أمتي لازم تأجلي طهارة طفلك ؟ 

أحيانا بيحصل أن في أم راحه تطاهر طفلها فالدكتور يقولها لازم نأجل الطهارة شوية لأن مش هينفع نطاهره دلوقتي , طبعا دا بيخلي الأم تقلق وتسأل نفسها ليه إبني مش هيتطاهر دلوقتي وليه لازم نأجل الطهارة ؟؟

عشان نعرف ليه الطفل دا طهارته أتأجلت لازم نعرف اي هي مؤجلات الطهارة عند الأطفال الذكور .
تأجيل الطهارة بيحصل بسبب أن في نسبة كبيرة من الأطفال حديثي الولادة بيتولدوا باختلافات خلقية ودي بنسميها مؤجلات الطهارة .
والإختلافات الخلقية دي زي :  

1 - الإحليل السفلي

هو إختلاف خلقي بيتولد بيه بعض الأطفال , وبتكون فتحة البول مش في مكانها الطبيعي اللي هو في رأس العضو الذكري. ممكن تكون الفتحة بعيد عن رأس العضو الذكر شوية او في منتصف العضو الذكري او في أخر العضو عند كيس الصفن

وأحنا بنضطر لو الطفل عنده إحليل سفلي أننا نأجل الطهارة 6 شهور من الولادة طب ليه هنأجل الطهارة ؟؟؟؟
ده لاننا بنستخدم جلدة الطهارة في عملية إصلاح الإحليل السفلي، فلو طاهرنا الطفل قبل عملية الإحليل السفلي هنضطر أننا ناخد جلد من مكان تاني في جسم الطفل زي ( اللثة ) عشان نستخدمه في إصلاح الإحليل السفلي  

2 - العضو المدفون

 العضو المدفون من الإختلافات الخلقية اللي بتأجل عملية الطهارة
و بالأخص الدرجة المتقدمة من العضو المدفون , و دا لأن العضو مش بيكون ظاهر بحجمه الطبيعي
,والعضو بيكون مختفي بسبب أن ممكن 

1. الطفل يكون عنده دهون كتير فى منطقة العانة  
   
2. او ان الطفل عنده مايه ( قيلة مائية ) بنسبة كبيرة على الخصيتين. 

واحياناً الإختلاف دا بيتصلح مع مرور الوقت ، و احياناً بيحتاج لعمليه بسيطه عشان العضو يكون ظاهر بشكل طبيعى .

3- إلتصاق العضو الذكري بكيس الصفن

الطبيعى ان جلد العضو الذكري بيكون منفصل عن جلد كيس الصفن، بس فيه بعض الاطفال بيتولدوا بإختلاف خلقي وبيكون فى التصاق بين كيس الصفن و العضو الذكرى، و لازم نفك الالتصاق اللى بين العضو الذكرى و جلد كيس الصفن وبعد نطاهر الطفل

4 - الفتق الاربي :

الفتق الإربي عبارة عن كولكيعة بتظهر بين الفخذ وأسفل البطن عند (لازقة البامبرز بالتحديد )ودا بيحصل بسبب أن فتحة القناة الاربية بعد نزول الخصيتين متقفلتش ونزل في القناة الإربية جزء من الأمعاء،
والفتق الإربي بمجرد أكتشافه عند طفلك لازم تدخل جراحي فورا، لأن الفتق الإربي لو أهملناه ممكن يحصله اختناق في أي لحظة ، ودا ممكن يعرض حياة الطفل للخطر زي أنه يحصله تسمم دموي او يفقد الخصية
عشان كدا بيكون ​​الأولويه بتكون لعملية الفتق الإربي وبعد كدا نطاهر الطفل وممكن وأحنا في عملية الفتق الإربي نطاهره

• لو الطفل عنده الصفرا تكسيريه، أو صفرا فسيولوجيه بنسبة عالية جدا 
  
• مرض الهيموفيليا ودا من الأمراض اللي بتسبب سيولة في الدم، ودا هيكون سبب في النزيف وقت الطهارة . (وهنا لازم نتابع مع دكتور أمراض دم) قبل ما نطاهر الطفل  
  
• لو الطفل عنده أمراض ومشاكل في القلب والتنفس  
  

وبسبب مؤجلات الطهارة دي أحنا بنفضل أن طهارة الأطفال الذكور تكون بعد اول أسبوعين من الولادة لعمر 3 شهور , بعد ما نعمل كل الفحوصات اللازمة ونطمن أن الطفل معندوش اي إختلافات خلقية ولا مشاكل صحية تمنع او تأجل الطهارة , ولو طفلك عنده اي أمراض او مانع من موانع الطهارة لازم تعالجيه الأول قبل ما تاخدي خطوة الطهارة عشام ميحصلوش اي مضاعفات خطيرة تانية بسبب الطهارة , وطبعا لازم تطاهريه عند دكتور متخصص في جراحة الأطفال وبأدوات طهارة متعقمة وحديثة

و تعالواا نسمع اكتر عن مؤجلات الطهاره ، مع دكتور محمد علام فى الفيديو ده :  

وعشان تعرفي اي أحسن وأفضل أجهزة لطهارة الأطفال الذكور ا فتحى المقال ده:
تطاهري طفلك بالحلقة البلاستيكية ولا جهاز الجومكو ؟