الاحليل السفلى عند الاطفال الذكور

 ده واحد من الاختلافات الخلقيه اللى بتحصل فى العضو الذكرى للطفل وهو لسه جنين فى رحم الأم ، و الاختلاف الخلقى ده بيكون السبب فى ان فتحة مجرى البول متكونش موجوده فى مكانها الطبيعى ، و اللى هو فى نص رأس العضو الذكرى ، وده بيأثر طبعا على شكل العضو الذكرى ، و بيأثر كمان على وظيفته و اللى هى :

• خروج البول من المثانه
• خروج الحيوانات المنويه وقت القذف لما الطفل يكبر  

احنا عندنا 4 اماكن ممكن تكون فتحة مجرى البول موجوده فيهم
• اما اننا بنلاقيها فى ​رأس العضو بس بتكون نازله لتحت شويه
• او بنلاقيها فى نص العضو الذكرى
• او ممكن اننا نلاقيها عند كيس الصفن
• و احيانا ممكن تكون عند فتحة الشرج  

فى البداية خلينا نتفق ان مفيش سبب محدد بيحصل بسببه الاحليل السفلى للطفل ، لكن خلينا نقول ان فى شويه عوامل هى اللى بتزود من فرص ان الطفل يتولد بالاحليل السفلى زى :
• ان الحمل يحصل و الام سنها اكبر من 35 سنه
• او ان الام تكون بتاخد ادويه هرمونيه ، او اتعرضت لاى تلوث او مبيدات حشرية فى فترة الحمل
• لو الاب كان عنده احليل سفلى ، ده بيزود من فرص ان الطفل يصاب بالاحليل السفلى
• و اخيرا لو الطفل اتولد قبل معاده  

فى 3 طرق ممكن نعرف بيها لو الطفل عنده احليل سفلى
• عن طريق سونار 4D ، و ده سونار بتعمله الام فى فترات معينه خلال فترة الحمل ، و بنقدر نعرف بيه لو الطفل كان عنده احليل سفلى ، و  مش بس كده احنا بنقدر كمان نعرف عمر الجنين بالظبط ، و وضع القلب عشان نتأكد ان الطفل معندهوش اى مشاكل فى القلب ، و حاجات تانيه كتير ممكن تعرفوها من اللينك ده "اهمية سونار الـ 4D فى فترة الحمل"
• تانى حاجة ممكن نعرف بيها لو الطفل عنده احليل سفلى ، وهى الفحص اللى بيعمله دكتور الاطفال وقت ولاده الطفل
• و اخيرا الام كمان تقدر انها تعرف ان طفلها عنده احليل سفلى ، و ده عن طريق شكل خروج البول وقت ما الطفل يكون بيعمل حمام ، لان البول هنا هيكون بيخرج اما لتحت زياده عن اللزوم او على الجنب وده مش الطبيعى ، ده غير ان الاحليل السفلى ممكن يسبب اعوجاج للعضو الذكرى  ، فكل دى حاجات تقدر الام تلاحظ منها ان الطفل عنده احليل سفلى  

هنا لازم نكشف على الطفل عند دكتور متخصص فى جراحات الاطفال ، عشان يحدد درجة الاحليل السفلى اللى عند الطفل و تعالوا نعرف حالا يعنى اى درجة الاحليل السفلي 
الاحليل السفلي ليه اكتر من درجة ، و اللى بيحدد الطفل مصاب بأى درجة من درجات الاحليل السفلى هو مكان فتحة مجرى البول  و هتكون موجوده فين فى العضو الذكرى و عشان نفهم الدرجات اكتر خلونا نقسمهم 3 درجات :

• الدرجه الاولي (الاحليل البسيط simple ) ، و فى الحاله دي فتحة مجرى البول بتكون قريبه من راس العضو الذكري بس نازله لتحت  شويه ، والنوع دا مش بياثر بشكل كبير على وظيفة العضو او شكله لانه مش بيسبب انحناء للعضو الذكرى ودي تعتبر من اسهل درجات الاحليل السفلي 
• الدرجه التانيه (الاحليل المتوسط middle ) وفى الحاله فتحة مجري البول بتكون موجوده فى نص العضو الذكرى و الدرجة دى بتأثر على وظيفة العضو الذكرى سواء في التبول او فى قذف السائل المنوى ، وده غير انها ممكن تسبب اعوجاج فى العضو الذكرى ، وبكده هتكون بتأثر على شكله كمان
• و اخيرا الدرجه التالته (الاحليل المعقد complex ) ، و فى الحالة دى فتحة مجرى البول بتكون اما عند الخصية او فتحة الشرج ، والدرجة دي من اصعب درجات الاحليل السفلى لانها بتأثر بشكل كبير على وظيفة العضو وشكله 

