مخاطر طهارة الأطفال الذكور بمقص العضم

طبعا كلنا عارفين ان الطهاره تعتبر اول جراحه الطفل بيعملها فى حياته,علشان كده بنكون مهتمين اننا نعملها بأحسن و أأمن طريقه تحافظ عليه , بس مينفعش و احنا بنفكر ازاى نحافظ عليه و على صحته , نكتشف ان لسه فى ناس عايزة تطاهر اطفالها بمقص العضم
علشان كده فى مقال النهارده , هنتكلم عن خطوره مقص العضم و ليه مينفعش نطاهر بيه البيبى

و خلونا قبل ما نتكلم عن اضرار مقص العضم, خلونا نوضح للأمهات اللى ربنا لسه رازقهم ب بيبى ولد جديد إحنا ليه اصلا بنطاهر الأطفال الولاد
فى الحقيقه فى ديانات كتير و ثقافات كتير بتتكلم عن أهمية الختان , لكن دلوقتى احنا هنقول أهمية الختان للأطفال الذكور من الناحية الطبية 

1. اول حاجه علشان على الطفل نظافه العضو الذكرى
2. و بيحميه من خطر انه يتصاب بأى امراض جنسيه معديه
3. و علشان يدى للعضو شكل جمالى , يزود ثقه الولد بنفسه لما يكبر
4. و يقلل خطر ان الطفل يتصاب ب إلتهابات المسالك البوليه

كل دى فوائد الختان, تخيلوا بقى اننا ممكن نحرم الطفل من كل الفوايد دى لو طاهرناه باستخدام طريقه غلط , زى مقص العضم, و مش بس كده ده إحنا ممكن نعمل للطفل إختلافات خلقية مكتسبه مكانش مولود بيها اصلا: 

1. زى الإحليل السفلى المكتسب ... و ده بيحصل لو اللى بيستخدم مقص العضم مش متمرس فى استخدامه ممكن يقص جزء من رأس العضو الذكرى للطفل و يعمل فتحه تانيه لمجرى البول , و ده بيخلى طفلك عنده فتحتين فى البول مش فتحه واحده...   

• طبعا ساعتها الشكل الجمالى للعضو هيكون حصل فيه تشوه و ده هيأثر على نفسيه طفلك
• و ممكن تعمله مشاكل جنسيه تفقده قدرته الجنسيه و ميقدرش يخلف لما يكبر لأن الإحليل بيأثر على عمليه الإنتصاب
  
  و الإحليل السفلى ده بنحتاج نعمله عمليه علشان نعالجه...و مش بس كده علشان نعالج الإحليل بنحتاج جلده الطهاره اللى اتقصت دى...يعنى مقص العضم عملنا كده مشكلتين مش مشكله واحده 
  

2- تانى حاجه ممكن يسببها مقص العضم لو اللى بيستخدمه مش متمرس ، هو انه ممكن يقص جلد أقل من المطلوب ، و فى الحاله دى الطفل هيبان انه مطاهرش و ساعتها ممكن نحتاج نعمل للطفل إعاده طهاره  

3- لو اللى بيستخدم مقص العضم مش متمكن منه ممكن يقطع راس العضو, و يحصل فيه غرغرينا و ساعتها ممكن نضطر نبتر العضو الذكرى كله , و ده هيدمر مستقبل و نفسيه الطفل , لأنه مش هيقدر يمارس حياته بصوره طبيعيه وهيفقد الثقه بنفسه

4- طيب لو قصينا جلد زياده ...فى الحاله دى العضو الذكرى للطفل هيكون قصير ، و مش هيلاقى جلد كامل يغطيه
لدرجه انه لو حصله إنتصاب ، هنلاقى العضو الذكرى فيه نسبه إنحناء
و فى الحاله دى ، لازم نعمل رقعه من الجلد للعضو الذكرى بتاع الطفل ،بس عمرها ما هتكون زى الجلد الطبيعى اللى ربنا خلق بيه العضو الذكرى

5 - و من الأضرار اللى ممكن يسببها مقص العضم ، انه يكون سبب فى ان الطفل يحصله سرعه قذف لما يكبر
لأن فى طبقه داخليه من الجلد اسمها ميكوزا
الميكوزا دى لازم تكون من 2-5 مم لأنها لو أكتر او أقل هتأثر على سرعه القذف لما الطفل يكبر
و طبعا مقص العضم مش بيوفر الدقه العاليه لقص الجلد 

و علشان تعرفوا أكتر عن أضرار مقص العضم ، لازم تسمعوا الفيديو ده : 

و طبعا السؤال اللى بتفكروا فيه دلوقتى هو ايه أمن طريقه نقدر نطاهر بيها طفلنا؟؟

ف الإجابه هى جهاز اسمه الجومكو ,
لأنه بيكون مكون من قطعتين ، قطعه منهم بتكون مصممه علشان تحمى رأس العضو الذكرى من أى ضرر
و لو عايزين تعرفوا أكتر عن جهاز الجومكو، تعالوا نسمع الفيديو ده مع بعض: 

الطهاره عمليه بسيطه ، لو اتعملت مع جراح أطفال متخصص
لكن لو أهملنا فى عمليه الطهاره ، فى الحاله دى ممكن تسبب مشاكل للطفل إحنا فى غنى عنها ، فبلاش نغامر بصحه أطفالنا

ربنا يحمى و يحفظ كل أطفالنا