ليه الفتق الإربي من أخطر الاختلافات الخلقية؟

الاختلافات الخلقية عند الأطفال كتيرة جدا ، زي القيلة المائية  و الخصية المعلقة و الإحليل السفلي و الفتق السري ، بس دايما بنقول ان الفتق الإربي هو أخطر إختلاف خلقي ممكن انه يحصل للطفل وانه ممكن يهدد حياة الطفل .
و تعالوا مع بعض نعرف  

اي هي خطورة الفتق الإربي؟

الفتق الإربي هو واحد من الإختلافات الخلقية اللي ممكن تحصل عند الأطفال من عمر يوم واللي بيكون ظاهر على شكل كولكيعة أو ورم في المنطقة الإربية أو المنطقة اللي بين آخر البطن و اول الفخذ ، وبيظهر أكثر لما البيبي يعيط أو يكح او يحزق ، و الورم دا بيروح لما الطفل يكون 
هادي او نايم  .

و الفتق الاربي دا بنعتبره من اخطر الإختلافات الخلقية اللى ممكن تحصل للأطفال ، لان لو اجلنا علاجة و مأخدناش قرار العملية بسرعه , الفتق دا ممكن فى اى لحظة يحصلة حاجة اسمها اختناق , 

و الفتق الاربي المختنق عند الاطفال هو حالة متقدمة جدا من الفتق الاربي واللي بيحصل فيها ان الامعاء بعد ما اتحركت من البطن ودخلت المنطقة الإربية مبقتش عارفه تخرج منها تاني ، وده عشان الامعاء تضخمت بسبب الأكل ، و ماعرفتش ترجع تانى للبطن لانها بقت اكبر من فتحة القناه الاربية و هنا الجزء ده من الامعاء بيبدأ يحصله اختناق

طيب اى اللى بيحصل للطفل لما الامعاء يبدأ يحصلها اختناق ؟

بالنسبة للاولاد :
لو مر 3 ساعات بتبدأ الأوعية الدموية الخاصة بالخصية تموت وممكن انه يحصل غرغرينا في خصية الطفل ,
ولو استنينا 6 ساعات فالأمعاء اللي جوا القناة الأربية هتموت تماما , و ساعتها الطفل بيكون عنده انسداد معوي وإنتفاخ في البطن وترجيع واضطرابات في العناصر زي لصوديوم والبوتاسيوم ، دا غير ان 15 % من الحالات دي ممكن يحصلها كمان ضمور في الخصيه ، و هنا لازم الطفل يدخل طوارئ وعمليات فورا ، عشان نستأصل جزء من الامعاء اللى حصلها اختناق .  

اما لو الفتق بالنسبه للبنات 
لو استنينا من 3 ل 6 ساعات ممكن يحصل غرغرينه للمبيض
عشان المبيض من أكثر الحاجات اللى بتنزل في كيس الفتق وبالتالي بيحصله اختناق , وده هيأثر علي خصوبة البنت , و ممكن يدخلنا في مشاكل تانيه كتير لا قدر الله ممكن تأثر على حياة الطفلة .

و تعالوا نعرف أكتر عن خطوره إختناق الفتق الإربى فى الفيديو ده :  

عشان كده الفتق الاربي لازم نعالجة فورا اول ما يتشخص .  

  طيب ايه هي مخاطر و مضاعفات الفتق الإربي و اى اللى هيحصل لو أهملنا في علاج الفتق الإربي ؟ 

1. الانسداد المعوي : وده بيحصل لما الأمعاء بتتحبس جوا كيس الفتق ومش بتقدر انها ترجع تاني ، وده بيخلي الورم في المنطقة صلب ومؤلم ، وبيكون الورم ظاهر أكثر ومعاه هيكون فيه احمرار في الجلد
2. ولو حصل اختناق وانقطعت إمدادات الدم عن الأمعاء ده بيخلي أنسجة الامعاء تموت ، و بيبدأ يحصل التهاب حاد في الأمعاء ودي من الحاجات اللى ممكن تهدد حياة الطفل لانها هتسببله تسمم دموى 
3. تلف الأعضاء التناسلية ضمور الخصية للذكور وتلف المبيض للإناث، 

وهنا نيجي لآخر واهم سؤال واللي بتفكر فيه امهات كثيرة عشان خايفين من قرار العملية 

هو الفتق الإربي عند الاطفال ممكن يتعالج من غير عملية ؟
الإجابة هي لا الفتق الإربي حله وعلاجه الوحيد هو العملية ، وده لاننا عشان نعالج الفتق الاربى و نضمن ان الامعاء متنزلش تانى من البطن للقناه الاربيه ، لازم اننا نقفل فتحة القناة الإربية وده مش هيتم الا عن طريق العملية 
 . و اللى كل ما اتأخرنا فى اننا نعملها كل ما زادت فرصة أن الطفل يكون عنده فتق مختنق

و خليكى عارفة ان العملية ماتخوفش ، اللي يخوف هو اننا نكون عارفين ان الطفل عنده فتق اربي ومستنين عليه .
اعرفوا الصح عشان تحافظوا على حياة أطفالكم