الفرق بين الخصية المعلقة و الخصية النطاطة عند الأطفال وحديثي الولادة

كتير من أهالي لما بيلاحظوا اي تغيير علي الخصية عند أطفالهم بيقلقوا جدا لأن طبعا الخصية ليها أهمية وتأثير كبير علي مستقبل الطفل , بس في تغيرات ممكن نقلق منها فعلا زي الخصية المعلقة  وتغيرات طبيعية مفيش قلق منها زي الخصية النطاطة

وعشان نعرف اي هي الخصية المعلقة واي الخصيىة النطاطة واي الفرق بينهم , لازم نفهم في البداية امتي الخصيتين بيتكونوا عند الجنين ؟

الخصيتين عند الجنين بيتكونوا اثناء الحمل داخل تجويف البطن
وبعد كدا في الشهور الأخيرة الخصيتين بينتقلوا من تجويف البطن إلي كيس الصفن من خلال قناة اسمها القناة الإربية   

طيب اي بقي الخصية المعلقة دي؟

الخصية المعلقة : هي خصية منزلتش من تجويف البطن لكيس الصفن , و ممكن تكون معلقة في تجويف البطن او في اول القناة الإربية او في منتصف القناة او عند اول كيس الصفن

اما الخصية النطاطة دي خصية نزلت لكيس الصفن واستقرت فيه لكنها بتنط وتطلع لتجويف البطن في حالات معينه عشان كدا سمينها الخصية النطاطة
والحالات المعينة اللي الخصية النطاطة بتختفي فيها زي :

أن الطفل كان سقعان او خايف او متوتر , فبيحصل انقباض للعضلة المحيطة بالخصية ، فبتتحرك من مكانها الطبيعي بكيس الصفن تطلع للمنطقة الإربية , ومجرد ما الطفل يهدي ويتدفي الخصية بترجع مكانها تاني  

طيب مين أخطر علي طفلك الخصية المعلقة ولا الخصية النطاطة ؟

الخصية المعلقة خطيرة جدا لأنها بتكون خارج كيس الصفن، و ربنا خلق كيس الصفن بدرجة حرارة معينة اقل من حرارة الجسم عشان تحافظ علي الخصية , فلو الخصية اتعلقت بعيد عن كيس الصفن هيحصل مضاعفات خطيرة زي  

• ان الخصية ممكن تضمر في اي وقت والطفل يعيش بخصية واحده
• وممكن خلايا الخصية تتحول لبؤر سرطانيه لاقدر الله

وطبعا كل ده هيأثر علي مستقبل الطفل في الإنجاب
اما الخصية النطاطة مالهاش اي خطورة علي طفلك , هي خصية طبيعية لكن لازم نتابع مع الدكتور كل 6 شهور نطمن انها كويسه ومتحولتش لخصية معلقة .

ولو عاوزه تعرفي معلومات اكتر عن انواع الخصيه المعلقة تقدري تشوفي الفيديو دا مع دكتور محمد علام  

طيب اي علاج الخصية المعلقة والخصية النطاطة ؟

الخصية المعلقة علاجها في البداية أننا منعملش اي تدخل جراحي خلال اول 6 شهور من عمر الطفل لأن في إحتمال أن الخصية تنزل لوحدها , لكن لو الخصية منزلتش في خلال أول 6 شهور , لازم نتدخل جراحيا وننزل الخصية لمكانها الطبيعي عشان ميحصلش اي مضاعفات تأثر علي مستقبل الطفل في الإنجاب

اما الخصية النطاطة مش محتاجه علاج لأنها خصية طبيعية , هترجع لكيس الصفن تاني , وهتثبت في مكانها قبل مرحلة البلوغ ، لكن لأزم نتابعها زي ما قولنا لأن ممكن تتحول لخصية معلقة في اي وقت . 

ولازم تخلي بالك أن تشخيص الخصية المعلقة أو الخصية النطاطة لازم يكون عند دكتور متخصص في جراحة الأطفال عشان تعرفي هل طفلك محتاج علاج ولا لا , ولو محتاج علاج نعمله في أسرع وقت قبل ما يحصل اي مضاعفات خطيرة تأثر علي طفلك