استئصال الطحال عند الأطفال

بنسمع كتير عن أطفال صغيره بتعمل حاجه اسمها استئصال الطحال ، بس منعرفش يعنى استئصال الطحال
و قبل مانعرف ايه هو استئصال الطحال تعالوا نعرف

ايه الطحال ده أصلا؟

الطحال عضو صغير في الجسم، موجود جنب المعدة كده ناحية الشمال، ودوره مهم جدًا في مناعة الجسم، لإنه بيساعد في تنقية الدم من البكتيريا والخلايا اللي باظت، وكمان بيخزن دم زيادة بيحتاجه الجسم فى وقت الطوارئ.
بس أوقات، بيضطر الدكتور يشيل الطحال عند الأطفال، وده قرار كبير، وبيتاخد بعد تفكير طويل. تعالوا نعرف أكتر مع
بعض عن استئصال الطحال

فى حاجات معينه لو حصلت للطفل لازم نضطر نشيل الطحال ، زى :

1. اول حاجه ان يحصل تمزق للطحال : زي لما الطفل يقع جامد أو يتخبط في حادثة، وساعتها الطحال ممكن يتقطع أو ينزف جامد، وساعتها لازم ندخل و نشيله
2. زى أنيميا البحر المتوسط ، و دى بتكون وراثه و دى بتؤدى لتدمير خلايا الدم الحمرا بصوره مستمره و بالتالى ده بيأثر على وظيفه الطحال
3. او ان الطفل يكون عنده حاجه اسمها انيميا منجليه و دى بينتج عنها تراكم لخلايا الدم الغير طبيعيه و برضوا بتأثر على الطحال
4. او يكون فى التهاب فى الطحال بشكل مستمر و ده ممكن يسبب تضخم للطحال و برضوا ده بيأثر على وظيفه الطحال
5. و اخر حاجه لو الطفل كان عنده اورام فى الطحال دى برضوا من الحاجات اللى بتطلب اننا نعمل استئصال للطحال علشان متأثرش على حياه الطفل

و بعد ماعرفنا ايه الحالات اللى لازم نعمل فيه للطفل استئصال للطحال
تعالوا نعرف

 ايه الأعراض او العلامات اللى منها ممكن نعرف ان الطفل عنده مشكله فى الطحال :

• ان الطفل يكون بينقل دم كتير بإنتظام نتيجه مشكله وراثيه ، و فى الحاله دى اللى بيقرر ان الطفل لازم يعمل عمليه استئصال الطحال ، هو دكتور دم أطفال

· تضخم واضح في البطن.
· تعب عام وضعف مستمر.
· أنيميا مش بتتحسن رغم العلاج.
· سهوله حدوث نزيف للطفل بصوره مستمره لأن الطحال مش قادر يقوم بوظيفته
· التهابات متكررة.

طيب ايه الإجراءات او الفحوصات اللازمه اللى الدكتور بيطلبها قبل عمليه استئصال الطحال؟

1. نعمل فحص دم للطفل
2. نعمل فحص للطفل بالموجات الفوق صوتيه
3. او اشعه مقطعيه او اشعه رنين مغناطيسى حسب حاله الطفل

طيب ايه اللى بيحصل فى عمليه اسئصال الطحال دى؟

قبل مانقول ايه اللى بيحصل فى العمليه :
خلينا نوضح ان الطفل قبل العمليه بياخد حاجه اسمها تطعيم قبل استئصال الطحال ، مع دكتور دم أطفال 

1- اول طريقه و هى الجراحه :

أثناء العملية، واللي بتتعمل تحت تأثير البنج الكلى، الجراح بيبدأ يشوف إذا كان يقدر يعملها بطريقة بسيطة من غير ما يفتح جرح كبير، وده بيكون أريح وأسهل على الطفل. بس الطريقة اللي بيختارها الجراح بتعتمد على حجم الطحال. يعني لو الطحال كبير قوي، غالبًا الجراح هيضطر يعمل العملية بالجراحة المفتوحة علشان يقدر يشيله بأمان.

2- تانى طريقه و هى المنظار الجراحى :

الجراح بيعمل شوية فتحات صغيرة في بطن الطفل، وبيستخدم كاميرا صغيرة علشان يشوف الطحال على شاشة قدامه. من خلال الكاميرا دي، بيقدر يتحكّم في أدوات دقيقة ويشيل الطحال من غير ما يفتح جرح كبير. بعد ما يخلص، بيخيط الفتحات الصغيرة دي. بس لو شاف إن شكل الطحال أو حجمه مش مناسب للمنظار، ممكن يقرّر يكمّل العملية بالجراحة المفتوحة.

و بعد مالطفل بيعمل عمليه استئصال الطحال بيفضل مكمل على تطعيمات معينه باقى حياته علشان تقوى مناعته

طيب بعد ماعرفنا العمليه بتتعمل إزاى ياترى  

هل فى مضاعفات للعمليه ؟

عمليه استئصال الطحال زى اى عمليه جراحيه ممكن ينتج عنها مضاعفات زى :

• النزيف
• العدوى
• او تجلطات فى الدم

علشان كده دايما بننصح ان لازم جراح أطفال متخصص هو اللى العمليه علشان نتجنب اى مضاعفات ممكن تحصل ربنا يحمى و يحفظ كل أطفالكوا