انسداد الأمعاء عند الأطفال وحديثي الولادة

انسداد الأمعاء عند الأطفال وحديثي الولادة من الحالات اللي بتخوف أي أم، لأنه بيأثر على صحة الطفل بسرعة. علشان كده لازم كل أم تبقى عارفة إيه هو انسداد الأمعاء، وأعراضه، أسبابه، وأنواعه، وطرق علاجه، وكمان إيه اللي ممكن يحصل لو ما اتعالجش.

انسداد الأمعاء معناه إن فيه حاجة مانعة الأكل والفضلات إنها تمشي في مسارها الطبيعي جوه أمعاء الطفل. الأمعاء في الطبيعي بتتحرك علشان تهضم وتنقل الأكل، لكن لما يحصل انسداد، ده بيوقف كل حاجة وبيسبب ألم للطفل علشان الأكل و الفضلات اللى متراكمه فى بطنه .

الأعراض دي ممكن تظهر على الطفل لو عنده انسداد في الأمعاء:

• بطن منفوخة وشكلها مش طبيعي
• ترجيع كتير، وخصوصًا لو لونه أخضر أو أصفر (ده خطر جدًا)
• قلة أو عدم خروج البراز والغازات و لو خرج بيكون لزج و فيه دم
• الطفل بيعيط كتير ومش بيهدى
• مش بيرضع أو بيرضع وبيرجّع
• ملامحه متغيرة، وشه باين عليه التعب
• في حالات حديثي الولادة: ممكن لون البراز يكون غامق أو مفيش براز خالص من بعد الولادة

فيه كذا سبب ممكن يخلّي الطفل يتعرض للانسداد، زي:

1. اختلافات خلقية: زي ضيق أو عدم اكتمال جزء من الأمعاء من ساعة الولادة
2. التفاف الأمعاء: الأمعاء بتلف حوالين نفسها وده بيمنع مرور الأكل
3. فتق مختنق: زي الفتق الإربي، اللي ممكن يدخل فيه جزء من الأمعاء ويتسد
4. انسداد بعد العمليات: ممكن يحصل التصاقات تمنع حركة الأمعاء

فيه نوعين أساسيين من انسداد الأمعاء:

1. انسداد ميكانيكي
يعني فيه حاجة مادية فعلاً قافلة الطريق، زي: 

• التفاف الأمعاء
• فتق
• التصاقات بعد جراحة
• أجسام غريبة أو ورم

2. انسداد وظيفي (شلل في الأمعاء)
يعني الأمعاء نفسها مش بتشتغل صح ومش بتتحرك زي الطبيعي، وده بيحصل في حالات: 

• التهاب شديد
• بعد عمليات جراحية
• في أمراض زي “هيرشسبرنج” (مرض خلقي)

• الأعراض ممكن تكون متشابهة، لكن في الحالات الوظيفية الطفل بيكون مش بيرجع كتير زي الميكانيكي، بس برضه مفيش براز.
• الفحوصات زي الأشعة العادية أو الأشعة بالصبغة بتوضح نوع الانسداد
• الدكتور هو اللي بيحدد نوع الحالة بالضبط بناء على التاريخ المرضي للطفل والفحوصات اللى بيطلبها

العلاج بيعتمد على السبب والنوع:

1. العلاج بدون جراحة : 

• و ده بيكون عباره عن اننا بنحجز الطفل فى المستشفى

و بنعلقله محاليل فيها صبغه ، لأن الصبغه بتساعد انها تفك الإلتصاقات
او لو فى جزء مش مهضوم كويس ، بيعدى جزء الإنسداد ده

• و ده بيكون عن طريق حاجه اسمها حقنه شرجيه
  و دى بتكون عباره عن انبوبه رفيعه بنحطها فى المستقيم علشان نسحب من خلاله البراز 

2. العلاج بالجراحة :

• لو فيه التفاف في الأمعاء أو انسداد خلقى، لازم جراحة فورية
• الجراح بيشيل الجزء المسدود أو بيفك الالتفاف
• بعد الجراحة، الطفل بيتابع في حضّانة أو رعاية مركزة للأطفال حسب حالته

لو ما اتعالجش بسرعة، ممكن تحصل حاجات خطيرة زي:

• تمزق في الأمعاء
• عدوى شديدة في البطن
• ضعف النمو وتأخر في الوزن والطول بسبب سوء امتصاص الأكل
• تسمم في الدم ( لو حصل للطفل غرغرينا )
• ممكن يؤدي للوفاة لا قدر الله في الحالات الشديدة

و فى النهايه نصيحتى لكل أم:
لو ابنك أو بنتك عندهم أي عرض من اللي اتكلمنا عليه، ما تستهونيش بالموضوع وروحي على طول لدكتور جراحه أطفال علشان يقولنا ايه أنسب إجراء نقدر ناخده مع الطفل و ايه خطه العلاج المناسبه ليه
و ربنا يحمى و يحفظ كل أطفالكوا