متى يكون الفتق السري خطير عند الرضع

الفتق السري عند الرضع هو إختلاف خلقى بيحصل للأطفال لما جزء من الأمعاء يطلع من خلال منطقة البطن اللي فيها السرة،
وده بيظهر على شكل انتفاخ صغير شبه البالونه حوالين السرة. و الفتق السرى ده منتشر جدا بين الأطفال وحديثي الولادة،
وفي معظم الحالات ملوش خطورة وبيختفي لوحده مع مرور الوقت ( كل ما الطفل عمره يكبر و نموه يكتمل)
لكن في حالات من الفتق السري ممكن تكون خطيرة وتحتاج لعلاج
فخليني أقولك :  

إمتى بيكون الفتق السري خطر على الرضع:

1- لو انتفاخ الفتق مش بيختفي مع الوقت
في معظم الحالات، الفتق السري بيبدأ يختفي لوحده بعد 6 شهور او سنه من عمر الطفل، , لكن لو استمر الفتق وكان بيكبر مع مرور الوقت و مش بيقل ، ده ممكن يكون علامة على حاجة مش طبيعية
لأن فى الوضع الطبيعى الورم او الفتق بيبدأ يقل كل ما الطفل نموه يبدأ يكتمل , لأن كل ما الطفل بيكبر عضلات بطنه بتبدأ تلم و ساعتها المفروض الورم ده يقل بالتدريج

2- لو الفتق السرى عند الطفل بقى مؤلم
لأن فى الوضع الطبيعى , الفتق السرى مش مؤلم للطفل لما بنضغط عليه, لكن فى حالة اننا ضغطنا على الفتق و الطفل حس بألم ساعتها لازم نروح لجراح أطفال فورا علشان يفحص الطفل
3- لو الفتق السرى حصله إختناق
الفتق السرى المفروض لما بنضغط عليه نلاقيه بيدخل لجوه و بيتحرك عادى , لكن لو ضغطنا عليه و لقيناه مش بيتحرك و ثابت فى مكانه , ساعتها بنسبة كبيرة الفتق ده ممكن يكون حصله إختناق , و لازم الطفل يدخل عمليات فى اسرع وقت

4- لو الفتق مليان سوائل أو حصل أى إفرازات شكلها غير طبيعي
زي إننا نلاقى الفتق يبدأ يطلع سوائل ريحتها وحشه أو يحصل تغير في لونه، ده ممكن يكون بيدينا إشارة أن حصل مشكله فى الفتق زي التهاب أو حصلت مضاعفات , خلت السرة تفرز سوائل ريحتها وحشه
5- و اخر حاجه تقولنا ان الفتق السرى خطير , هى لو لقينا الطفل بدأ يرجع بصورة مستمرة , ساعتها لازم نفحص الطفل فى اسرع وقت

وتقدري تعرفي معلومات اكتر عن الفتق السري مع دكتور محمد علام من خلال الفيديو دا  

طيب بعد ما عرفنا امتى الفتق السرى ممكن يكون فيه خطوره على الطفل , إزاي نقدر نعالجه ؟

بنعمله عمليه بسيطه جدا , علشان نشيل فيها الفتق السرى , و علشان تكونوا مطمنين اكتر تعالوا نتكلم اكتر عن تفاصيل العملية :

1. اول حاجه بنعملها اننا بنخدر الطفل ببنج كلى استنشاقى علشان الطفل ميحسش بأى ألم, و اللى بيخدر الطفل بيكون دكتور متخصص فى تخدير الأطفال
2. و بعد كده بنفتح فتح صغير جدا فى الجلد حوالين السره , علشان نشوف الفتق و نحدد حجمه
3. و بعد ما بنحدد مكان الفتق السرى بنرجع الأمعاء أو الأنسجة لمكانها في تجويف البطن لو كانت خرجت بره، وبعد كده بنقفل الفتحة اللي خرج منها الأنسجة ( زى مكان فتحه الحبل السرى كده )
4. اخر حاجه بنبدأ نقفل الجرح بخيوط تجميليه علشان متبانش بعد كده

و فى النهايه خلينا نقول ان الفتق السري مش حاجة لازم تخافي منها في معظم الحالات،
لأن فى أغلب الأطفال الفتق السرى بيروح من غير ما يحصل لهم أي مضاعفات. لكن لو لاحظتي أي أعراض غير طبيعية أو لو الفتق استمر لفترة طويلة، يبقى لازم تفحصى الطفل عند جراح أطفال متخصص عشان نطمن على صحة الطفل ونقررله العلاج المناسب.
ولو عندكم اي استفسارات عن طرق علاج الفتق السري والاختلافات الخلقية عند الاطفال تقدروا تتواصلوا معانا من خلال الواتساب 01022814973