الفتق الاربي عند الاطفال 

الفتق الاربى ده يعتبر واحد من اشهر و اخطر الاختلافات الخلقية اللى ممكن تحصل للأطفال و حديثى الولاده سواء البنات او الذكور ، و بقولكم من اخطر الاختلافات الخلقيه مش عشان علاجة صعب ، بس عشان فى امهات كتير ممكن متاخدش بالها ان طفلها مصاب بيه و فى امهات بتكون عارفة ان طفلها عنده فتق اربى و بتأجل قرار علاجه

الفتق الاربى هو اختلاف خلقى بيظهر على شكل ورم او حاجة مكلكعه فى المنطقة الاربيه ، و المنطقة الاربية دى هى المنطقه اللى بين البطن والفخد ، والورم ده بيظهر لما يكون الطفل بيعيط او بيحزق جامد او بيكح ، و بيقل بعد كده لما الطفل يهدى او يكون نايم

و الفتق الاربى ده ممكن يحصل للطفل اول ما يتولد وهو عمره يوم ، وممكن يحصل بعد اكتر من سنه ، و بيحصل زى ما قولنا فى البدايه للبنات و الذكور ، بس بيكون منتشر اكتر فى الذكور ، 
و الفتق الاربي بيظهر اكتر فى الناحية اليمين من المنطقة الاربيه ، و فى حالات بسيطة جدا ماتزدش عن 10% الفتق ممكن يحصل على الناحيتين الشمال و اليمين  

عشان نقدر اننا نجاوب على السؤال ده تعالوا نعرف اى اللى بيحصل للجنين فى رحم الام تحديدا فى الشهر السابع من الحمل ، اى جنين سواء كان ولد او بنت بيكون عندهم قناه فى البطن اسمها القناه الاربيه ، بيبدأ دور القناه دى فى اواخر الشهر السابع من الحمل

فالقناه دى عند الاولاد بينزل فيها الخصيتين من البطن ،لان هو ده المكان اللى بتكون الخصيه موجوده فيه في اول كام شهر من تكوين الجنين في رحم الأم ، و لما بيوصل الجنين للشهر السابع ، بتبدأ الخصيتين انهم ينزلو من البطن لكيس الصفن عن طريق القناه الاربيه

اما عند البنات ففى حاجة اسمها رباط الرحم المستدير ، و ده اللى بيربط المبيض بالشفره الخارجيه ، و اللى بيدأ ينزل من القناه الاربيه للرحم لما بيوصل الجنين للشهر السابع

و هنا بعد نزول الخصيتين او رباط الرحم المفروض ان القناه الاربيه دى بتتقفل ، لكن اللى بيحصل عند الاطفال اللى بيكون عندهم فتق اربى ان القناه دى بتفضل مفتوحة ، و بتبدأ تنزل فيها انسجة ، و الانسجة دى بتعمل حاجة اسمها كيس الفتق ، و كيس الفتق ده  بيبدأ ينزل فيه جزء من الامعاء و اللى بيفضل ينزل من البطن لكيس الفتق و يرجع تانى ،
و هو ده اللى بيعمل الورم او الكولكيعه اللى بتبدأ تظهر فى المنطقة الاربيه لما الطفل يعيط او يحزق او يكح ، و هنا لازم نوضح حاجة

ان الكحة و الحزق مش هما السبب فى ان الطفل يحصله فتق اربى هما بس بيظهروا الفتق  

بصراحة مفيش سبب واضح نقدر نقول ان بسببه القناه الاربيه مبتقفلش ، بس كل الدراسات اتفقت ان فى شويه حاجات لو حصلت للطفل بتزود من فرص ان يحصله فتق اربى زى :

1- ان الطفل يكون مولود قبل معادة .
2- او ان الطفل يكون وزنه اقل من كيلو
3- ان يكون الاب او الام كان عندهم فتق اربى ، فده ممكن يزود من احتمال ان الطفل يحصله فتق اربى
4- ان الطفل يكون عنده بعض الاختلافات الخلقيه التانيه زى القيله المائية او الخصية المعلقة ، ده بيزود من فرص ان الطفل يحصله فتق اربى . 

لازم اول ما تلاقى الطفل بيعيط روحى بسرعه و بصى على المنطقة الاربية ، على الناحية اليمين و الشمال لو لقيتي ان فيه ورم ظهر في المنطقة دي ، وبعد شوية لما الطفل بطٌل عياط الورم ده اختفى ، علطول تعرفي ان طفلك كده مصاب بالفتق الاربي

و هنا فى نقطة لازم ناخد بالنا منها ، و هى ان عياط الطفل نفسه ممكن يكون بسبب الفتق الاربى خصوصا لو الطفل بدأ فجأه يرجع ، او لاحظتى انه مش فى كامل انتباهه معاكى ، كل ده بيقول اننا لازم نلحق فورا نكشف على الطفل و نعالج الفتق الاربى قبل ما يدخل فى مرحلة اصعب من كده .  

