العضو المدفون فى الاطفال

اى اختلاف خلقى او مشكله صحية فى الاطفال دايما بتسبب قلق كبير للامهات ، بس خلينا نكون عارفين ان اى مشكله صحيه بيكون ليها علاج بس المهم اننا نشخصها صح و نعالجها صح و فى وقتها المناسب ، عشان كده خلونا نتكلم انهارده عن واحد من الاختلافات الخلقيه الشائعه جدا بين الاطفال و هو العضو المدفون 

و خلونا نعرف الاول يعنى اى عضو مدفون ؟

العضو المدفون معناه بختصار ان العضو الذكرى للطفل مبيكونش ظاهر كله بحجمة الطبيعى ، و بيكون مدفون او مختفى فى منطقة العانة او كيس الصفن ، و هنا بيكون عندنا احتمال من الاتنين اما اننا بنلاقى ان العضو الذكرى كله مدفون و مش ظاهر بس غير رأس العضو الذكرى ، او ان جزء بس من العضو هو اللى مدفون وده بيكون السبب في ان شكل العضو الذكرى يبان اصغر من حجمه الطبيعى .

طيب بعد ما عرفنا يعنى اى عضو مدفون تعالوا نعرف دلوقتى اى الاسباب اللى ممكن تخلى الطفل يكون عنده عضو مدفون

و عشان نقدر اننا نفهم الاسباب كويس خلونا نقسمها لنوعين :

1- اسباب خلقيه ، ودى معناها ان الطفل حصله مشكله وهو لسه بيتكون فى رحم الام اتسببت فى ان العضو الذكرى متكونش بالشكل الطبيعى زى :

- تليف فى عضلات العضو الذكرى ، و العضلات دى هى اللى بتكون مسؤولة عن انها تشد العضو الذكرى و تخلى شكله يكون طبيعى ، و اللى بيحصل هنا ان العضلات دى لما بيحصلها تليف مش بتقدر انها تقوم بدورها و تشد العضو الذكرى ، و بكده العضو بيحصله اندفان
- او ان حصل مشكله فى اربطة العضو الذكرى ، و الاربطة دى هي اللى بتكون مسؤوله عن شد جلد العضو الذكرى ، لما بيحصل يها مشكله بيحصل ترهل للجدل ده و هيدارى العضو الذكرى
- و اخيرا ان الطفل يكون عنده التصاق بين جلد الخصية و العضو الذكرى و ده هيتسبب فى ان العضو يحصله اندفان

2- اما النوع التانى من الاسباب و هى اسباب مكتسبه ، بمعنى ان الطفل بعد الولاده حصلت له مشاكل اتسببت فى ان العضو الذكرى اندفن جزء منه زى

- قص جلدة الطهاره بطريقة غلط سواء قصينا الجلد بشكل اكبر من اللازم وده هيكون السبب فى ان العضو مش هيقدر انه يتمدد و يكبر بالشكل الطبيعى او ان الجلد اتقص بشكل اقل من اللازم و بكده الجلد اللى بيغطى العضو هيكون زياده و ده هيدارى العضو و يتسبب فى ان الطفل يكون عنده عضو مدفون
- او ان الطفل يكون عنده فتق اربي ، و هنا كيس الفتق الاربي هيكون مدارى العضو الذكرى
- لو الطفل كان عنده قيله مائية بدرجة كبيرة ، لان ده هيتسبب فى ان الخصية حجمها يكبر ، وده هيخلى العضو يكون مدفون
- و اخيرا لو الطفل عنده سمنه بدرجة كبيره و قتها الدهون فى المنطقة الاربيه هتزيد و ده هيتسبب فى ان العضو الذكرى يكون مدفون . 

طيب هو العضو المدفون ده ممكن يضر الطفل ؟

الاجابه اه ، العضو المدفون هيكون ليه تأثير كبر جدا على الطفل سواء من الناحيه النفسيه او الناحية الدينيه و كمان ليه تأثير على القدره الجنسيه لما الطفل يكبر

و خلونا نبدأ دلوقت بتأثير العضو المدفون على القدره الجنسيه :

- العضو المدفون ممكن يسبب للطفل لاقدر الله سرطان فى القضيب ، و السبب فى ده ان الطفل مش هيكون قادر انه يوجه العضو الذكرى وقت نزول البول و بكده البول هينزل على العضو الذكرى نفسه و الخصية ، وده مع التكرار هيبدأ يسبب للطفل بكتريا ، و البكتريا دى هى اللى هتكون السبب فى ان الطفل يصاب بسرطان القضيب
- ده غير ان العضو المدفون لو متعالجش هيكون السبب فى ان الطفل لما يكبر يكون عنده ضعف انتصاب ، وبكده مش هيقدر انه يمارس حياته الزوجيه بشكل طبيعى

اما عن تأثير العضو المدفون من الناحيه الدينيه
فبسبب ان الطفل هيلاقى صعوبه فى توجيه البول ، فده هيكون السبب فى ان البول ينزل على جسمه و على هدومة ، وده هيبطل الوضوء

و بالنسبه لتأثير العضو المدفون من الناحيه النفسيه

1- فالطفل هنا لما يبدأ يكبر شويه و يفهم شكل العضو الذكرى هيكون دايما حاسس انه مختلف عن باقى الاطفال اللى فى نفس سنه
2- ده غير ان نقطة صعوبة توجيه البول اللى اتكلمنا عنها من شويه و اللى هتسبب ان البول ينزل على هدومة هتكون بتسببله احراج  

و بعد ما عرفنا اى هى اضرار العضو المدفون ، تعالوا نعرف دلوقتى ازاى بنقدر اننا نعالجه ؟

قبل ما نتكلم عن علاج العضو المدفون ، خلونا الاول نعرف اننا مابنقررش نعالج العضو المدفون غير لما يكون الطفل وصل لسن 6 شهور ، و العلاج بيكون على حسب السبب اللى خلى الطفل يكون عنده عضو مدفون ، بمعنى

- ان لو السبب فى ان الطفل عنده عضو مدفون كان السمنة وزيادة الدهون فى المنطقة الاربية فهنا احنا ممكن الاول نحاول نقلل وزن الطفل وده ممكن يساعد ان العضو يظهر بشكله الطبيعى ، و لو ده محصلش ممكن وقتها نلجأ لاننا نعمل شفط لدهون المنطقة الاربية
- اما لو السبب كان ان الطفل عنده فتق اربى فهنا احنا بنعالج الفتق الاربى نفسه اللى كان السبب فى ان العضو يكون مدفون
- ولو السبب كان فى قص جلد الطهارة فهنا لو الجلد اللى اتشال كان زياده ممكن نعمل عمليه بسيطة نحاول اننا نرقع بيها الجلد عشان العضو الذكرى يقدر انه يتمدد و يبقى شكله طبيعى ، ولو الجلد اللى اتشال كان اقل فوقتها بنعيد الطهارة و نقص الجلد بالمقاسات المناسبة

عشان كده مهم جدا لو اى ام لاحظت ان شكل العضو الذكرى لطفلها مش طبيعى انها تفحص الطفل عند دكتور جراحة اطفال عشان نحدد السبب و تعرف نعالجه صح

متقلقيش كل حاجه اكيد ليها علاج واكيد لما تعالجيه عند دكتور جراحة اطفال هتضمني نجاح العلاج وسلامة طفلك