الفرق بين الفتق الإربى و القيله المائية عند الأطفال

هو كل ورم او انتفاخ بنلاحظه عند أطفالنا اول م يتولدوا بيكون خطير و محتاج عمليه؟
فى الحقيقه لا , و علشان فى أهالى كتير بتتلغبط و بتكون مش عارفه الورم ده خطير ولا لا , فى مقال النهارده هنتكلم عن الفرق بين حاجتين بيلغبطوا أهالى كتير اوى, و هما القيله المائيه و الفتق الإربى , و نعرف مين فيهم اللى خطير و محتاج عمليه
و مين فيهم اللى ملوش خطوره على الطفل

و خلونا نبدا كلامنا بالقيله المائيه 

و يعنى ايه قيله مائيه اصلا؟

هو عباره عن ورم شبه البالونه فيه كميه من السوائل متجمعه فى كيس الصفن و بالتحديد حوالين الخصيه

طيب بعد م عرفنا ابه هى القيله المائيه 

لازم نعرف هى ليه القيله المائيه بتحصل؟

القيله المائيه بتحصل فى الأطفال الذكور ,علشان مدخل القناه الإربيه بيفضل مفتوح بعد م الخصيه بتنزل فى كيس الصفن فى التلت الأخير من الحمل من خلال ممر او انبوبه اسمها القناه الإربيه

طيب الفتق الإربى ده عباره عن ايه؟

ده بيكون عباره عن ان جزء من الأمعاء بينزل فى القناه الإربيه , بسبب فتحه مدخل القناه الإربيه بيفضل مفتوح بعد م الخصيه بتنزل من البطن لكيس الصفن

طبعا كده حصل لغبطه عند كتير من الأهالى لأننا بنتكلم على عيبين خلقيين موجودين فى نفس المنطقه( المنطقه الإربيه)
و الإتنين بيكون من أعراضهم ان فى ورم فى المنطقه دى, ف هنفرق بينهم إزاى؟
فى الحقيقه اللى يقدر يفرق إذا كان ده قيله مائيه ولا فتق إربى هو جراح أطفال متخصص , وده من خلال الفحص الإكلنيكى اللى بيفحصه للطفل فى العياده

طيب و فى حاله ان مكانش باين بالفحص الإكلنيكى ده فتق إربى ولا قيله مائيه ( مع إن دى حاجه نادره الحدوث)
ساعتها بنلجأ إننا نعمل سونار للطفل ,علشان نعرف الفتحه اللى موجوده فى مدخل القناه الإربيه أكبر ولا أقل من 4مم

لو الفتحه طلعت اكتر من 4مم يبقى ده فتق إربى
لو الفتحه طلعت أقل من 4 مم يبقى قيله مائيه 

بعد م عرفنا إزاى نفرق ده فتق إربى ولا قيله مائيه, تعالوا نعرف مع بعض علاج كل إختلاف خلقى فيهم ايه:

و خلونا نبدأ بالفتق الإربى:

الفتق الإربى ملوش غير علاج واحد بس, و هو إننا نعمله عمليه , علشان نربط كيس الفتق و نستأصله
قبل م الفتق يحصله حاجه اسمها إختناق ( و ده معناه ان جزء من الأمعاء يتحشر جوه القناه الإربيه و فى الحاله دى ممكن نضطر نستأصل جزء من الأمعاء علشان نعالجه)
و عمليه الفتق الإربى لازم نعملها بمجرد م الطفل يتشخص ان عنده فتق إربى لأننا مش بنكون عارفين الإختناق ده ممكن يحصل امتى

بعد م عرفنا علاج الفتق الإربى ايه, تعالوا نعرف مع بعض علاج القيله المائيه:
فى اغلب الأحيان القيله المائيه بتختفى لوحدها بعد سنه او سنه ونص من عمر الطفل ..لو مختفتش بنعملها عمليه بسيطه ...علشان نقفل مدخل القناه الإربيه و نستأصل كيس المياه
و علشان نفهم الفرق اكتر بين الفتق الإربى و القيله المائيه تعالوا نسمع الفيديو ده مع بعض:  

وسواء طفلك عنده قيلة مائية او فتق اربي لازم تروحي لدكتور جراحة اطفال وهو يشخص طفلك عنده اي بالظبط واي العلاج المناسب له