و هنا خلينا نعرف معلومه ان 90 % من الاطفال بيكون عندهم الدرجة الاولى و التانيه من الاحليل السفلى ، و 10 % بس من الاطفال بيكون الاحليل السفلى اللى عندهم من الدرجة التالته

و هنا بقى فى معلومة مهمه جدا لازم كل ام تاخد بالها منها ، و هى ان الطفل اللى عنده احليل سفلى ممنوع نعمله عمليه الختان قبل ما نعالج الاحليل السفلى و هنعرف ليه ممنوع نطاهر الطفل و احنا بنتكلم عن ازاى بنعالج الاحليل السفلى

الاحليل السفلي علاجه الوحيد هو العمليه ، و خلينى اقولكم قبل ما تقلقوا ان عمليه الاحليل السفلى مفيهاش اى خطوره على الطفل ، لو اتعملت صح و كانت مع دكتور متخصص فى جراحات الاطفال ، وده لان عمليه الاحليل السفلى من العمليات اللى ملهاش خطوات ثابته كل عمليه بتتعمل على حسب حالة الطفل و على حسب درجة الاحليل ،

بمعنى اننا لو بنعمل العمليه لطفل عنده احليل سفلي من الدرجة الاولى و اللى قولنا انها من ابسط درجات الاحليل ، فكل اللى بنحتاج نعمله هنا اننا بس نصلح أنسجة مجري البول ، و نخلى فتحة مجرى البول فى مكانها الطبيعى ، و هنا و احنا بنعمل عمليه الاحليل السفلى بنعمل كمان عملية الختان عشان ناخد جلده الطهارة و نستخدمها فى تصليح مجرى البول ، و ده السبب اللى خلانا نقول ان اى طفل عنده احليل سفلى ممنوع انه يتطاهر قبل عمليه الاحليل ، لان ده لو حصل هنضطر وقتها اننا ناخد الجلد اللى بنحتاجة فى تصليح مجرى البول من مكان تانى فى جسم الطفل زى الشفه ،

اما لو الطفل اللى هيعمل العمليه كان عنده احليل سفلى من الدرجة التانيه ، و كان معاه كمان اعوجاج فى العضو الذكرى ، فهنا ممكن نحتاج اننا نعمل العمليه على مرحلتين ،و بنبدأ المرحلة الاولى بتصلح أنسجة مجري البول ، اما المرحلة التانيه فدى اللى بنفرد فيها العضو الذكرى عشان نرجعه للشكل الطبيعى و هنا هنعمل عمليه الختان و نستخدم جلده الطهاره فى ترقيع الجلد بعد فرد العضو الذكرى

و اخيرا لو الاحليل السفلى كان من الدرجة التالته : العمليه هنا ممكن تتعمل على مرحلتين او تلاته لان غير ان فتحة مجرى البول بتكون بعيده جدا عن مكانها الطبيعى ، و مجرى البول مش بيكون متخلق ، بيكون كمان فى اعوجاج شديد جدا فى العضو الذكرى .

و هنا لازم
• نبدأ العمليه فى المرحلة الاولى ، بأننا نفرد العضو الذكرى الاول و نعمل للطفل عمليه الختان و نستخدم جلده الطهاره فى ترقيع العضو الذكرى .
• و بعد كده بنعمل المرحله التانيه ، و اللى بنصلح فيها مجرى البول.
• اما المرحلة التالتة و الاخيره فدى بنفصل فيها مجرى البول عن كيس الصفن . 

