تأثير عملية الفتق الاربى على الخصية عند الأطفال

كتير من الأهالى اول ما بيعرفوا ان طفلهم عنده فتق إربى ، و الدكتور يقولهم إن العلاج الوحيد للفتق الإربى عند الأطفال هو إن الطفل 
يعمل عمليه بيخافوا ان ​هل عملية الفتق الإربى ممكن تأثر على الخصية؟
وعلشان نعرف ليه الفتق الإربى علاجه الوحيد عمليه تعالوا نفتكر مع بعض الفتق الإربى ده كان عباره عن ايه :

يعني إيه فتق إربى عند الأطفال؟
الفتق الإربى ده بيكون عباره عن إختلاف خلقى الطفل بيتولد بيه ، يعنى مش حاجه بتحصله نتيجه مرض جاله لما اتولد
و الإختلاف الخلقى ده عباره عن ان جزء من الأمعاء بيفضل يطلع و ينزل من تجويف البطن للقناه الإربيه
علشان كده بنقول إن العملية هي العلاج الوحيد للفتق الإربى ، علشان نربط كيس الفتق و نشيله ، و علشان نتأكد ان الفتق مش هيرجع تانى

ليه لازم الطفل يعمل العملية بسرعة؟ 
وفى الحقيقه فى حاجتين مهمين لازم نكون عارفينهم علشان نضمن نجاح عمليه الفتق الإربى :

1- أول حاجه لازم نعرف ان عمليه الفتق الإربى لازم الطفل يعملها أول م يتشخص ان عنده فتق إربى ، حتى لو كان الطفل عمره يوم
لأننا لو استنينا لحد ما الطفل يكبر شويه ده ممكن يعمل للطفل حاجه اسمها إختناق للفتق الإربى:

و إختناق الفتق الإربى ده بيكون عباره عن إن الجزء اللى بيفضل يطلع و ينزل من الأمعاء اتحشر جوه القناه الإربيه و مش قادر يرجع مره تانيه  جوه تجويف البطن

و الإختناق ده لو متعالجش ممكن لاقدر الله يسبب غرغرينا للجزء ده من الأمعاء لأن الدم مش واصله ، و الغرغرينا دى ممكن بعد كده
تسبب تسمم دموى للطفل ، و بسبب كل الأضرار و المشاكل دى ، بنقول اننا لازم نعمل عمليه الفتق الإربى اول م الطفل يتشخص بيه
لأن مفيش وقت معين نقدر نقول ان بيحصل فيه إختناق للفتق الإربى

2- تانى حاجه لازم نكون عارفينها و إحنا بناخد قرار عمليه الفتق الإربى ،هو إختيار جراح أطفال متخصص ، و مش بس كده
ده كمان لازم يكون اشتغل عمليات فتق إربي كتير

لأن زى ما قولنا ان فى عمليه الفتق الإربى إحنا بنحتاج نستأصل كيس الفتق ، و كيس الفتق ده بيكون موجود فى مكان حساس جدا
و المكان ده بيكون جنب الشعيرات الدمويه اللى بتغذى الخصيه ، فممكن لو اللى بيعمل العمليه مش جراح أطفال متخصص
ممكن يصيب الأوعيه الدمويه اللى بتغذى الخصيه و هو بيسلك كيس الفتق
و لو الأوعيه الدمويه اللى بتغذى الخصيه حصلها إصابه ، ده ممكن يعمل ضمور للخصيه

طيب إيه هو ضمور الخصية؟ وهل في ضرر على الطفل؟ 

 بيكون فى ضرر على الطفل لو الخصيه حصلها ضمور؟ وايه ممكن يكون ​تأثير عملية الفتق الاربى على الخصية عند الأطفال
فى الحقيقه ضمور الخصيه ده ممكن ينتج عنه مشاكل كتير :

1- اول حاجه و هى ان الخصيه مش هتقدر تقوم بوظيفتها و هى إنتاج الحيوانات المنويه ، اللى دورها انها تخصب البويضه فى عنق الرحم علشان يحصل حمل ، و بالتالى ده هيأثر على القدره الإنجابيه للطفل لما يكبر

2- تانى حاجه ممكن تحصل لو الخصيه حصلها ضمور، ان ساعتها الخصيه مش هتقدر تنتج هرمون التستوستيرون ،
و الهرمون ده بيكون مسئول عن ظهور علامات البلوغ على الطفل اثناء النمو زى:

• ظهور الشنب
• ظهور شعر الوجهه
• كبر حجم الخصيتين
• نمو العضو الذكرى

:يعني باختصار، تأثير عملية الفتق الإربى على الخصية عند الأطفال بيعتمد على سرعة اتخاذ القرار، واختيار جراح أطفال متخصص
و تعالوا نسمع الفيديو ده مع بعض علشان نعرف ليه لازم جراح أطفال متخصص اللى يعمل العمليه للطفل

كل دى مشاكل نقدر اننا نتجنبها لو فحصنا الطفل عند جراح أطفال متخصص ،
و خلينا نقول ان مفيش فى الدنيا أغلى من صحه أطفالنا علشان نحافظ عليها
ربنا يحمى و يحفظ كل أطفالكوا