ختان او طهاره الاطفال الذكور

اكتر حاجة بتشغل بال كل ام وقت ما تسمع كلمه مبروك البيبي ولد ،هي الطهارة وتقعد تفكر ليل ونهار هو ابني لازم يتطاهر ؟ طب هطاهره امتى وفين و ازاى ،عشان كده تعالوا دلوقتى نعرف كل حاجة عن ختان الاطفال و حديثى الولاده 

الختان ده عملية بسيطة جدا مش بتاخد اكتر من 15 دقيقة بنقص فيها الجلد الزياده اللي بيكون مغطى رأس العضو الذكرى كله , و الجلد دا بنسميه القلفة , و الجلد ده ربنا خلقه و الجنين بيتكون فى رحم الام عشان يحمى رأس العضو الذكرى من اى احتكاك ممكن يحصل بسبب حركة الجنين جوا الرحم ,طيب مدام القلفة دى مهمة كده ليه بنحتاج اننا نقصها 

القلفة بتكون مهمه فعلا قبل الولاده لكن بعد الولاده ممكن تسبب للبيبى مشاكل كتير جدا لو فضلت موجوده زى : 

1- امراض جلدية في المنطقة التناسلية .
2- ممكن كمان تكون السبب فى ان الطفل يحصله التهابات و عدوى فى الجهاز البولى
3- ده غير ان فى ماده بتكون موجوده بين رأس العضو و جلده الطهاره اسمها Smegma ، دى بتعمل روائح سيئه جدا ، و لو الماده دى فضلت تتراكم بين جلد الطهاره و رأس العضو الذكرى هتبدأ تكون بكتريا و هتسبب مشاكل تانيه كتير زى
      - التهابات فى رأس العضو الذكرى
      - و ان الطفل ممكن يحس بألم وقت التبول
      - ده غير ان الطفل لو معملش عملية الختان لحد ما يكبر و يتجوز ده ممكن يكون سبب فى ان الزوجه تتصاب بسرطان فى عنق الرحم ​بسبب ان البكتريا دى هتتنقلها وقت العلاقة الزوجيه
4- و كمان الطهاره بتسهل تنظيف العضو الذكرى
5- ده غير انها بتقلل من فرص الاصابه بسرطان القضيب .
6- و كمان الختان يعتبر سنه والرسول صلى الله عليه وسلم اوصى بالختان فى حديثه الشريف "الْفِطْرَةُ خَمْسٌ – أَوْ خَمْسٌ مِنَ الفِطْرَةِ - الخِتانُ، والاسْتِحْدادُ، وتَقْلِيمُ الأظْفارِ، ونَتْفُ الإبِطِ، وقَصُّ الشَّارِبِ " 
طيب بعد ما عرفنا يعنى اى ختان وليه لازم اى طفل ذكر يتعمله عمليه الطهاره ، تعالوا دلوقتى نعرف

طهارة البيبى نقدر نعملها فى اى وقت حتى لو بعد الولاده على طول ، و يفضل انها تتم قبل ما الطفل يكمل 3 شهور ، ، مدام مفيش اى موانع طبيه او اختلافات خلقيه الطفل مولود بيها لاقدر الله

طيب ليه بنقول يفضل ان الطهارة تتم قبل الطفل ما يكمل 3 شهور ، ده لاسباب كتير جدا زى :

- لان الطفل كل ما كان سنه صغير بيكون احساسه بالالم اقل ، لكن لما بيكون كبير بيحس بالالم شويه اكتر
- عمليه الطهاره لما بنعملها لطفل عمره اقل من 3 شهور بنعملها فى العياده مش بنحتاج لمستشفى ، لكن لو الطفل كان اكبر من كده يفضل ان العمليه تتعمل فى المستشفى .
- ده غير ان الطفل و هو صغير مش بنحتاج اننا نديله غير مخدر موضعى و مهدئ بسيط وقت العمليه ، لكن لو الطفل اللى بيعمل العمليه عمره كان اكتر من 3 شهور وقتها هنحتاج اننا نديله بنج كلى استنشاقى ، و لازم يكون تحت اشراف دكتور متخصص فى تخدير الاطفال ،

