إحجز موعد

الخصية المعلقة الغير المحسوسة عند الأطفال

الرئيسية الاختلافات الخلقية > ​​​الخصية المعلقة الغير المحسوسة عند الأطفال
الخصية المعلقة الغير المحسوسة عند الأطفال

الخصية المعلقة الغير المحسوسة عند الأطفال

ساعات كتير من الأمهات و هى بتغير لأطفالها ، ممكن تلاقى خصية من الخصيتين أو الخصيتين مش موجودين جوه كيس الصفن
و بتبدأ تقلق و بتكون مش عارفه اللى عند طفلها ده ايه، او بتكون مش عارفه خصية طفلها ممكن تكون راحت فين
علشان كده تعالوا نعرف مع بعض اللى عند الطفل ده بيكون ايه

اللى عند الطفل ده إختلاف خلقى اسمه الخصية المعلقة :
و ده بيكون عباره عن ان خصيه من الخصيتين او الخصيتين مش موجودين جوه كيس الصفن 

طيب ليه الخصيه المعلقه دى ممكن تيجى للأطفال؟

الخصية المعلقة ممكن تيجى للأطفال لو اتوفر عامل من العوامل دى :

  1. ان الأم تكون اتعرضت لمبيدات حشرية او مواد كيميائية اثناء الولاده
  2. ان البيبى يكون مولود بدرى قبل ميعاده
  3. و لو كان البيبى مولود وزنه قليل

طيب الخصية بتاعه الطفل ممكن تكون راحت فين ؟

فى الحاله دى بيكون عندنا أكتر من إحتمال الخصيه ممكن تكون موجوده فيهم :

  • اول إحتمال ان الخصيه تكون لسه موجوده جوه تجويف البطن ، و دى بنسميها خصيه معلقه غير محسوسه
  • تانى إحتمال ان الخصيه تكون متخلقتش أصلا ، و فى الحاله دى الطفل هيكون مولود بخصيه واحده بس
  • تالت إحتمال ان الخصيه تكون اتعلقت اثناء نزولها من البطن لكيس الصفن

و النهارده هنتكلم عن الخصيه المعلقه الغير محسوسه :

و دى عباره عن نوع من أنواع الخصيه المعلقه عند الأطفال

طيب ليه بنسميها غير محسوسه؟

لأن اثناء الفحص الإكلنيكى للطفل ، الدكتور مش بيقدر يحس وجودها اثناء الفحص
و فى الحاله دى إحنا بنستنى لمده 6 شهور قبل ما نلجأ لأى تدخل جراحى

و تعالوا نسمع أكتر عن الخصيه المعلقه الغير محسوسه فى الفيديو ده :  

طيب اشمعنا بنستنى 6 شهور؟

لأننا بنحط إحتمال ان خصيه الطفل ممكن تنزل بشكل طبيعى خلال ال 6 شهور دول و منحتاجش لأى تدخل جراحى

طيب لو عدى 6 شهور و الخصيه منزلتش؟

ساعتها هنعمل حاجه اسمها منظار استكشافى ، و ده بنعمله علشان سببين :

  1. نحدد إذا كانت الخصيه موجوده أصلا ولا لا ، و لو كانت مش موجوده ، كده خلاص الطفل معندوش خصيه و إطمنا اننا مش سايبين للطفل اى حاجه تقلب ورم لاقدر الله
  2. تانى إحتمال اننا فعلا نلاقى الخصيه لسه موجوده جوه تجويف البطن ، و فى الحاله دى هيكون عندنا إحتمالين :
  • اول إحتمال اننا نلاقى الحبل المنوى بتاع الخصيه طويل ، و فى الحاله دى هنعملها عمليه تسليك و نعملها محفظه و نثبتها فى كيس الصفن
  • تانى إحتمال إن الحبل المنوى بتاع الخصيه يكون قصير ، فى الحاله دى هنعمله عمليه إطاله ، و بعد كده هنستنى 6 شهور و ندخل تانى من نفس الفتحه بتاعه المنظار علشان نعمل تثبيت للخصيه فى كيس الصفن

و فى الحالتين عمليه الخصيه المعلقه عمليه بسيطه ، لو اتعملت مع جراح أطفال متخصص
و الولد اتشخص فى التوقيت الصح
ربنا يحمى و يحفظ كل أطفالكوا