هل عملية الفتق الاربي عند الأطفال تؤثر على الإنجاب ؟

زى ما اتكلمنا قبل كده وقولنا ان الفتق الإربي من الاختلافات الخلقية اللى لازم نعملها عملية فورا اول ما الطفل يتشخص ان عنده فتق إربي ، لأن اى تأخير فى عمليه الفتق الإربى ممكن يأثر على حياه الطفل
بس للأسف فى كتير من الأهالى أول م تعرف ان علاج الفتق الإربى عمليه ، بتخاف تعملها لأنهم سمعوا انها بتأثر مستقبل طفلهم فى الإنجاب

و فى الحقيقه فعلا عمليه الفتق الإربى ممكن تأثر على القدره الإنجابيه ، و قبل م نقول إزاى ده ممكن يحصل
تعالوا نفتكر مع بعض بسرعه الفتق الإربى ده كان عباره عن ايه :
الفتق الإربى ده عباره عن ان جزء من الأمعاء بينزل فى القناه الإربيه بسبب ان فتحه مدخل القناه الإربيه فضلت مفتوحه لأكتر من 4 مم بعد م الخصيه نزلت من تجويف البطن لكيس الصفن

و لو عايزين تعرفوا معلومات اكتر عن الفتق الإربى تعالوا نسمع الفيديو ده مع بعض : 

بعد ما عرفنا الفتق الإربى ده عباره عن ايه ، و ليه بيحصل
تعالوا نعرف ليه عمليه الفتق الإربى ممكن تأثر على القدره الإنجابيه للطفل لما يكبر ، لو اللى عمل العمليه مكانش جراح أطفال متخصص :

• –
  اول حاجه ،لأن فى عمليه الفتق الإربى إحنا بنربط كيس الفتق علشان ميرجعش تانى
  و كيس الفتق ده بيكون موجود جنب الشعيرات الدمويه اللى بتغذى الخصيه ، و الحبل المنوى
  فلو اللى بيعمل العمليه مش جراح أطفال متخصص ، ممكن يصيب الشعيرات الدمويه و الحبل المنوى ، و فى الحاله دى الخصيه ممكن يحصلها ضمور و متقدرش تقوم بدورها اللى هو :  
  

• إنتاج الحيوانات المنويه
• إنتاج هرمون التستوستيرون

• –
  تانى حاجه ممكن تحصل لو اللى بيعمل عمليه الفتق الإربى مش جراح اطفال متخصص، ممكن يصيب الحبل المنوى للطفل
  و ده هيسبب للطفل مشكله فى الإنجاب لما يكبر اسمها انسداد خروج السائل المنوى من الخصيه
  و السائل المنوى ده بيكون فيه الحيوانات المنويه اللى بتكون مسئوله عن إنها تخصب البويضه فى عنق الرحم علشان يحصل حمل
  

و تعالوا نسمع تفاصيل اكتر عن عمليه الفتق الإربى مع بعض فى الفيديو ده :

علشان كده دايما بنقول ان اللى لازم يعمل عمليه الفتق الإربى للأطفال يكون جراح أطفال متمرس ، و عمل عمليات كتير للفتق الإربى
لأنه بيكون دقيق جدا فى العمليه

و فى النهايه خلينا نقول ان عمليه الفتق الإربى مش عمليه صعبه او فيها خطوره على الطفل ، لكن هى عمليه بتحتاج دقه عاليه جدا علشان متأثرش على القدره الإنجابيه للطفل

ربنا يحمى و يحفظ كل أطفالكوا