عمليه الفتق الإربى عند الأطفال جراحه ولا منظار؟

كنا اتكلمنا قبل كده عن الفتق الإربى , و قولنا انه من الإختلافات الخلقية اللى مينفعش نستنى على علاجها ’ لأنها ممكن تأثر على حياه الطفل
بس كتير من الأهالى بيكونوا مش عارفين تفاصيل كتير عن العملية , ولا العمليه هتتعمل بأنهى طريقه و ده بيزود قلق الأب و الأم أكتر
علشان كده فى مقال النهارده هنتكلم اكتر عن طريقه العمليه, و هنعمل العمليه جراحه ولا منظار؟؟ 

و خلينا نبدأ كلامنا ب امتى نعمل عمليه الفتق الإربى بالمنظار؟ 

1- اول حاله بنلجأ فيها للمنظار من حالات الفتق الإربى , هو الفتق الإربى المرتجع:
و ده بيكون عباره عن ان الطفل كان عنده فتق إربى و عمل عمليه الفتق الإربى , بس الفتق رجع تانى , و فى الحقيقه ده ممكن يحصل لسببين:
اول سبب هو عدم إختيار جراح أطفال مناسب علشان يعمل العمليه
تانى سبب هو ان الفتق يكون حجمه كبير جدا
طيب ليه بنقول اننا بنلجأ للمنظار الجراحى بدل الجراحة فى الفتق الإربى المرتجع؟
لأننا لو فتحنا جراحة مره تانيه مكان العمليه القديمة , بنسبه كبيره جدا ممكن نضر الأنسجة والشعيرات الدموية و الوعاء الناقل اللى بيغذى الخصية

و فى الحاله دى الخصية ممكن تضر او يحصلها ضمور و نضطر نشيلها خالص , و طبعا ده هيأثر على قدرة الطفل الإنجابية لما يكبر لأنه فقد خصية من الخصيتين
و فى هنا سؤال مهم: و هو الفتق ممكن يرجع على الناحيه التانيه؟ يعنى لو كان الطفل عنده فتق إربي على الناحيه اليمين مثلا لو الفتق رجع , ممكن يرجع على الناحيه الشمال؟
فالإجابة هى لا , الفتق الإربي لما بيرجع بيرجع على نفس الناحيه اللى كان موجود فيها , لكن لو لقينا الفتق جه الناحيه ده معناه ان كان فى اصلا فتق بس مكانش ملحوظ علشان مكانش وارم

2- تانى حاله بنلجأ فيها لإستخدام المنظار هو الفتق الإربى المختنق :
و ده لأننا نقدر نصلح و نطمن على الأمعاء اللى حصلها اختناق قبل م نرجعها تانى البطن ، من خلال الكاميرا اللى بتكون موجوده فى المنظار

طيب بعد م عرفنا ايه الحالات اللى بنستخدم فيها المنظار الجراحى

تعالوا نعرف ايه بالظبط اللى بيحصل فى عمليه الفتق الإربى بالمنظار الجراحى:

اول حاجه بنخدر الطفل تخدير كلى  و اللى بيخدره بيكون دكتور متخصص فى تخدير الأطفال ,
و بعد كده بقى الدكتور بيفتح فتحتين او 3 فتحات فى السره بيكونوا حوالى 3 مم
...و علشان يدخل الانبوب الرفيع اللى فيه الكاميرا جوه البطن ..و.طبعا العمليه دى بتكون مدتها اطول شويه من الجراحه بتكون حوالى ساعه او ساعه و ربع.

و دلوقتى بعد ما عرفنا امتى نعمل عمليه الفتق الإربي باستخدام المنظار الجراحى,  

تعالوا نعرف امتى نعمل عمليه الفتق الإربى جراحه:

1- اول م نكتشف ان الطفل عنده فتق إربى , الوضع الطبيعى اننا نعمل العمليه جراحه
2- تانى حاله ممكن نعمل فيها عمليه الفتق الإربى جراحه , هو الفتق الإربى المزدوج , لأننا ساعتها بنفتح فتحتين صغيرين جدا بيكونوا مش باينين على عكس المنظار , اللى بنحتاج نعمل فيه 3 فتحات لو كان الفتق الإربى مزدوج على الناحيتين

و بعد ما عرفنا ايه هى الحالات اللى ممكن نعمل فيها عملية الفتق الإربى عن طريق الجراحه, 

تعالوا نعرف ايه اللى بيحصل فى العمليه:

اول حاجه فى الجراحه برضو , هى ان الطفل بيتخدر تخدير كلى على ايد دكتور تخدير أطفال متخصص
و بعدين الدكتور بيفتح فتحه حوالى 1سم او 1 سم ونص تحت البطن كده ,
..و بيبدأ يرجع الأمعاء مكانها تانى و يقفل كيس الفتق علشان الفتق ميرجعش ...و بيشيل اى حاجه ممكن تكون اتضررت او حصلها ضمور( سواء خصية أو مبيض أو أمعاء) ..
و بعد كده الدكتور بيقفل و يخيط الجرح بطريقه جماليه بحيث متكونش باينه...و العمليه بتكون حوالى نص ساعه او ساعه الا ربع

و لو عايزين تعرفوا أكتر عن عملية الفتق الإربي، تعالوا نسمع الفيديو ده مع بعض: 

و بعد ما اتكلمنا و شرحنا امتى نعمل عمليه الفتق الإربى بالمنظار و امتى نعملها جراحه هنرجع تانى و نأكد ان اختيار جراح الأطفال المناسب , هو اهم خطوه فى مرحله العلاج , عشان تعالج طفلك من البداية صح بدون ما تعرضه لاي مضاعفات خطيرة
و ربنا يحمى و يحفظ كل أطفالكوا