الخصية المعلقة عند الأطفال بالصور

الخصية المعلقة عند الأطفال من الإختلافات الخلقيه اللى بتيجى لكتير  للذكور وكتير من الأمهات بتتلغبط فى شكلها و بتكون مش فاهمه امتى الخصيه شكلها بيكون طبيعى , و امتى تكون معلقه
ف تعالوا نعرف الخصيه المعلقه عند الأطفال بالصور
بس قبل مانعرف عن الخصيه المعلقه، تعالوا نعرف الخصيه الطبيعيه دى شكلها ايه :

اول شكل عندنا , ده شكله الخصيتين الطبيعيتين اللى المفروض الطفل يكون مولود بيهم جوه كيس الصفن 

و الخصيه دى بتكون عباره عن: عضو شكله بيضاوى دوره انه ينتج و يخزن الحيوانات المنويه
و مسئول انه ينتج هرمون التستوستيرون فى الذكور ...و بيكون محفوظ جوه كيس من الجلد اسمه كيس الصفن
بيعمل ايه كيس الصفن ده؟
بيحافظ على درجه حراره الخصيه انها تكون اقل من درجه حراره الجسم الطبيعيه بدرجتين ( درجه حراره الجسم 37 و درجه حراره الخصيه بتكون 35)..ليه؟
علشان الحيوانات المنويه بتحتاج درجه حراره بارده علشان تنتج الحيوانات المنويه بشكل طبيعى علشان كده كيس الصفن بيكيف نفسه حسب درجه حراره الجسم علشان الخصيه تقدر تنتج الحيوانات المنويه بشكل طبيعى
و بعد ماعرفنا ايه الخصيه الطبيعيه تعالوا نعرف : 

ماهى ​الخصية المعلقة عند الأطفال ؟

الخصيه المعلقه دى : معناها ان خصيه واحده من الخصيتين و فى بعض الحالات الخصيتين بيكونوا مش موجودين فى مكانهم الطبيعى اللى هو كيس الصفن ( زى اللى موجوده فى الصوره اللى فوق)
و تعالوا نعرف أكتر عن الخصيه المعلقه فى الفيديو ده :

و بعد ماعرفنا ماهى الخصيه المعلقه عند الأطفال ، تعالوا نعرف 

ماهى اسباب ​الخصية المعلقة؟

علشان نجاوب على السؤال ده , تعالوا نشوف الصوره الجايه مع بعض علشان نفهم اكتر

الخصيتين فى الأطفال الذكور بيتكونوا فى البطن ورا الكليه و هو لسه جنين , و فى الشهر السابع بيبدأوا ينزلوا من البطن لكيس الصفن عن طريق ممر او انبوبه اسمها القناه الإربيه
و ساعتها بيكون عندنا 3 إحتماللات لمكان الخصيه: 

1. اول احتمال ان الخصيه تكون متكونتش اصلا، و ساعتها الطفل هيكون مولود بخصيه واحده بس ,و دى بنقدر نعرفها لما الدكتور يعمل استكشاف عن طريق المنظار الجراحى
2. تانى احتمال و هو ان الخصيه تكون لسه موجوده فى البطن , و دى برضوا بنعرفها عن طريق المنظار الجراحى, و دى بنسميها خصيه معلقه غير محسوسه( الخصيه اللى عليها دايره لونها أحمر) , يعنى الدكتور ميقدرش يحس وجود الخصيه بالفحص الإكلنيكى ،
3. تالت احتمال , و هو ان الخصيه تكون اتعطلت فى القناه الإربيه و هى بتنزل لكيس الصفن, و دى الدكتور بيقدر يعرفها بالفحص الاإكلنيكى للطفل , و دى بنسميها الخصيه المعلقه المحسوسه ( اللى عليها دايره باللون الأسود)

طيب هو فى سبب معين بيخلى الطفل يحصله خصيه معلقه؟

فى الحقيقه مفيش سبب طبى نقدر نقول ان لو السبب ده موجود الطفل هيكون عنده خصية معلقة, لكن لقوا ان فى عوامل لو اتوفر حاجه منها , ممكن تسبب للطفل خصيه معلقه زى , 

• لو الطفل اتولد قبل ميعاده
• لو الطفل اتولد وزنه قليل ( اقل من كيلو ونص )
• لو الأم اتعرضت لمبيدات حشريه او مواد كيميائيه اثناء الحمل
• اذا كانت الأم بتعانى من السمنه او السكر

و تعالوا نسمع أكتر عن اسباب اختفاء الخصيه المعلقه فى الفيديو ده :  

و بعد ماعرفنا ايه هى أسباب الخصيه المعلقه ، تعالوا نعرف 

أنواع ​الخصية المعلقة عند الأطفال :

