص المايه دي وخلاص علي كدا .
لكن لو عدي سنه ونص ولسه القيلة زي ماهي يبقي لازم تدخل جراحي عشان ممكن تسبب ضغط حتي لو بسيط علي الخصية فيأثر علي نموها ووظيفتها في المستقبل , وفي الحاله دي هنشيل المايه ونقفل كيس المياه عشان متتجمعش تاني
طيب اي بقي النوع اللي ممكن يكون خطير علي طفلك , هو اولا نوع نادر بيحصل بنسبه 5% للاطفال وحديثي الولادة , وفي النوع دا بتكون القيلة المائية موجوده من تجويف البطن وواصله لحد كيس الصفن , وحجمها بيزيد بشكل مستمر , فطبعا دي بتحتاج تدخل جراحي في خلال 6 شهور من عمر البيبي , عشان متسببش اي مضاعفات تضر الخصية او تسبب التهابات شديدة للطفل .

و علشان تعرفوا اكتر عن القيله المائيه، تعالوا نسمع الفيديو ده مع بعض: 

ونخلي بالنا كويس أن مفيش حاجه اسمها شفط القيلة المائية بالسرنجه لان دا حاجه غلط وخطيرة جداا ممكن تضر الخصية او تسبب عدوي خطيرة للطفل ,
وعشان تاخدي الإجراء المناسب لعلاج القيلة المائية عند طفلك لازم تروحي لدكتور جراحة أطفال يحددلك اي نوع القيلة المائية عند طفلك وهل محتاجه جراحة ولا هتختفي لوحدها , وطبعا لازم تخلي بالك ان مش كل تورم اوانتفاح في المنطقة الإربية هو قيلة مائية ممكن يكون فتق إربي وعشان تعرفي اي الفرق بين القيلة المائية والفتق الإربي اسمعى الفيديو ده :  

المهم انك لازم تعالج القيلة المائية عند طفلك في الوقت المناسب وبالعلاج المناسب مع دكتور متخصص في جراحة الاطفال مش اي تخصص تاني .