اي هي القيلة المائية عند الأطفال وحديثي الولادة ؟

القيلة المائية من الإختلافات الخلقية اللي بتحصل بشكل كبير بين الأطفال حديثي الولادة ,ولما الأم تلاحظ ان في ورم في الخصية او كيس الصفن عند طفلها بتتخض وبتدور علي السبب وعلي العلاج , لأنها بتكون قلقانه ان دي ممكن تكون حاجه خطيرة علي طفلها

فتعالي أقولك ليه ممكن يحصل تورم في الخصية او في كيس الصفن عند طفلك , ويعني اي قيلة مائية :

القيلة المائية هي عبارة عن تجمع سوائل حوالين الخصية داخل كيس الصفن , ودا بيخلي كيس الصفن يبان منتفخ ومورم وأكبر من الطبيعي , ( والورم ده بيكون شبه البالونه)  

قبل ما نعر ف بتحصل ليه خلونا نعرف الخصيه فى الأطفال الذكور بتنزل ازاى وأمتي ؟

فى التلت الأخير من الحمل الخصيه بتنزل من تجويف البطن لكيس الصفن من خلال قناه اسمها القناه الإربيه ( دى بتكون شبه الممر او الأنبوبه ) و فى الوضع الطبيعى بعد ما الخصيه بتنزل لكيس الصفن فتحة القناه الإربيه بتتقفل لوحدها
بس ساعات الفتحة دي مبتتقفلش وبتفضل مفتوحة طب اي هيحصل لو فتحة القناه الإربيه فضلت مفتوحة ، فى الحاله دى ممكن يحصل حاجه من الأتنين : 

• قيلة مائية  
  
• او فتق إربي   

طبعا اللى يقدر يفرق بينهم هو جراح أطفال متخصص من خلال الفحص الإكلينيكى فى العياده , و فى بعض الأحيان بنحتاج نلجأ للسونار علشان نتأكد ده فتق إربى ولا قيله مائيه
لأننا بنعرف من خلال السونار حجم فتحه مدخل القناه الإربية , فلو كانت فتحة مدخل القناه الاربية اكترمن 4 ملي يبقى اللى عند الطفل دا فتق إربى
لكن لو فتحة القناة الإربية أقل من 4 ملي فالطفل هيكون عنده قيلة مائية

و علشان نعرف اكتر عن الفرق بين الفتق الإربى و القيله المائيه ، تعالوا نسمع الفيديو ده سوا

لكن في أعراض ممكن تعرفي منها ان طفلك عنده قيلة مائية زي :  

1. تورم في كيس الصفن
2. التورم بيظهر بالنهار وبيختفي والطفل نايم ومرتاح
   
3. القيلة المائية بتظهر وتختفي ببطئ
   
4. لونها بيكون مايل للازرق
   
5. مش مؤلمة ومفيش منها خطر  
   

والقيلة المائية ليها أكتر من نوع :  

قيلة مائية غير متصلة  : في النوع دا بيكون الكيس اللى موجود فى كيس الصفن مليان مياه بس مفيش اتصال بينه و بين البطن علشان مدخل القناه الإربيه اتقفلت

قيلة مائية متصلة : و هنا بيكون فى اتصال مابين البطن و كيس الصفن , فهنلاقى نسبه التورم طول اليوم زايده , و بيبتدى يختفى اول ما الطفل ينام ( لان جسمه بيكون مفرود ف السائل بيبدأ يرجع للبطن تانى لأن فى اتصال بين تجويف البطن و كيس الصفن

و بالنسبة لعلاج القيله المائيه لازم نستني عليه سنه او سنه و نص لأن فى اغلب الاوقات فتحة القناه الإربيه بتقفل بعد فتره
و الجسم بيمتص السوائل دى و مش بنحتاج نعمل للطفل عملية , بس حاجة مهمه هنا لازم كل ام تبقى عارفاها و هى ان في حالتين لازم نعمل فيهم للطفل العملية بدري وهما: 

1. لو ظهر فتق إربي مع القيلة المائية هنا الدكتور لازم يعمل جراحة فورية وده عشان يعالج الفتق الإربي في الاول ويشيل معاه القيلة المائية . 
   
2. لو القيلة المائية بتزيد بشكل مستمر وسريع , وبدأت تضغط على الخصيتين ساعتها الدكتور بيشوف مقاسات الخصية لو طلعت فعلا متأثرة بسبب القيلة بيعمل عملية ويشيلها. 

القيلة المائية مش من الإختلافات الخلقية الخطيرة لكن اهمالها ممكن يحولها لمرض خطير فلازم تتابعي مع دكتور متخصص في جراحة الأطفال وتعرفي حالة القيلة المائية وانسب علاج ليها .