أعراض و أسباب الفتق الإربى عند الأطفال

فى المقال اللى فات عرفنا يعنى ايه فتق إربي وإزاى نقدر نلاحظه لو ظهر, بس هو ايه اللى بيخلى الفتق الإربى ده يحصل اصلا
و علشان نفهم اكتر الموضوع ده محتاجين نعرف ايه اللى بيحصل فى اخر فتره فى الحمل

فى التلت الأخير من الحمل الخصيتين يبدأوا ينزلوا من البطن لكيس الصفن عن طريق قناه شبه الممر أو الأنبوبة كده اسمها القناه
الإربيه, و القناه الإربيه دى و ظفيتها تنقل الخصيه من البطن لكيس الصفن 

طيب ايه هى وظيفه الخصيه و كيس الصفن أصلا؟

الخصية: دة عباره عن عضو شكله بيضاوى مسئول انه ينتج و يخزن الحيوانات المنويه و مسئول انه ينتج هرمون التستوستيرون فى الذكور ...و بيكون محفوظ جوه كيس من الجلد اسمه كيس الصفن

بيعمل ايه كيس الصفن ده؟
بيحافظ على درجه حراره الخصيه انها تكون اقل من درجه حراره الجسم الطبيعيه بدرجتين ( درجه حراره الجسم 37 و درجه حراره الخصيه بتكون 35)..ليه؟ علشان الحيوانات المنويه بتحتاج درجه حراره بارده علشان تنتج حيوانات منويه بشكل طبيعى علشان كده كيس الصفن بيكيف نفسه حسب درجه حراره الجسم علشان الخصيه تقدر تنتج الحيوانات المنويه بشكل طبيعى

طيب, دلوقتى بعد م الخصيه اتنقلت من البطن لكيس الصفن عن طريق القناه الإربيه دى , المفروض ان القناه دى دورها كده خلص ، و المفروض تتقفل لوحدها بشكل تلقائي
لكن لو مدخل القناه الإربيه دى فضل مفتوح اكتر من 4 مم , فى الحاله دى بيفضل جزء من الأمعاء ينزل و يطلع من البطن للقناه الإربيه كل شويه
و ده اللى بنسميه الفتق الإربى, و علشان كده بنقول عليه إختلاف خلقى مش مرض جه للطفل لما اتولد , لأن الطفل بيكون مولود بيه
بس بياخد وقت على م يظهر , و ده بيفرق من طفل للتانى
و تعالوا نسمع الفيديو ده مع بعض ، علشان نعرف أكتر عن أسباب الفتق الإربى

طيب اعراض الفتق الإربى ده بتبقى ايه؟

بنلاقى زى ورم او كولكيعه كده فى المنطقه الإربيه , و دى مكانها بيكون فى اول الفخد و تحت البطن, و بالتحديد يعنى مكان لازقه البامبرز
و هنلاحظ ان العياط و الكحه و الحذق ممكن يزودوا حجم الورم او الكولكيعه دى شويه,
و ممكن نلاحظ ان الورم ده بيهدى او يقل شويه اول م الطفل يبطل عياط, او اثناء النوم

طيب بعد م عرفنا ايه هى أسباب الفتق الإربى ،

ايه هو علاج الفتق الإربى؟

فى الحقيقه الفتق الإربى ملوش غير علاج واحد بس و هو عمليه جراحيه
و علشان نعرف اكتر عن عمليه الفتق الإربى ، تعالوا نسمه الفيديو ده مع بعض: 

متترددوش فى أى سؤال يخص صحه أطفالكم
ربنا يحمى و يحفظ كل أطفالنا