الخصية النطاطة عند الأطفال

كتير من الأهالى ساعات بيلاحظوا أن خصيه طفلهم ساعات بتكون موجوده فى كيس الصفن ، و ساعات تانية بتكون مش موجوده
و فى الحاله دى بيكونوا مش عارفين طفلهم عنده مشكله ولا لا
فتعالوا نعرف مع بعض اللى عند الطفل ده ممكن يكون ايه:

اللى عند الطفل ده نوع من أنواع الخصية المعلقة ، اسمه الخصية النطاطة ، و قبل منتكلم عن الخصية النطاطة بالتفصيل
تعالوا نفتكر بسرعه مع بعض الخصيه المعلقه دى كانت عباره عن ايه:

الخصيه المعلقه دى : عبارة عن خصيه اتعلقت فى القناه الأربيه اثناء نزولها من البطن لكيس الصفن
و فى حالات تانيه ممكن تكون لسه موجوده جوه تجويف البطن

طيب كده عرفنا ايه هى الخصية المعلقة تعالوا بقى نعرف  

الخصية النطاطة دى عباره عن ايه :

الخصية النطاطة دى عباره عن خصيه طبيعيه جدا ، بس باين من اسمها ان فى بعض الحالات ممكن نلاقى الخصية دى بتنط من مكانها و نلاقيها طلعت للقناه الأربية فوق

طيب الحالات دى زى ايه؟

زى لو كان الطفل خايف او سقعان ، ساعتها زى م قولنا هنلاقى الخصيه طلعت للقناه الإربية فوق
و أول م الطفل يبدأ يهدى بنلاقى الخصية رجعت نزلت لكيس الصفن تانى بشكل طبيعى 

ايه اللى بيخلى الخصية النطاطة دى تحصل للأطفال؟

الخصيه النطاطه بتحصل فى الأطفال بسبب ان عضله الفخد فى الأطفال دى بتكون قويه اوى ، فلما العضله بتتشد لو كان الطفل بردان ، او قلقان او خايف ساعتها هنلاقى الخصيه بتطلع لفوق
و زى م قولنا أول م الطفل بيهدى بنلاقى الخصيه رجعت لكيس الصفن بشكل طبيعى

و تعالوا نعرف اكتر عن الخصيه النطاطه عند الأطفال فى الفيديو ده :  

طيب هى الخصية النطاطة دى ليها خطورة على الطفل؟ ، و علاجها بيكون ايه؟

فى الحقيقه الخصيه النطاطه مفيش منها أى خطوره على الطفل ، لأنها مع مرور الوقت بتبدأ تثبت و تستقر فى كيس الصفن كل مالطفل عمره يكبر
و بالنسبة لعلاج الخصيه النطاطه ، فهى مش بتحتاج أى علاج ولا أى تدخل جراحى
كل اللى بنحتاج نعمله ، إننا نتابع كل 6 شهور مع دكتور متخصص فى جراحه الأطفال ، علشان نتأكد إنها متحولتش من خصيه نطاطه لخصيه معلقه

و خلينا نقول ان الخصيه النطاطه ، من أنواع الخصيه المعلقه اللى مفيش منها اى خطوره على الطفل
طول م إحنا بنتابع مع جراح أطفال متخصص ، علشان نفضل مطمنين إنها متحولتش لخصيه معلقه
و ربنا يحمى و يحفظ كل أطفالكوا