العناية بالطفل بعد الختان

بعد عملية الختان للبيبي ، بتيجي فترة مهمة وهي الإهتمام بالبيبي بعد العملية, و لازم نهتم بشكل كبير عشان نضمن إنه يخف في أسرع وقت وبدون اي مضاعفات ممكن تحصله .
والعناية بالطفل بعد الطهارة مش بس بتساعد في تجنب أي مضاعفات، لكن كمان بتخليه يحس بالراحة والنضافة .
فتعالي نعرف أي الخطوات اللي ممكن تعمليها عشان تهتمي بطفلك بعد عملية الختان .
اول حاجه لازم تعرفيها هي تمارين ما بعد الختان ودي حاجه مهمه جدا لازم تعمليها لطفلك , طب هي عباره عن اي ؟
هي عبارة عن تمرين بنعمله للبيبي بعد عملية الختان , وكل اللي بتعمليه انك بترجعي الجلد اللي حوالين العضو بالراحه لحد ما يظهر معاكي رأس العضو او الحلقة الحمرا اللي حوالين العضو وكرري التمرين دا على حسب ما الدكتور هيقولك
طب ليه بنقول ان التمرين دا مهم , عشان لما بنحرك الجلد كل شويه فاحنا بنحمي ان العضو ميحصلوش التصاقات بمعني ان الجلد ميلزقش في راس العضو ويعمل مشكله للبيبي .
وطبعا لازم نحافظ علي منطقة الجرح جافة ونظيفة: 

• في كل مرة هنغير الحفاض، هنضف المنطقة بالراحة وبأستخدام مايه دافية ونجفف المنطقة كويس جدا.
• وممنوع استخدام مناديل مبللة او صابون، بنستخدم فقط المايه الدافية.
• واحنا بنضف مكان العملية منستخدمش كحول علشان العضو ميلتهبش.
• تهتمي بوضع الكريمات اللي الدكتور كاتبها علشان تقلل الاحتكاك بين العضو الذكري و الحفاض وتمنع انتشار البكتيريا.
• في أول 24 ساعة بيفضل وضع كريم فقط علي منطقة الجرح 4 مرات في اليوم.
• بعد كدا بنحط الطفل في مايه دافية من 5 – 10 دقايق من مرتين إلى 5 مرات في اليوم لمدة أسبوع.

وطبعا استخدام الادوية والكريمات الموصوفة من الدكتور بتساعد في التعافي بشكل أفضل وأسرع، ودي بتكون عباره عن :

• كريم مضاد حيوي.
• شراب مسكن للالم في أول يومين.

و لو عايزين تعرفوا معلومات أكتر عن إزاى نقدر نهتم بالبيبى بعد عمليه الطهاره
تعالوا نسمع الفيديو ده مع بعض

طيب أمتي لازم نقلق ونرجع للدكتور بعد عملية الطهارة ؟

خلينا عارفين أن في أعراض طبيعية ممكن تلاحظيها وانتي بتغيري للبيبي الحفاض بعد عملية الختان ، مش ضروري فيها استشارة الدكتور
والأعراض الطبيعية زي :  

• وجود احمرار بسيط في العضو الذكري في اول ايام بعد الختان
• هتلاحظي طبقة بيضاء او صفراء حوالين رأس العضو ودي بتختفي في خلال 10 ل 12 يوم
• نقط دم بسيطة : ممكن تلاحظي نقطه او نقطتين دم بعد عملية الختان لطفلك بس دا طبيعي
• حدوث تورم بسيط في العضو ودا هيختفي بعد كدا

طب اي الأعراض الغير طبيعية لو لاحظتيها علي طفلك بعد الختان لازم تروحي للدكتور , لو لاحظتي :

• نزيف مستمر مش مجرد نقطه او نقطتين
• افرازات صفراء مكان الجرح ليها رائحة كريهة
• عدي 12 ساعة والطفل معملش حمام
• في ورم شديد في العضو والطفل بيتألم منه
• لون العضو متغير عن الطبيعي

كل دي اعراض لو لاحظتيها عند طفلك بعد عملية الطهارة لازم فورا تروحي للدكتور

وفي ملحوظه مهمه أننا لأزم نخلي بالنا أكتر من الأطفال اللي عمرهم أكبر من 3 سنين بعد الطهارة :
عشان حركتهم بتكون كتير ممكن يتخبطوا في مكان العملية ,فلازم نقلل من الحركة الكتير زي ركوب دراجة او ممارسة انشطة النادي زي اللعب بالكورة او التنطيط الزيادة ودا علشان نتجنب حدوث اي نزيف ممكن يحصل.
وبعد مرور اسبوعين بيرجع الطفل يلعب ويجري زي ما يحب بشكل تدريجي. 

• طب ايه الاكل المسموح للطفل بعد عملية الختان ؟

بعد العملية الطفل ممكن يشرب السوائل ويأكل الأكلات اللينة زي الزبادي ,و بعد مرور ساعتين من العملية يبدأ ياكل بشكل طبيعي.

طبعا الأهتمام بالطفل بعد الطهارة بيساعد جدا في نجاح عملية الطهارة والطفل بيحس بالراحة أكتر وبيتعافي أسرع
عشان كدا لازم نتبع خطوات العناية بعد الطهارة كويس جدا ولو لاحظنا اي أعراض غير طبيعية لازم نتواصل فورا مع الدكتور