ايه هى القناه الإربيه فى الأطفال؟

كتير مننا بيسمع عن الإختلافات الخلقيه اللى بتيجى للأطفال فى القناه الإربيه او فى المنطقه الإربيه ، بس للأسف برضوا كتير مننا ميعرفش ايه هى أصلا القناه الإربيه ، و ايه هى الإختلافات الخلقيه اللى ممكن تحصل فيها

و خلونا نبدأ ب يعنى ​​ايه هى القناه الإربيه فى الأطفال؟

القناة الأربية دى عباره عن فتحة صغيرة موجودة في جدار البطن، ودي بتكون موجودة عند الأطفال من اول م يتولدوا. و القناة دي بتكون في منطقة اسمها المنطقه الأربية، اللي بتكون أعلى الفخد و اسفل البطن عند الجانبين. عند الأطفال، و القناة الأربية دى ليها وظيفة مهمة أثناء نمو الجنين، خصوصًا في المراحل الأولى من الحمل.

طيب ايه هى وظيفه القناه الأربيه؟
خلينا نقول ان وظيفه القناه الأربيه فى الأولاد بتختلف عن وظيفه القناه الإربيه فى البنات :

• في الأولاد: القناة الأربية بتسمح بمرور الأوعية الدموية اللى بتغذى الخصية خلال مراحل تطورها في الجنين. لأن في البداية، الخصيتين بيتكونوا في البطن، ومع نمو الجنين، و بالتحديد فى الشهر السابع كده الخصيتين بيبدأوا ينزلوا من البطن لكيس الصفن عن طريق القناه الإربيه
• في البنات: القناة الأربيه فى البنات دورها مختلف عن القناه الأربيه فى الولاد ، لأن فى البنات بينزل منها حاجه اسمها رباط الرحم المستدير و ده وظيفته انه يربط الرحم بالشفرات الخارجيه للمهبل

و القناه الأربيه فى الولاد او البنات بتتكون من 3 حاجات :

• مدخل القناه الأربيه
• القناه الأربيه نفسها ، و قولنا ده بيكون ممر شبه الأنبوبه كده
• مخرج القناه الأربيه

بعد م عرفنا ​ايه هى القناه الإربيه فى الأطفال؟ ، تعالوا نعرف ايه هى الإختلافلات الخلقيه اللى ممكن تحصل بسبب القناه الأربيه :

الفتق الإربى : و ده بيحصل لو مدخل القناه الإربيه فضل مفتوح أكتر من 4 مم بعد م الخصيه نزلت من البطن لكيس الصفن
و الفتق الأربى ده بيكون عباره عن ان جزء من الأمعاء بتنزل فى القناه الإربيه ، و بيظهر على شكل ورم او كولكيعه مكان لازقه البامبرز كده ، و الفتق الإربى ده بنعتبره من أخطر الإختلافات الخلقيه اللى لازم نعالجها فورا أول م نكتشفها

القيله المائيه ، و دى بتحصل لما فتحه مدخل القناه الإربيه بيكون أقل من 4 مم ، و القيله المائيه بتظهر على شكل ورم او انتفاخ برضوا فى المنطقه الإربيه ، بس القيله المائيه مش بتكون خطيره على الطفل زى الفتق الإربى و ممكن نستنى على علاجها لحد سنتين من عمر الطفل
و لو عايزين تعرفوا أكتر عن الفرق بين الفتق الإربى و القيله المائيه ، اسمعوا الفيديو ده : 

الخصيه المعلقه المحسوسه : و دى بتكون عباره عن ان خصيه الطفل اثناء نزولها من البطن لكيس الصفن ، نزولها اتعطل و الخصيه فضلت متعلقه فى القناه الإربيه
و فى الحاله دى بنحتاج نعمل للطفل عمليه بسيطه بعد م يكمل 6 شهور علشان ننزل الخصيه لكيس الصفن
و طبعا كتير من الأهالى هتسأل اشمعنا 6 شهور؟
لأننا بنحط إحتمال ان الخصيه ممكن تنزل لوحدها بشكل طبيعى من غير عمليه خلال ال 6 شهور دول
و لو عايزين تعرفوا معلومات أكتر عن أنسب ميعاد لعمليه الخصيه المعلقه ، تعالوا نسمع الفيديو ده : 

و دايما بنقول ان تشخيص المرض هو اول خطوه فى طريق العلاج ربنا يحمى و يحفظ كل أطفالنا