كل فتق اربي هو قيلة مائية ، بس مش كل قيلة مائية هي فتق إربي

مرضين شائعين جدا بتفكر فيهم الام لما تلاحظ ان البيبي عنده انتفاخ أو ورم في المنطقة اللي بين آخر البطن و اول الفخد ، و تبدأ تسأل نفسها هو  ده فتق اربي ولا قيلة مائية ؟

طيب اعمل ايه ولا اروح لمين؟ وهل هيروح لوحده ولا لا ؟ تعالي خلينا نعرف سوا اي هو الفرق بين الفتق الإربي والقيلة المائية وازاي هيكون علاجهم. 

تعالو نتكلم أول حاجة عن القيلة مائية ونعرف

اي هي القيلة المائية؟

القيلة المائية هى عباره عن مايه بتتجمع على خصية الطفل ، و ممكن القيلة المائية تحصل على الخصيه اليمين بس او الشمال بس وساعات  ممكن تيجى على الناحيتين.

طيب وهي القيلة المائية بتحصل ليه ؟ 

عشان نعرف اكثر لازم نرجع لورا شوية لما كان الطفل لسه جنين فى بطن الام ، عشان من هنا هنعرف ليه القيلة المائية حصلت.

في وقت الحمل ومن الشهر السابع بتبدأ الخصية تتحرك من مكانها اللي كانت فيه و اللي هو فى البطن ورا الكلى , وتروح لمكانها الطبيعي اللي هو في كيس الصفن ، ودا من حكمه ربنا لان الخصية عشان تقدر انها تقوم بوظيفتها اللى هى انتاج الحيوانات المنويه و انتاج هرمون الذكوره ، لازم تكون فى درجة حرارة ماتزدش عن 35 درجة ، وده مش هيحصل لو الخصية فضلت فى البطن و مانزلتش لكيس الصفن 
، و الخصية عشان تنزل لكيس الصفن فهي بتتحرك عن طريق قناه اسمها القناة الاربية ، و القناه دى بتكون موجوده فى البطن و بتوصل لحد كيس الصفن ، والمفروض انها بتفتح مع بداية حركة الخصية وبتقفل لما الخصية بتطلع منها.


بس في بعض الحالات القناة دي مش بتقفل وبتخليها مفتوحه بعد نزول الخصيتين ،وبتكون مفتوحه بمقدار 4 مللي و عشان القناة الاربية دى بتكون موصلة البطن بكيس الصفن ، و البطن بيكون فيها سوائل ، فبتبدأ السوايل دي انها تنزل لكيس الصفن ، و ده اللى بيسبب للطفل قيله مائيه

وهنا اللي بيحدد ان ده قيلة مائية هو حجم فتحة مدخل القناة الإربية ، لأنها لو كانت أكتر من 4 مللي فالطفل هيكون عنده فتق اربي
 عشان كده مهم جدا لو لاحظنا اي انتفاخ او تورم في المنطقة الاربية , لازم نكشف على الطفل فى اسرع وقت عند دكتور جراحة اطفال ، و اللى هيطلب اننا نعمل سونار عشان نحدد قطر فتحة مدخل القناه الاربيه و نشوف هل الطفل عنده قيله مائيه ولا فتق اربى . 

وتعالوا كده نعرف ايه هو الفتق الاربي ؟

الفتق الإربي هو اختلاف خلقى بيتولد بيه الطفل وبيكون على شكل ورم أو كولكيعه فى المنطقة الاربية ، والورم ده بيظهر أكتر لما يكون الطفل بيعيط او بيحزق جامد او بيكح ، و بيختفى بعد كده لما الطفل يكون هادي أو نايم.

والفتق الأربي بيحصل للبنات أو الأولاد ، بس بيكون منتشر أكتر عند الأولاد ، و الفتق الأربي ده ممكن يحصل للطفل اول ما يتولد وهو عمره يوم ، وممكن يحصل بعد اكتر من سنه ، وكمان ممكن انه يحصل على الناحية اليمين بس أو الشمال بس و فى حالات بسيطة جدا ماتزيدش عن 10% الفتق ممكن يحصل على الناحيتين الشمال واليمين .
  لو عايزين تعرفوا أكتر وبشكل مفصل عن الفتق الإربي تقدروا تروحوا على مقال الفتق الإربي.

و خلينا نشرح دلوقتى بشكل مبسط هو ليه الفتق الاربي ممكن يحصل للطفل 
الفتق الإربي بيحصل لان مدخل القناه الاربية برضو بيفضل مفتوح بعد ما الخصية بتكون نزلت من تجويف البطن لكيس الصفن , و فتحة مدخل القناه الاربية هنا بتكون اكتر من 4 مللي , وهو ده اللى بيسبب لأطفالنا الفتق الاربي  , ودا لان فتحة مدخل القناة الاربية دي هتسمح بنزول جزء من الأمعاء واللي بيفضل يدخل ويخرج من و الى تجويف البطن ، وده اللي بيخلي الفتق يظهر على هيئة ورم لما الطفل يعيط و يكح او يحزق ، وبيختفي تاني في أوقات راحة الطفل وهدوءه و اوقات نومه .

وخلونا نعرف دلوقتي 

 ليه كل فتق اربي هو قيلة مائية بس مش كل قيلة هي فتق اربي ؟

زي ما قلنا ان في الفتق الاربي فتحة مدخل القناة الإربي بتكون اكبر من 4 مللي فكدا اصلا السوائل هتنزل عشان الفتحة كبيرة وتعمل قيلة مع الفتق

أما بالنسبة للقيلة المائية فالفتحة بتكون صغيرة فمش هتقدر الأمعاء انها تنزل منها واللي بينزل منها بس هو المية .

وتعالو نتكلم عن العلاج بشكل سريع ونعرف ان القيلة المائية ممكن اننا نستنى عليها فترة من سنة ونص لسنتين لان فتحة القناة الإربية ممكن انها تتقفل لوحدها و الجسم يمتص المية الزيادة اللي كانت في الجسم ، أما لو الفتحه مقفلتش ساعتها لازم نتدخل جراحيا ، ​و افتحوا مقال علاج القيلة المائية ، علشان تعرفوا اكتر عن علاج القيله المائيه

 اما بالنسبة للفتق الاربي لازم يتعالج في أقرب وقت ممكن بعد اكتشافه ، والفتق الإربى علاجه الوحيد هو التدخل الجراحي ، وده عشان الفتق الاربي مايتحولش لفتق اربي مختنق ويهدد حياة البيبي 
و علشان نقدر نفرق بين الفتق الإربى و القيله المائيه ، تعالوا نسمع الفيديو ده مع بعض:

المهم ان الفحص يكون عند دكتور متخصص في جراحة الأطفال عشان يقدر يشخص الطفل بطريقة صحيحة وكمان يعالجه صح .

متقلقيش على ابنك .