هو احنا ممكن نعالج القيله المائية بالسرنجه ؟

القيلة المائية من المشاكل اللي ممكن تشغل بال الأم لو كانت عند طفلها ، وبتبدأ تدور على طريقة تعالج بيها القيله المائيه ، وبتسمع عن طريقه اسمها علاج القيلة المائية عند الأطفال بالسرنجة ، و بتفكر ان ده علاج سهل وسريع ومن غير عملية أو الم ، بس تعالي اقولك علاج القيلة المائية بالسرنجة ممكن يعمل ايه لطفلك وهنتكلم بعدها عن علاج القيلة المائية الصح.  

بس خلينا الاول نفتكر بسرعة هي أي القيلة المائية وايه سببها ؟

القيلة المائية هو ورم بيحصل في الخصية ، بسبب ان فتحة القناه الاربيه اللى بينزل منها الخصيتين لكيس الصفن ، بتفضل مفتوحة ، وده بيخلي المية تنزل من البطن لكيس الصفن و بكده بتتكون المية على الخصية .

نفهم من كدا ان السبب الأساسي للقيله المائيه هو أن فتحة القناة الاربية مقفلتش ، وعشان نعالج القيلة المائية احنا لازم نعالج السبب نفسه مش نعالج العرض.

تعالوا بقى دلوقتى نعرف اى اللى بيحصل لما بنحاول اننا نسحب المايه دى بالسرنجة ؟

اللي بيحصل ان الدكتور بيدخل بأبره صغيره فى الناحيه اللى متجمع فيها المايه على الخصية ، و بيبدأ يسحب المايه دى بالسرنجه
اكيد دلوقتى بتفكروا ان دى كده حاجة كويسه احنا كده سحبنا المايه اللى على الخصية خلاص و من غير الطفل ما يحتاج لعمليه ،

بس خلينى اقولك ان ده مش صح و احنا كده بنضر الطفل جدا ، و كان الافضل اننا نسيب المايه اللى على الخصية ولا اننا نسحبها بالسرنجة و السبب فى كده :
1- ان جلد كيس الصفن من بره بيكون عليه بكتريا ، و اللى بتدخل معانا لجوه الخصية مع سن الابره ، و ده هيضر الخصي​ه و هيسببلها التهابات
وتليفات وممكن لاقدر الله تعمل ضمور في الخصية

2- ده غير ان الخصية مكان حساس جدا و مليان شراين ، و الشراين دى هى اللى بتغذى الخصية ، و لما بنيجى ندخل سن الابره
فى الخصية احنا مش بنكون شايفين الشراين دى ، و هنا ممكن بالغلط سن الابره يدخل فى شريان و يضره و ده هيسبب ضمور للخصية

3- و كمان قولنا ان القيله المائيه سببها ان فتحة القناه الاربيه مقفلتش و هى اللى بتنزل المايه لكيس الصفن ، فلما بنقرر اننا نعالج القيله المائيه بالسرنجه احنا كده مش بنعالج اساس المشكله اللى هو فتحه القناه الاربيه احنا بس بنعالج العرض اللى سببته ، و ده معناه ان القيله المائيه هترجع للطفل تانى و اكتر من الاول طول ما فتحة القناه الاربيه متقفلتش 

طيب هو علاج القيلة المائية الصح هيكون ايه ؟

اول حاجه احنا بنستنى على الطفل سنة ونص او سنتين ، عشان في احتمال كبير جدا ان خلال الفترة دي فتحة القناة الإربية تقفل لوحدها من غير اي عملية ، والجسم يمتص باقي الميه اللى نزلت لكيس الصفن وتتعالج القيلة المائية لوحدها ، وده بيحصل في نسبة كبيرة جدا من الأطفال المصابين بالقيلة المائية

لكن لو استنينا لحد ما الطفل يوصل لعمر السنتين والقيلة المائية مارحتش ساعتها ممكن نعمل عمليه بسيطة جدا عشان نشيل بيها كيس القيلة المائية الموجود جنب الخصية أو من على الحبل المنوي على حسب مكان القيلة المائية كان فين

و علشان تعرفوا اكتر عن علاج القيله المائيه , تعالوا نشوف الفيديو ده مع دكتور محمد علام :  

و اخيرا خلي بالك على طفلك و خليكى عارفه ان في طرق علاج ممكن تسببله مشاكل كتيرة جدا احنا في غنى عنها.