1- الخصيه النطاطه : و ده عباره عن اننا ساعات بنحس وجود الخصيه فى كيس الصفن و ساعات تانيه مبنحسش وجودها و ده بسبب ان عضله الفخد عند الطفل بتبقى قويه شويه فالطفل لو بردان او خايف الخصيه بتطلع فوق و لما يهدا الخصيه تثبت تحت
2- الخصيه المعلقه الغير محسوسه: و دى من اسمها عباره عن انها خصيه الدكتور مش بيحس وجودها اثناء الفحص و ممكن تكون موجوده فى مكان من الاتنين :
· إما تكون الخصيه لسه جوه تجويف البطن
· او تكون الخصيه متكونتش أصلا

3- الخصيه المعلقه المحسوسه : و دى من اسمها نقدر نعرف ان دى الخصيه اللى الدكتور بيقدر يحس وجودها اثناء الفحص الإكلنيكى للطفل ، و غالبا الخصيه دى بتكون موجوده فى القناه الإربيه

و تعالوا نعرف اكتر عن انواع الخصيه المعلقه فى الفيديو ده :  

• و دلوقتى تعالوا نتكلم عن :  
  

أعراض الخصيه المعلقه عند الأطفال: 

· اول طريقه نكتشفها بيها الخصيه المعلقه عند الأطفال, هى الفحص الإكلنيكى للطفل اللى الدكتور بيعمله اول م الطفل يتولد
· تانى طريقه و هى ملاحظه الأم نفسها ان كيس الصفن عند طفلها فاضى, او كيس شكله مختلف عن التانى
· اخر طريقه اننا نعمل سونار اسمه سونار رباعى الأبعاد ( 4d) و ده بيكون عباره عن سونار بنعمله للجنين و هو فى بطن الأم علشان يكشفلنا لو فى اى اختلافات خلقيه عند الطفل

طيب بعد ماعرفنا ايه هى أعراض الخصيه المعلقه عند الأطفال ، تعالوا نعرف 

كيف يتم تشخيص الخصية المعلقة ؟ 

• اول حاجه عن طريق الفحص اللى الدكتور بيفحصه للطفل اول ما يتولد
• تانى حاجه عن طريق المنظار الجراحى لو كانت الخصيه المعلقه غير محسوسه

و دلوقتى تعالوا نعرف مع بعض ايه هى : 

خيارات علاج الخصية المعلقة :

- اول حاجه احنا بنستنى على الطفل 6 شهور ، علشان بنحط إحتمال ان الخصيه ممكن تنزل بشكل طبيعى خلال ال 6 شهور
- لو الخصيه منزلتش ساعتها بيكون عندنا طريقتين للعلاج :
1- لو الخصيه كانت غير محسوسه : ساعتها بنحتاج نعمل للطفل منظار جراحى علشان نتأكد الخصيه موجوده ولا لا
* لو كانت موجوده ساعتها بنعملها عمليه إطاله للخصيه و نثبتها فى كيس الصفن
لو كانت الخصيه مش موجوده ساعتها مش هنعمل للطفل اى حاجه
2- لو الخصيه كانت محسوسه :
بنعمل عمليه إطاله و بعد كده بنثبت الخصيه فى كيس الصفن
طيب ايه المضاعفات اللى ممكن تحصل لو معالجناش الخصيه المعلقه ؟

مضاعفات الخصيه المعلقه إذا لم تعالج :
زى ماقولنا ان الخصيه لازم تكون موجوده فى كيس الصفن علشان تقدر تقوم بوظيفيتها ، فلو معالجناش الخصيه المعلقه و فضلت بره كيس الصفن ساعتها ده ممكن يأثر على :
- انتاج هرمون التستوستيرون المسئول عن ظهور الصفات الذكوريه زى ( اللحيه- الشارب – نمو حجم القضيب ) لأن الخصيه بتنتج حوالى 95% من الهرمون ده
- و ممكن يأثر على القدره الإنجابيه للطفل لما يكبر بسبب ، ان الخصيه مش هتقدر تنتج الحيوانات المنويه المسئوله عن تخصيب البويضه فى عنق الرحم ، لأنها مش موجوده فى كيس الصفن

و اخر حاجه من المضاعفات ان الخصيه لو مش موجوده فى مكانها الطبيعى ده لاقدر الله ممكن يقلب ورم يأثر على حياه طفلنا


و فى الفيديو ده تعالوا نعرف ليه لازم الخصيه تكون موجوده فى كيس الصفن :  

و بعد ماعرفنا ايه المضاعفات ، تعالوا نعرف 

متى يجب استشاره دكتور جراحة الأطفال؟

لازم نستشير دكتور جراحة الأطفال اول مانلاحظ اى علامه غريبه فى جسم أطفالنا
علشان نقرر ايه أنسب اجراء طبى ناخده مع الطفل
لأن اول خطوه فى طريق العلاج هى التشخيص السليم
دلوقتي تقدري تحجزي كشف علشان تفحصي طفلك مع الدكتور محمد علام استشاري جراحات الأطفال وحديثي الولادة، تقدرى 
تتواصلي معانا بكل سهولة عبر الواتساب أو من خلال ملئ فورم التواصل على الموقع.
ربنا يحمى و يحفظ كل أطفالكوا