و دلوقتى فى معلومة مهمه لازم نعرفها ، ان اللى هيعمل عملية الختان للطفل لازم يكون دكتور جراحة اطفال ، مش دكتور النسا يوم الولاده ولا دكتور جراحة عامة ، وده لان فى فحص لازم يتعمل للطفل قبل عمليه الطهارة عشان نتأكد ان الطفل معندهوش اى اختلافات خلقية ممكن نأجل بسببها الطهاره ، و اللى يقدر يعمل الفحص ده هو دكتور جراحة الاطفال 

 و هنبدأ الاول بالاختلافات الخلقيه ، و دى عبارة عن مشاكل الطفل بيكون مولود بيها زى :

1- الفتق الاربى ، وده معناه بأختصار ان فى جزء من الامعاء نزل فى القناه الاربيه ، و هنا الاهم من الختان اننا نعمل عمليه نلحق بيها الفتق الاربى ده قبل ما يحصله اختناق لان ده بيكون خطر جدا على الطفل ، و ممكن وقت عمليه الفتق الاربى نعمل كمان الختان لو وضع البيبى كان يسمح بكده ، و لو عاوزين تعرفوا معلومات اكتر عن الفتق الاربى ، هتلاقوا كل المعلومات عنه فى مقال 
"الفتق الاربي"

2- لو اكتشفنا ان البيبى عنده احليل السفلى ، و ده معناه ان فتحة مجرى البول مش بتكون فى مكانها الطبيعى ، و هنا عشان نصحح وضع فتحة مجرى البول و نخليها فى مكانها الطبيعى لازم نستنى على الطفل لحد ما يوصل لسن 6 شهور ، و السبب فى اننا لازم نأجل عمليه الختان لو لقينا ان الطفل عنده احليل سفلى ، اننا بنستخدم جزء من الجلد او القلفة اللى بنقصها فى عملية الطهاره  في تصليح مجرى البول ، و لو عاوزين تعرفوا معلومات اكتر عن الاحليل السفلى و ليه لازم نعالجه ، ممكن نضغط هنا على مقال
"الاحليل السفلى "

3- حاجة كمان ممكن تخلينا نأجل طهاره البيبى وهى اننا نلاقى إلتصاق بين جلد العضو الذكري و جلد كيس الصفن ، لان فى الطبيعى لازم جلد كيس الصفن يكون منفصل عن جلد العضو الذكرى ، لكن لو حصل العكس و لقينا جلد العضو الذكرى ملتصق بكيس الصفن ، هنا لازم نأجل الطهارة و نستنى على الطفل لحد ما يكون عمره 3 او 6 شهور ، و بعدين نعمله عمليه بسيطة نفك بيها الالتصاق و نعمل كمان معاها الختان للطفل .

4-لو الطفل عنده عضو مدفون ، و ده معناه ان العضو الذكرى للطفل مش بيكون ظاهر كله بحجمه الطبيعى وده بيكون سببه اما ان البيبى عنده دهون زياده فى المنطقة الاربيه ، او ان فى مشكله حصلت فى العضو الذكرى وقت تكوين الجنين فى رحم الام ، و هنا احنا بنستنى على عمليه الختان شويه ، و بيكون قدامنا حلين 

-اما ان بعد فتره العضو بيبدأ يظهر بشكل طبيعى و وقتها بنعمل عمليه الختان عادى ،
-او اننا بعد فتره نلاقى العضو الذكرى لسه زى ما هو ، فبنحتاج اننا نعمل عمليه بسيطة عشان العضو الذكرى يظهر بحجمة الطبيعى و مع العمليه دى بنعمل عملية الختان , وممكن تعرفوا معلومات اكتر عن من خلال مقال العضو المدفون

