اعرف اي هي موانع الطهارة واي هو أفضل وقت للطهارة 

زي ما كلنا عارفين ان واحده من المواضيع اللي بتشغل بال كل ام قبل ولادة طفلها هو موضوع الختان وامتى تعمله ، ودا هنشرحه بالتفصيل بس برضوا لازم تعرفي ان فيه حالات مش هينفع ان البيبي يتطاهر فيها وتعالي دلوقتي نمسك الموضوع واحدة واحدة من الأول ونعرف

امتى المفروض نطاهر البيبى؟ 

طهارة البيبى نقدر نعملها فى اى وقت حتى لو عملناها بعد الولاده على طول ، بس يفضل انها تتم قبل الطفل ما يكمل 3 شهور ، مدام زي ما قلنا  مفيش اى موانع طبيه او اختلافات خلقيه الطفل مولود بيها لاقدر الله

طيب اشمعنى بنقول 3 شهور ؟ يعني مينفعش يتطاهر بعدها ؟

خليني اقولك ان :

- الطفل كل ما كان سنه صغير بيكون احساسه بالالم اقل وكده انتي هتكوني متطمنة أكثر ، لكن لما بيكون كبير هيحس بألم اكتر شويه

- ده غير ان لما الطفل عمره بيكون اقل من 3 شهور بنقدر اننا نعمله عمليه الطهارة فى العياده ، لكن لو الطفل كان اكبر من كده يفضل ان العمليه تتعمل فى المستشفى .

- ده غير ان التخدير لطفل عمرة اقل من 3 شهور بيكون ببنج موضعي وبكده نتجنب اننا نخدر الطفل تخدير كلي ، لكن لو الطفل عمره كان اكتر من 3 شهور وقتها هنحتاج اننا نديله بنج كلى استنشاقى ، بس اتطمني برضو عشان التخدير ده بيكون تحت اشراف دكتور متخصص فى تخدير الاطفال .

وزي ما عرفنا في مقال ختان او طهارة الذكور ان اللى هيعمل عملية الختان لازم يكون دكتور جراحة اطفال متخصص ، مش دكتور النسا يوم الولاده ولا دكتور جراحة عامة ، وده لان فيه فحص لازم يتعمل للطفل قبل عمليه الطهارة عشان نتأكد ان الطفل معندهوش اى اختلافات خلقية ممكن نأجل بسببها الطهاره ، و اللى يقدر يعمل كده هو دكتور جراحة الاطفال   

تعالي دلوقتي نعرف بقى 

اى هى مؤجلات أو موانع الطهارة ؟

هنقسمهم لنوعين أول نوع هو مؤجلات بسبب اختلافات خلقية ومؤجلات بسبب موانع طبية ، و هنبدأ الاول بالاختلافات الخلقيه ، و دى بتكون مشاكل الطفل بيتولد بيها زي :

1- الفتق الاربى : و ده بيكون عباره عن ورم او كولكيعه فى المنطقه الإربيه ،و السبب فى ان الفتق الاربى من مؤجلات الطهارة، هو ان الختان احنا ممكن نستنى عليه لكن الفتق الاربى لازم اول ما يتشخص ناخد قرار العمليه فورا لان الفتق ممكن فى ثانيه واحده يحصله اختناق و يكون خطر على حياة الطفل ، عشان كده علاج الفتق الاربى بيكون ليه الاولويه عن طهارة البيبى

2- الإحليل السفلى ، و ده اختلاف خلقي بتكون فيه فتحه مجرى البول موجوده فى مكان غير مكانها الطبيعى ، و هنا احنا بنأجل الطهاره لحد ما الطفل يوصل لسن 6 شهور لان هو ده الوقت اللى نقدر نعمل للطفل فيه عمليه نعالج بيها الاحليل السفلى ، و السبب فى تأجيل الطهارة اننا بنحتاج لجلدة الطهارة فى تصليح مجرى البول ، عشان كده بنعمل الختان وقت عملية الاحليل

3- لو لقينا إلتصاق بين العضو الذكري و كيس الصفن ، و الطبيعى انهم يكونوا منفصلين عن بعض ، لكن لو حصل العكس و لقينا ان جلد العضو الذكرى ملتصق بكيس الصفن ، هنا لازم نأجل الطهارة و نستنى لغاية ما يكون عمر الطفل 3 او 6 شهور ، و بعدين نعمله عمليه بسيطة نفك بيها الالتصاق و نعمل كمان ساعتها عملية الطهارة .

4- لو الطفل عنده عضو مدفون ، و ده معناه ان العضو الذكرى للطفل مش بيكون ظاهر كله بحجمه الطبيعى وده بيكون سببه اما ان البيبى عنده دهون زياده فى المنطقة الاربيه ، او ان فى مشكله حصلت فى العضو الذكرى وقت تكوين الجنين فى رحم الام ، و هنا احنا بنستنى على عمليه الختان شويه ، و بيكون قدامنا حلين

- اما ان بعد فتره العضو بيبدأ يظهر بشكل طبيعى و وقتها بنعمل عمليه الختان عادى ،
- او اننا بعد فتره نلاقى العضو الذكرى لسه زى ما هو ، فبنحتاج اننا نعمل عمليه بسيطة عشان العضو الذكرى يظهر بحجمة الطبيعى و مع العمليه دى بنعمل عملية الختان .

و دلوقتى بعد ما عرفنا اى هى الاختلافات الخلقية اللى بنأجل بسببها الطهارة ، تعالو نعرف كمان 
اى هى المشاكل الصحية اللى لو لقيناها عند الطفل هيكون ممنوع اننا نطاهره

1- لو الطفل عنده مشاكل فى القلب وقتها لازم نأجل الختان و نعمل الأول فحوصات و ايكو على القلب ، و دكتور القلب هو اللى يحدد امتى نقدر نعمل عملية الختان للبيبى .

2- لو الطفل كان عنده صفرا تكسيريه ، لازم اننا نأجل الطهاره لحد ما نعالج الصفرا الاول .

3- لو الطفل عنده اى امراض فى الدم بتأثر على السيولة زى الهيموفيليا ، هنا لازم نأجل طهارة البيبى لانه ممكن يحصله نزيف وقت العمليه ،و لازم نتابع مع دكتور امراض دم . 

و علشان نعرف اكتر عن موانع الختان ، اتفرجوا على الفيديو ده 

وبكدا نكون اتكلمنا عن أي هو أفضل وقت لعملية الطهارة واي هي الموانع اللي ممكن تأجلها ، اتمنى انكم تكونوا عرفتوا احنا ليه بنأجل الطهارة في حالات معينة ، ومتقلقيش على طفلك عشان هو في أمان معانا .