القيلة المائية عند الأطفال 

القيله المائيه أو مايه علي الخصيه  كل دى اسماء لواحده من اشهر الاختلافات الخلقيه اللى ممكن تحصل للاطفال الذكور 

القيله المائية بأختصار هى عباره عن مايه بتتجمع على خصيه الطفل ، و ممكن القيلة المائيه تيجى للطفل على الخصيه اليمين او الشمال ، او ممكن تيجى على الناحيتين 

عشان نفهم كويس ليه المايه دى ممكن تتجمع على الخصية ، خلونا نرجع لورا شويه للطفل و هو لسه جنين فى بطن الام ، لان من هنا هنفهم ليه القيله المائيه ممكن تحصل للطفل

الخصيه ربنا بيخلقها و الجنين بيتكون فى بطن الام و بيكون مكانها فى البطن بالتحديد ورا الكلى ، و فى اخر شهور الحمل بتبدأ الخصية تتحرك من البطن و تنزل لكيس الصفن عن طريق قناه اسمها القناه الاربية ، و القناه دى بتكون موجوده فى البطن و بتوصل لحد كيس الصفن ،

و لما الخصيه بتنزل لكيس الصفن القناه الاربيه دى بتبدأ انها تتقفل لانها كده خلاص قامت بدورها اللى ربنا خلقها علشانه و هو نزول الخصيتين لكيس الصفن ،

لكن فى بعض الاطفال القناه دى مش بتتقل و بتفضل مفتوحة بعد نزول الخصيتين ، و احنا قولنا ان القناه الاربية دى بتكون موجوده فى البطن و واصله لكيس الصفن ، و البطن بيكون فيها سوائل و مايه و بتبدأ انها تنزل من فتحة القناه الاربيه لكيس الصفن ، و ده اللى بيسبب للطفل قيله مائيه

 هنا لازم كل ام تلاحظ حجم الخصية ، و تشوف هل الخصية حجمها اكبر من الطبيعى ، او هل فى خصية اكبر من التانية ، او لو في ورم فى المنطقة الاربيه 
و لو لقينا اى حاجة من الحاجات دى موجوده فى الطفل لازم نكشف على الطفل فى اسرع وقت عند دكتور جراحة اطفال ، و اللى هيطلب اننا نعمل سونار عشان نحدد قطر فتحه القناه الاربيه و نشوف هل الطفل عنده قيله مائيه و لا فتق اربى ، لان كل اختلاف خلقى من دول ليه طريقة علاج مختلفه عن التانيه 

القيله المائيه فى اغلب الحالات مش بنبدأ اننا نعالجها اول ما نكتشفها فى الطفل ، احنا بنستنى شويه لحد ما يوصل عمر الطفل لسنه ونص ، و السبب فى ده ان القيله المائيه دى ممكن تروح لوحدها  

لكن لو فضلت القيله المائيه موجوده على الخصيه لبعد سن السنه ونص وقتها لازم يكون فى تدخل جراحى وهنا على الاغلب الطفل هيكون عنده مع القيله المائيه فتق اربى ، فلازم الاول نبدأ العمليه بأننا نعالج الفتق الاربى ، و بعدين نقفل القناه الاربيه و بعد كده نعالج القيله المائيه و كل ده بيحصل فى عمليه واحده

لكن فى حالات تانيه بيكون لازم نعمل فيها عمليه القيله المائيه فى اسرع وقت و الحالات دى هى :  

- لو لاقينا ان القيله المائيه موجوده على جنبين الخصية اليمين و الشمال و إن حجم الخصيتين بقي اكبر من الطبيعى ، لان المايه فى الحاله دى بتكون ضاغطة على الخصيه بشكل كبير ، وده ممكن يضرها و يكون السبب فى ضمور الخصية .
- لو لقينا ان الطفل عنده قيله مائية و فتق اربى ، هنا لازم نعمل العمليه فورا لان الفتق الاربى ده يعتبر من طوارئ جراحات الاطفال ، لان ممكن يحصله اختناق فى اى وقت و ده ممكن يعرض الطفل لاضرار كبيره جدا ممكن لاقدر الله تأثر على حياته . 
وهتعرفي معلومات اكتر عن القيلة الماية عند طفلك من الفيديو دا

فى البدايه الطفل لازم يكون واخد بنج كلى و ده مفيش منه اى قلق خالص على الطفل ، و اللى بيقوم بيه لازم يكون دكتور تخدير اطفال

و بعدها بنبدأ اننا نقفل فتحة القناه الاربيه ، و بنوصل للكيس اللى فى المايه و نشيله و بعدها بنقفل الجرح اللى فتحناه بخيط تجميلى عشان مايبنش ليه اى اثر بعد الجرح ما يلتئم

و هنا فى نقطه لازم نعرفها اننا مينفعش نعمل سحب للمايه اللى بتكون موجوده على الخصيه بالسرنجة ، لانها  

1. - بالطريقة دى هترجع تانى ، لاننا كده مش بنعالج المشكله الاساسيه اللى كانت السبب فى ان المايه دى تتجمع على الخصية من الاول و هى ان القناه الاربيه مفتوحة ، فكده المايه دى بعد ما هنسحبها هترجع تانى ،
2. - دة غير ان سن الابرة ممكن يدخل فى اى شريان من الشراين اللى بتغذى الخصية ، وده هيسبب ضرر كبير للخصية ، و بدل ما نكون بنعالج مشكله بسيطة زى القيله المائه هنكون سببنا للطفل اضرار تانيه اكبر بكتير  
   

1- لازم الام  تدى للطفل كل الادويه بأنتظام
2- و تهتم كمان بالتغير على الجرح و تطهيره
3- نحاول نبعد عن ان الجرح يجى عليه مايه على الاقل اول يومين بعد العمليه
4- و لازم كمان نهتم ان الطفل يكون بيشرب سوائل كتير

لو عايزه تعرفى اي الفرق بين القيلة المائية والفتق الاربي عند الاطفال تقدري تشوفي الفيديو دا :