اما بالنسبة لبعض للموانع الطبيه اللى ممكن نأجل بسببها عملية الختان فهى 
1- لو الطفل وقت الولاده كان عنده صفرا تكسيريه لانه كده لازم يدخل الحضانة .
2- لو الطفل عنده اى امراض بتأثر على سيولة الدم زى الهيموفيليا او الصفرا الفسيولوجيه ، هنا لازم نأجل الطهارة و نتابع مع دكتور امراض دم .
3- لو الطفل عنده مشاكل فى القلب وقتها لازم نأجل الختان و نعمل الاول ايكو على القلب ، و نعرضها على دكتور متخصص وهو يوضح اذا كان وضع الطفل يستحمل الطهارة ولا لأ  

فى الطبيعى عمليه الطهاره دى عمليه بسيطة جدا مش بتاخد اكتر من 15 دقيقة و ملهاش اى مضاعفات ، بس ده فى حالة اننا طاهرنا البيبي عند جراح اطفال متخصص , و استخدمنا اداة أمنة فى الطهارة ، لان لو ده محصلش ممكن  يحصل للبيبى لاقدر الله تشوه فى العضو الذكري او غرغرينا وده ممكن يسببله بعد كده لما يكبر ضعف جنسي .

و تعالوا نعرف دلوقتي اى هى الادوات اللى لو استخدمناها فى عمليه الطهاره ممكن تعمل مشاكل للطفل  

1- مقص العضم او bone cutting : وده لان لو الجراح اللى بيستخدم مقص العضم فى الطهاره مش على درجة كبيره جدا من الخبره ، و متمكن كويس جدا من استخدام مقص العضم مكن يحصل للطفل مشاكل كتير جدا زى ،

- ان ممكن يحصل قطع فى رأس العضو ، لان لما بنقص جلده الطهاره بمقص العضم رأس العضو مش بتكون باينه ولا فى اى حاجة ممكن تحميها ، فممكن لو الجراح معندهوش خبره و مش عارف هو المفروض يقص جلد قد ايه ، يقص جزء من رأس العضو مع جلده الطهارة
- جلد الطهاره اللى هتتقص مش هتكون متساويه و ممكن نقص جلد اقل او اكتر من اللى المفروض يتقص ، و كل ده هيخلى شكل العضو الذكرى مش طبيعى ده غير اننا لو قصينا جلد زياده عن اللازم هنا الطفل لما يكبر هيكون عنده سرعة قذف و مشكلة فى الانتصاب ،  

ودلوقتى بعد ما عرفنا اننا لازم نبعد عن مقص العضم فى طهارة البيبى ، خلونا نتكلم عن افضل و اكتر الادوات امان فى الطهاره 

1- جهاز الجومكو او الجرس المعدنى ، و الجهاز ده من احسن الاجهزه اللى ممكن تتعمل بيها عمليه الطهاره ، وده لان الجهاز بيتكون من قطعتين

- القطعه الاولى ودى عباره عن قمع من الحديد بنحطه على رأس العضو الذكرى عشان نحافظ عليها وقت قص الجلد و بكده عمرنا ما هنضر رأس العضو وقت قص جلد الطهاره ، وده على فكره بيكون ليه مقاسات مختلفة عشان يناسب حجم راس العضو الذكرى
- اما القطعه التانيه بتكون عبارة عن جهاز بنثبت بيه العضو الذكرى كويس جدا ، عشان نتحكم اكتر فى جلدة الطهاره و نقصها بشكل كويس ميأثرش على شكل العضو الذكرى

2- الحلقة البلاستيكية : و ده كمان من الاجهزة اللى مش بتسبب للبيبى اى ضرر وقت الطهارة ، و بتساعد على ان جلد الطهارة يتقص بشكل متساوى  

و دلوقتى بعد ما عرفنا اى افضل الاجهزة اللى ممكن نطاهر بيها البيبى ، تعالوا نعرف دلوقتى ازاى بنقص جلدة الطهاره بقى نفسها والقص ده بيكون ليه طرق كتير جدا زى و كلهم مفيش منهم ضرر على الطفل زى :