قولنا من شويه ان الكولكيعه اللى بتظهر فى المنطقة الاربيه سببها ان الامعاء بتدخل و تطلع فى كيس الفتق ، و الخطوره هنا بتبدأ لو سيبنا كيس الفتق الاربي ده من غير اي علاج ، لان الفتق ده ممكن يحصله اختناق فى اى لحظه ،
واختناق الفتق الاربي معناه ان الامعاء اللي نزلت في كيس الفتق دي مش عارفة انها ترجع مرة تانية للبطن ، وده هيأثر على حاجتين :

1- اول حاجة هيأثر على الدوره الدموية للامعاء و مش هيوصلها دم ، وبعد 3 ساعات هنلاقي ان انسجة الامعاء دى بدأ يحصلها غرغرينه ، وده ممكن يخلينا نستأصل جزء منها 
2- الفتق المختنق ده هيأثر كمان علي الدوره الدموية للخصية او المبيض ، لانه هيضغط على الشرايين والاورده اللي بتغذيهم ، وده هيخلي الخصية او المبيض يحصلهم انكماش ، ولو ملحقناهمش قبل 6 ساعات هيحصلهم غرغرينا وضمور ، وده معناه ان الطفل لو ولد هيعيش بخصيه واحده ، ولو بنت هتعيش بمبيض واحد وده طبعا هيأثر عليهم لما يكبروا و يقلل فرصهم فى الانجاب ، ده غير ان اختناق الفتق الاربى اضراره مش بتقف عند ضمور الخصية او المبيض و استأصل جزء من الامعاء ، الفتق الاربى المختنق ممكن يهدد حياه الطفل نفسه لانه ممكن يعمله تسمم فى الدم ، 
هتعرفي معلومات اكتر عن الفتق الاربي المختنق لما تشوفي الفيديو دا

الحل اننا اول ما نعرف ان الطفل عنده فتق اربي لازم فورا نكشف عليه عند اقرب دكتور تخصصه جراحة اطفال ، و نبدأ فى ترتيبات العمليه ، لانها العلاج الوحيد للفتق الاربى

و قبل ما نبدء نقلق من كلمة عمليه و نقول ده الطفل لسه صغير معقول هيستحمل العمليه ، خلينى اطمنكم و اقولكم

- ان العمليه بسيطة جدا و مش بتاخد اكتر من نص ساعه
- و ان الطفل بيقدر يروح في نفس اليوم
- و ان الطفل خلال 10 ايام بالكتير بيرجع طبيعى جدا ولا كأنه عمل عمليه . 

و هنا خلينا نكون متفقين اننا نقدر نعالج الفتق الاربي بالجراحة العادية او بالمنظار لكن فى حالات قليله جدا بنفضل اننا نستخدم فيها المنظار الجراحي عن الجراحة العادية ، و الحالات دى هى :

1- ان الطفل يكون عنده فتق اربى مختنق ، و هنا المنظار بيساعدنا اننا نشوف الامعاء والشعيرات الدموية والاوردة اللي بتغذي الخصية او المبيض بشكل اوضح، و بكده نضمن اننا مش هنسبب اى ضرر للخصية او المبيض وقت العمليه
2- لو الطفل كان عنده فتق مرتجع ، وده معناه ان الطفل كان عنده فتق اربى و عمل عمليه قبل كده بس الفتق رجع تانى ،وقتها هيكون صعب اننا نعمل العمليه بالجراحة العادية ، لاننا ممكن نضر اوردة الخصية او الحبل المنوي او اوردة المبيض  

1- لازم الطفل يشرب سوايل كتير جدا بعد العمليه
2- لازم نبعد عن اننا نأكل الطفل اى حاجة بعد العمليه على طول لحد ما نطمن على حركة الامعاء
3- ولو الطفل بدأ يرجع او حصله نزيف مكان الجرح ، لازم نتواصل مع الدكتور
4- لو لاحظنا ان فى تورم فى كيس الصفن، ممكن اننا نعمل كمدات تلج ، عشان الالتهابات تقل و الورم يروح
5- لازم نهتم اننا نغير على الجرح و نعقمة
6- و نبعد عن ان الجرح يجى عليه مايه على الاقل لمده 3 ايام بعد العمليه

و فى النهايه خلينا نتفق ان الفتق الاربى من الاختلافات الخلقيه اللى مينفعش نسكت عليها ، و الطفل لو عمره كان يوم يقدر انه يستحمل العمليه و هيخرج منها بالسلامه ، لكن عمره ما هيقدر انه يستحمل ان الفتق الاربى يحصله اختناق ، عشان كده بلاش نتأخر و لازم ناخد خطوه الكشف و العلاج حالا عند اقرب دكتور جراحة اطفال