ازاى نعرف ان الطفل عنده قيله مائيه

كتير مننا اول م بيلاحظ اى ورم فى جسم طفله بيبدأ يقلق و يبقى عايز يطمن طفله عنده ايه
و ده طبيعى ان أى اب و أم يكونوا عايزين يطمنوا على طفلهم

و الورم اللى نقصده فى مقال النهارده هو القيله المائيه :
و القيله المائيه دى بتكون عباره عن ورم او انتفاخ بيكون موجود فى المنطقه الإربيه و بالتحديد حوالين الخصيه ، و قولنا ان المنطقه الإربيه دى بتكون اسفل البطن و أعلى الفخد 

طيب ليه القيله المائيه بتحصل للأطفال؟

القيله المائيه بتحصل بسبب ان مدخل القناه الإربيه متقفلش بعد م الخصيتين نزلوا من البطن لكيس الصفن فى أخر شهور الحمل
فبالتالى لما مدخل القناه الإربيه متقفلش ده خلى شويه من السوائل اللى موجوده فى البطن تنزل حوالين الخصيه على شكل ورم او كولكيعه

و يجى هنا سؤال مهم و هو ، إزاى أعرف ان ابنى عنده قيله مائيه؟ 

• –
  اول حاجه الأم هتلاحظ ان حجم الخصيتين مش زى بعض
• –
  و تانى حاجه الأم هتلاحظها ان فى ورم او كولكيعه حوالين الخصيه

طيب المفروض نعمل ايه أول م نلاحظ الورم ده عند الطفل ؟
لازم ناخد البيبى نفحصه عند جراح أطفال متخصص ، علشان يقولنا اللى عند الطفل ده فتق إربى ولا قيله مائيه
لأن كل واحد فيهم طريقه علاجه مختلفه عن التانيه
و لو عايزين تعرفوا الفرق بين الفتق الإربى و القيله المائيه تعالوا نسمع الفيديو ده مع بعض :

طيب بعد م اتأكدنا ان اللى عند الطفل ده قيله مائيه ، هنعمل ايه ؟
فى العادى القيله المائيه مش بنبدأ نعالجها غير بعد سنه و نص او سنتين من عمر الطفل، لأنها بنسبه كبيره بتروح لوحدها من غير عمليات
و علشان نعرف أكتر عن القيله المائيه تعالوا نسمع الفيديو ده مع بعض: 

متترددوش تسألوا عن أى حاجه تخص أطفالكوا
ربنا يحمى كل أطفالكوا