ليه مينفعش نأجل عملية الفتق الإربي؟

الفتق الإربي عند الأطفال من الإختلافات الخلقية الخطيرة اللي مينفعش نصبر دقيقة علي علاجها , لأن مضاعفات إهمال علاجه صعبه وخطيرة جدا علي حياة طفلك , وتعالوا نعرف

أحنا عارفين أن الفتق الإربي بيحصل لما جزء من الإمعاء بينزل في القناة الاربية، والجزء دا بينزل في القناة الإربية ويرجع تاني لتجويف البطن لكن ممكن في أي لحظه يحصل حاجه خطيرة جدا , وهي ان الأمعاء تفضل في القناة الإربية ومترجعش تانى لتجويف البطن ودا معناه ان الفتق الإربي بدأ يختنق .

من خطورة إختناق الفتق الإربى , ان الإمعاء لما بتنزل في القناة الإربية و تنحشر بيحصلها حاجه اسمها غرغرينا فى الأمعاء .والغرغرينا دى بتحصل نتيجه ان الدم مش بيكون واصل للأمعاء ودا بيخليها تضمر وتموت , وفي الحالة دي هنضطر نستأصل الجزء دا من الأمعاء

طب بعد ما حصل أختناق للفتق الإربي والطفل اتأخر فى انه يعمل العملية , في الحالة دي هيحصل مضاعفات خطيرة جدا زي أنه 

• ممكن يحصله لاقدر الله تسمم دموي  
  
• وممكن يحصل ضمور للخصية عند الولد وضمور للمبيض عند البنت  

ودا ممكن يقلل من فرص الطفل فى الإنجاب لما يكبر , لأن الولد بقى عايش بخصيه واحده بس فلو لاقدر الله الخصيه التانيه كان فيها  مشكله ممكن الطفل مايقدرش يخلف , والبنت لو حصل ضمور للمبيض فهي برضو فقدت قدرتها علي الإنجاب .  

لو لاحظتي أن الطفل : 

• عنده كلكيعة او تورم عند القناة الإربية بالتحديد عند لازقة البامبرز و لو ضغطتي عليها مش بترجع للبطن تاني يعني ثابته في مكانها  
  
• بيصرخ و يعيط جامد و مش مستحمل الوجع . 
  
• عنده التهابات شديدة جدا وتورم وانتفاخ في البطن.
• رافض الأكل او الرضاعه
• بيرجع اي حاجه بيأكلها او يشربها 
  

و هى دى الاعراض اللى بنعرف منها ان الفتق الإربي اللى عند الطفل بدأ يحصله إختناق ولازم نطلع على دكتور جراحة اطفال فورا 

فى الحقيقه الفتق الإربى كله نوع واحد لكن اللى بيفرق طفل عن التانى هو هل الفتق حصله إختناق ولا لا
فى اطفال ممكن تقعد سنين عندها فتق إربى و ميحصلش إختناق للفتق ,و فى أطفال تانيه ممكن يحصلها إختناق و هى لسه بتتشخص فى العياده عند الدكتور

فخليكي عارفه أن معاد أختناق الفتق الإربي مش معروف ومفيش اي دكتور يقدر يحددلك الفتق هيختنق أمتي
علشان كده دايما بنقول ان علاج الفتق الإربى بيبدأ من أول أكتشافه , لازم ناخد قرار العملية في أسرع وقت حتى لو عمر الطفل يوم واحد وطبعا ضروري العملية تكون مع متخصص في جراحة الأطفال عشان دا أول عامل من عوامل نجاح عملية الفتق الإربي عند طفلك

و دلوقتى لو عاوزين تعرفوا معلومات اكتر عن عملية الفتق الإربي عند طفلك هتلاقوها هنا علاج الفتق الإربي عند الاطفال   

و بعد م تخلصوا المقال ، تعالوا نشوف خطوره الفتق الإربى بشكل أوضح فى الفيديو ده :