خلونا نبدأ الاول بالاضرار اللى ممكن تحصل للطفل لو معملش العمليه ، و هنقسمها 3 انواع
• اضرار نفسيه : و دى هيبدأ يحس بيها الطفل لما يكبر و يبدأ يدرك
• شكل عضوه الذكرى ، فهيكون دايما حاسس ان فى حاجة غلط فى العضو الذكرى بسبب الانحناء اللى هيكون فى العضو ، و هيبدأ يحس انه مختلف عن باقى الاولاد اللى فى سنه
• هيبدأ كمان يحس بالمشكله اللى عنده وقت دخول الحمام ، لان بسبب ان فتحة مجرى البول مش فى مكانها ده هيخليه مش قادر انه يوجة البول و ينزله وهو واقف بشكل طبيعى و هيجى على هدومة ، و ده هيسببله احراج
• اضرار دينيه : ودى هتحصل بسبب البول اللى هيجى على الهدوم هيسبب عدم الطهاره
• اضرار صحيه : الاحليل السفلى هيخلى الطفل لما يكبر يكون عنده مشاكل فى الانجاب و فى القدره الجنسية ، لانه هيسبب
• تأخر فى الانجاب ، لان عشان يحصل حمل لازم السائل المنوى يتقذف جوا المهبل ، و هنا ده مش هيحصل لان السائل المنوى مش هيكون بيخرج بشكل طبيعى .
• ده غير ان ممارسه العلاقة الزوجيه نفسها هتكون مؤلمة ليه و لزوجته بسبب الانحناء اللى فى العضو الذكرى فهيكون فى صعوبه فى ايلاج العضو الذكرى ف المهبل . 

الطفل يكون عمره 6 شهور ، و قبل ما يعدى 8 شهور ، وده لان
• قبل سن 6 شهور العضو الذكرى بيكون حجمه صغير وهيكون صعب اننا نعمل بالدقة دى فى الوقت ده
• احساس الطفل فى الوقت ده بالالم بيكون اقل من الطفل اللى اكبر فى السن
• ده غير ان حركة الطفل فى الوقت ده بتكون اقل ، فده هيسهل على الام انها تهتم بيه
• و كمان احنا بعد العمليه بنحتاج اننا نركب للطفل قسطره عشان البول يخرج منها و هنا لو الطفل اكبر شويه ممكن يحاول انه يخلعها ، وده مش صح
• و اخيرا الطفل فى السن ده مش بيكون مدرك ولا للمشكله اللى عنده و لا انه داخل يعمل عمليه فبكده مش هيكون فى اى ضرر نفسى على الطفل  

• لازم اللى يخدر الطفل يكون دكتور تخدير الاطفال .
• الدكتور اللى هيعمل العمليه لازم يكون جراح اطفال ، و عنده كمان خبره كبيره فى عمليات الاحليل السفلى ، لاننا قولنا من شويه ان كل درجة و كل حالة بيكون ليها خطوات معينه فى العمليه
• لازم الدكتور كمان يكون عارف ان فتحه مجرى البول بيكون ليها قطر معين ، لان لو الفتحة كانت ضيقة البول ساعتها مش بيخرج بشكل طبيعى ، و علشان كده بيفضل يضغط على المكان الأضعف فى العضو الذكرى عشان يلاقى مكان يخرج منه ، و ده ممكن يكون السبب فى ان فتحة الاحليل السفلى اللى اتعالجت تتفتح تانى ، وده هيكون السبب في ان الطل يحصله ناسور 
• الخيوط اللى هنستخدمها لازم تكون بمواصفات معينه ، و الجرح نفسه يكون متخيط كويس ، لان ده لو محصلش الطفل بعد العمليه ممكن يحصله ناسور
لو اهتمينا بكل اللى قولناه ده فى العمليه ، تقدرى تطمنى ان العمليه هتكون بسيطة و هتعدى من غير اى مضاعفات انشاء الله  

- بعد العمليه الدكتور بيعمل كام حاجه مهمه و اولها انه بيلف العضو بشاش بيتشال بعد العمليه ب 4 ايام
-  وبنحتاج اننا نركب للطلفل قسطره بولية عشان يتجمع فيها البول وميلمسش الجرح , و بنشلها بعد  7 او 10 ايام بالكتير .
- بعد ما بنشيل القسطرة بنبدء اننا نحط كريمات ​عشان نقلل قلل الورم اللي بيكون فى العضو ، و ده على فكره طبيعى انه يحصل بعد العملية .
- و كمان طبيعى جدا ان خلال اول شهر من العمليه تكون طريقة التبول لسه مش طبيعية شويه  (يعني ممكن نلاقى ان البول بيخرج بميل على الجانبين أو بطرطشه ) ودا مفيش منه أى قلق , وده هيروح بعد ما الورم يروح , وهتكون كل حاجه طبيعية والعضو مفرود وانتصابه فى المستقبل هيكون طبيعي جداً .