عملية الإحليل السفلي عند الأطفال الذكور

الإحليل السفلي من الاختلافات الخلقية اللي بيتولد بيها بعض الأطفال الذكور و العلاج الوحيد للإحليل السفلي هو التدخل الجراحي لكن العلاج بيتوقف علي درجة الإحليل عند الطفل , كل درجة ليها طريقة مختلفة في العملية هنعرفها سوا
وخلينا عارفين أن أنسب وقت لعملية الإحليل السفلي بين عمر 6 شهور ل 8 شهور

طب ليه مش قبل ولا بعد الفترة دي ؟
مش قبل 6 شهور لأن عملية الإحليل السفلي مش خطيرة واحنا مش مستعجلين عليها دلوقتي
وكمان العملية بتاخد وقت طويل شوية فمش بنفضل نعرض البيبي وهو لسه صغير للتخدير فنصبر شوية لحد ما يتم 6 شهور

طب ليه مش بعد 8 شهور ؟
1. لان إحساس الطفل وإدراكه بالعملية بيكون أقوي
2. الطفل بيكون بدء يتحرك ويلعب وأحنا بنركب قسطرة بولية بعد العملية فممكن الطفل يشدها
3. وكمان التئام الأنسجة بيكون أفضل كل ما العملية تتعمل بدري
4. ومعاناه الأم في رعاية الطفل وهو كبير هتكون أكبر لكن وهو صغير الطفل بيكون نايم او متشال معظم الوقت

طيب العملية هتم ازاي في كل درجة من درجات الإحليل السفلي ؟

• الدرجة الاولي (الاحليل البسيط)

1. لازم الأول نتاكد ان العضو لو في إنحناء نفرده
2. ولو لقينا فتحة البول قريبة من رأس العضو الذكري هنعمل قناة مجري البول من غير رقعة وتبقي كدا العملية خلصت علي مرحلة واحده

• لو الإحليل من الدرجة المتوسطة

1. طبعا لازم نفرد العضو الذكري من الإنحناء
2. بس في الدرجة دي بيكون صعب نعمل قناة مجري البول من الأنسجة البسيطة الي موجوده عندنا ,
3. فبناخد رقعة من جلد الطهارة ولو الطفل متطاهر بناخد من جلد اللثه الداخلي في الشفة السفلية
4. بعد 6 شهور نقفل الرقعة دي ونعمل أنبوبة مجري البول كاملة
5. وفي نفس العملية لو الطفل محتاج طهارة نطاهره.

• الإحليل من الدرجة المعقدة بتتعمل علي مرحلتين أو تلات مراحل

في المرحلة الأولي لازم نفرد العضو الذكري لأن بيبقي في إنحناء شديد في العضو
ونأخد رقعة من جلد الطهارة او من اللثة
وفي المرحله التانية بعد 6 شهور : بنقفل أنبوبة مجري البول لحد نصها بس
وأخر مرحلة بعد 6 شهور : بنقفل أنبوبة مجري البول ورأس العضو الذكري وكدا العملية خلصت  

طب هو اي الهدف من عملية الإحليل السفلي عند الأطفال ؟

• ان فتحة البول تكون في مكانها الطبيعبي وبالحجم الطبيعي مفيش ضيق في الفتحة
• ان العضو يكون سليم مفرود بيقوم بوظايفه بشكل طبيعي
• رأس العضو تكون في الشكل قريبة جدا من الشكل الطبيعي
• تحسين الشكل الجمالي للعضو الذكري
• الطفل قادر يعمل حمام وهو واقف والبول بيخرج بشكل مستقيم

و تعالوا نعرف اكتر عن عمليه الإحليل السفلى فى الفيديو ده

عملية الإحليل السفلي دقيقة جدا ومعقدة فلازم تكون عند دكتور متخصص في جراحة الأطفال عنده خبره كفاية بالعمليات من النوع دا عشان ميحصلش اي مضاعفات او حتي العملية تفشل وتضطري تعمليها لطفلك تاني ,وطبعا اهم حاجه التشخيص الصحيح وتحديد درجة الاحليل اللي عند طفلك وتعرفي تعرفي معلومات اكتر عن الاحليل السفلي ودرجاته من المقال دا الاحليل السفلي عند الاطفال الذكور