إختلافات خلقيه ممكن تأجل الطهاره

طهاره الأطفال تعتبر أول عمليه جراحيه الطفل بيعملها فى حياته
و طهاره الأطفال نقدر نعملها للطفل أول م يتولد على طول لو اتأكدنا ان الطفل معندوش اى اختلاف خلقى ممكن يأجل الطهاره

و قبل م نعرف ايه هى الإختلافات الخلقيه اللى ممكن تأجل الطهاره
تعالوا نفتكر الطهاره دى كانت عباره عن ايه :
الطهاره عباره عن عمليه جراحيه بنشيل فيها الجلده الزياده اللى بتكون موجوده حوالين رأس العضو الذكرى للطفل
و الجلده الزياده دى بنسميها القلفه

طيب و بعد م عرفنا يعنى ايه طهاره الأطفال ، تعالوا نعرف ايه الإختلافات الخلقيه اللى لو كانت موجوده عند الطفل ، ساعتها لازم نأجل الطهاره
و اللى يقدر يعرف الإختلافات الخلقيه دى و يحددها هو جراح أطفال متخصص :

1- و أول إختلاف خلقى ممكن يأجل الطهاره هو الفتق الإربى :
و الفتق الإربى ده بيكون عباره عن ان جزء من الأمعاء بيفضل يطلع و ينزل من البطن للقناه الإربيه بسبب ان فتحه مدخل القناه الإربيه فضلت 
مفتوحه بعد نزول الخصيتين من البطن لكيس الصفن

طيب ليه بنقول ان الفتق الإربى بيأجل الطهاره ؟
لأن الفتق الإربى علاجه الوحيد هو ان الطفل يدخل عمليات اول م يتشخص ان عنده فتق إربى ، لأن الفتق الإربى ممكن يحصله حاجه اسمها إختناق ، و الإختناق ده بيكون عباره عن ان جزء من الأمعاء اتحشر جوه القناه الإربيه و مطلعش تانى لتجويف البطن
و ده ممكن يأثر على حياه الطفل
علشان كده بنقول ان الطفل لازم يدخل عمليات اول م يتشخص فتق إربى ، و ممكن نطاهر الطفل فى عمليه الفتق الإربى لأنه كده كده الطفل بيكون متخدر

2- تانى حاجه ممكن تأجل عمليه الطهاره هو ان الطفل يكون عنده إحليل سفلى
و ده بيكون عباره عن ان فتحه البول مش موجوده فى مكانها الطبيعى اللى هو بيكون مقدمه رأس العضو الذكرى للطفل
طيب ليه بنقول ان الإحليل السفلى من الإختلافات الخلقيه اللى ممكن تأجل الطهاره ؟
لأننا علشان نقدر نعالج الإحليل السفلى بنحتاج اننا نستخدم جلده الطهاره ، ف لو طاهرنا الطفل قبل م نفحصه و نتأكد ان معندوش اى إختلافات خلقيه ، ساعتها كده هنكون ضرينا الطفل و إحنا مش قاصدين

3- تالت إختلاف خلقى ممكن يخلينا نأجل عمليه الطهاره هو ان الطفل يكون عنده عضو مدفون
و العضو المدفون ده بيكون عباره عن ان العضو الذكرى للطفل مش بيكون ظاهر كله بحجمه الطبيعى

طيب ليه بنقول ان العضو المدفون من الإختلافات الخلقيه اللى ممكن تأجل الطهاره ؟
لأن زى م قولنا ان العضو الذكرى مش بيكون باين كله بحجمه الطبيعى ف ممكن لو طاهرنا الطفل ممكن نقص جلد زياده او جلد أقل من المطلوب و فى الحالتين ده هيسبب مشاكل للطفل لما يكبر

4- و أخر حاجه ممكن تخلينا نأجل طهاره الطفل لو كان فى |إلتصاق بين العضو الذكرى و جلد كيس الصفن
فلازم نفك الإلتصاق اللى موجود الأول و بعد كده نطاهر الطفل

إحنا كده قولنا ايه هى الإختلافات الخلقيه اللى ممكن تخلينا نأجل طهاره الطفل و لو عايزين تعرفوا معلومات أكتر عن الإختلافات الخلقيه اللى ممكن تخلينا نأجل طهاره الطفل ، تعالوا نسمع الفيديو ده مع بعض : 

ربنا يحمى و يحفظ كل أطفالكوا