1- الكي الحرارى
وده يعتبر من افضل الطرق اللى ممكن اننا نقص بيها جلدة الطهاره ، لانه
- بيكوى الشعيرات الدمويه وقت القص و بكده مش هيكون فى اى نزيف بعد قص الجلد ،
- و كمان بيلحم الجلد ببعضه و ده ليه مميزات كتير زى
مش هنحتاج اننا نخيط مكان الجرح ،
التأم الجرح بيكون اسرع
مش هيحصل اى تلوث فى الجرح لانه يعتبر مقفول
2- المشرط الجراحى
3- الليزر
4- الدياثيرمى ثنائي القطب و هنا ناخد بالنا ان فى فرق كبير جدا بين الدياثيرمى ثنائي القطب و احادى القطب ، احادى القطب ده مينفعش اننا نستخدمة ​لانه هيسبب للبيبى مشاكل كتير زي : 
- حرق فى العضو الذكرى
- او ممكن يعمل غرغرينا و اللى بسببها ممكن يحصل بتر للعضو الذكرى
كده احنا عرفنا اى افضل الاجهزه اللى ممكن نستخدمها فى الطهاره ، و كمان افضل طرق قص الجلد تعالوا نعرف دلوقتى ازاى بنجهز البيبى الجميل لعمليه الختان 

لو الطفل كان عمره معداش اسبوع 

- مش بنكون محتاجين اى تحاليل ،
- لازم الام يكون معاها لبس واسع و كمان بامبرز بمقاس اكبر من اللى الطفل متعود عليه ، عشان ميحصلش اى احتكاك فى العضو الذكرى .

لكن لو الطفل كان سنه اقل من 3 شهور هنحتاج 

- اننا نعمل تحليل سيوله (PT PC, INR)
- لبس واسع و كمان بامبرز بمقاس اكبر من اللى الطفل متعود عليه

اما لو الطفل كان اكبر من 3 شهور هنحتاج 

- اننا نعمل تحليل سيوله (PT PC, INR)
- صورة دم كاملة (CBC)
- لازم الطفل يكون صايم قبل العملية لمده 6 ساعات عن الأكل ، و 4 ساعات عن الرضاعه و شرب الماية
- لبس واسع و لو الطفل كان لسه بيستخدم بامبرز بمقاس اكبر من اللى متعود عليه

و دلوقتى تعالوا نعرف بعد ما نعمل العمليه ، هنتعامل ازاى مع الطفل و اى الحاجات اللى لازم الام تاخد بالها منها
1- لازم نلتزم بكل مواعيد الادويه بأنتظام .
2- لازم نغير البامبرز بأنتظام ، و خلال اول كام يوم لازم نستخدم مقاس اكبر شويه من اللى الطفل متعود عليه
3- لازم نهتم بنظافة العضو الذكرى و نحاول اننا نقعد الطفل فى مايه اكتر من مره فى اليوم

ده اللى لازم الام تعمله بعد العمليه ، و هنقول دلوقتى اى الحاجات اللى لازم تخدى بالك منها و اللى لو لقتيها لازم ترجعى للدكتور

1- لو لاحظتى ان الطفل مش قادر انه يعمل حمام بول بعد العمليه .
2- او لقيتى ان الطفل سخن
3- او لقيتى ان العضو الذكرى فيه صديد او ريحة وحشة
4- او لو الطفل نزف دم بكميات كبيره

دى الحاجات اللى لازم تقلقى منها و ترجعى للدكتور على طول لو لحظتى حاجة منهم لكن الحاجات اللى متقلقيش ابدا منها لو حصلت للبيبى بعد العمليه لانها طبيعيه

1- ان العضو الذكرى يكون متورم شويه و خصوصا فى اول كام يوم بعد العمليه ، دى حاجة طبيعية و مفيش منها اى قلق ، و الورم ده هيروح بعد 10 او 15 يوم بالكتير بعد العمليه
2- لو لاحظتى ان فى حاجة كده زى القشره لونها ابيض او اصفر ، فدى برضو حاجة متقلاقيش منها خالص لان دى قشره بسبب التأم الجرح مش اكتر
واكيد لازم ختان طفلك يكون مع متخصص في جراحة الاطفال عشان تضمني ان العملية ناجحة بدون اي مضاعفات ممكن تحصله لاقدر الله.