استئصال المراره عند الأطفال

دايما بنسمع ان فى ناس بتعمل عمليه و بتشيل المراره ، لكن ايه موضوع ان كمان فى ممكن يعمل عمليه و تشيل المراره
وعلشان كده فى مقال النهارده هنتكلم أكتر عن استئصال المراره عند الأطفال
بالعربية :

يعني إيه مرارة؟ وإيه وظيفتها؟

المرارة دي عضو صغير شبه الكيس، موجود تحت الكبد في الجنب اليمين من البطن. وظيفتها إنها تخزن عصارة بيسموها العصاره الصفرا، ودي بتساعد الجسم على هضم الدهون اللي بناكلها. يعني لو الطفل أكل حاجة دهنية، المرارة تطلع العصارة دي علشان تسهل الهضم

و بعد ماعرفنا ايه المراره دى و ايه وظيفتها تعالوا نعرف 

ليه ممكن نضطر نشيل المرارة؟

أوقات بيحصل مشاكل في المرارة،وده ممكن يخلينا نلجأ لاستئصالها، زي: 

• تكون حصوات فيها ، و ده ممكن يحصل بسبب حاجات كتير زى :

- ان حد من أهل الطفل يكون عنده مشاكل فى المراره فتتنقل للطفل بالوراثه
- او لو الطفل كان عنده اى مرض من أمراض الدم
- و لو جسم الطفل كان عنده قابليه تكوين الحصوات ده ممكن يخلينا نضطر نشيل المراره

• التهاب في المرارة.
• المرارة ما تشتغلش كويس وتسبب ألم وتعب للطفل.

و دلوقتى بعد ماعرفنا ايه الأسباب اللى ممكن تخلينا نستأصل المراره ، تعالوا نعرف :

إزاي نعرف إن الطفل محتاج يشيل المرارة؟

فيه شوية أعراض ممكن تبان على الطفل وتخلينا نشك إن فيه مشكلة عنده في المرارة، زي:

• وجع جامد أو متكرر في البطن، خصوصًا من ناحية اليمين تحت الضلوع.
• انتفاخ فى البطن بصوره مستمره و بالذات بعد الأكل
• ترجيع ودوخة بشكل مستمر
• فقدان في الشهية و الوزن
• ارتفاع في الحرارة.
• و ممكن نلاقى وش الطفل لونه أصفر بشكل ملحوظ
• لون البول غامق أو البراز فاتح

لو الأعراض دي ظهرت على الطفل لازم نفحصه فورا عند جراح أطفال علشان نعرف منه ايه الأشعه و التحاليل المطلوبه للطفل زى :

- صوره و تحاليل دم
- او السونار

خلينا نوضح معلومه مهمه وهي ان تشخيص المراره عند الأطفال مش سهل زى الكبار و لازم اللى يعمل السونار يكون حد متخصص علشان فى حاجات ممكن تبان نها حصوات و هى مش حصوات
و الطفل بيكون عنده شويه جفاف ، و فى الحاله دى شكل المراره ممكن يبان ان فيها حصوات ، لكن هى مبيكونش فيها حاجه
علشان كده بنقول ان لازم حد متخصص هو اللى يعمل السونار ، و فى بعض الحالات ساعات بنضطر اننا نعرض الطفل على دكتور كبد أطفال
و بعد ماعرفنا ايه الفحوصات اللى ممكن الدكتور يطلبها ، تعالوا نعرف 

و عندنا طريقتين نقدر نعمل بيهم العمليه :

بالجراحة التقليدية: ودي بتبقى عن طريق فتحة كبيرة شوية في البطن، ونادرا ما بنستخدم الجراحه التقليديه دلوقتى
بالمنظار الجراحي ودي الطريقه اللى بنستخدمها بصوره كبيره دلوقتى

• من خلال 3 أو 4 فتحات صغيرة.
• بندخل كاميرا وأدوات صغيرة ونشيل كيس المراره من غير ما نضر الأنسجه اللى حوالين المراره ، و علشان نضمن ان ده يحصل بأفضل طريقه لازم اللى يعمل العمليه يكون جراح أطفال متخصص
• الميزة إنها بسيطة والطفل بيرجع لحياته بسرعة.

هل العملية ليها مضاعفات؟

زي أي عملية جراحية، ممكن يحصل شوية مضاعفات، بس غالبا بتكون بسيطة، زي:

• وجع أو انتفاخ في البطن شوية.
• احتمال يحصل عدوى في الجرح.
• نزيف بسيط.
• مشاكل في الهضم أول كام أسبوع، زي إسهال أو إحساس بعدم راحة بعد الأكل.

طيب لو ماعملناش العمليه ، ايه المشاكل اللى ممكن تحصل للطفل؟

لو سِبنا المشكلة من غير علاج:

• ممكن يدخل في نوبات وجع جامدة متكررة.الطفل
• يحصل التهاب شديد أو المرارة تنفجر (وده خطر جدا)
• يحصل انسداد في القنوات الصفراوية، وده ممكن يأثر على الكبد.
• مشاكل في الأكل والهضم، وتعب عام.

علشان كده دايما بننصح كل أب و أم اول مايلاحظوا حاجه غريبه على طفلهم يفحصوه عند جراح أطفال متخصص فورا علشان يقولنا ايه الإجراء المناسب اللى ناخده مع الطفل
ربنا يحمى و يحفظ كل أطفالكوا