ينفع نطاهر الطفل يوم الولاده؟

كل أم ربنا بيرزقها بمولود ولد جديد ، اكتر حاجه بتكون شايله همها هي طهارة الطفل ، و ياترى هل ينفع نطاهر الطفل يوم الولاده ؟ وهيتوجع بعدها ولا لا
و هى هتقدر تاخد بالها منه بعد الطهارة ولا لا؟
علشان كده فى نسبه من الأمهات بتقرر انها تطاهر طفلها فى نفس يوم الولادة علشان تسهل على نفسها بدل ماتروح من المستشفى و ترجع تانى علشان تطاهره
بس خلينى أقولك انك كده ممكن تكونى بتضرى طفلك من غير ما تقصدى ،
و قبل م نقول ليه ممكن نكون بنضر الطفل ، تعالوا نفتكر مع بعض بسرعه  

الطهاره دى عباره عن ايه :

الطهاره دى عباره عن إننا بنشيل حته الجلد اللى بتكون مغطيه رأس العضو الذكرى للطفل

طيب ليه بنقول بقى اننا لو طاهرنا الطفل يوم الولاده كده إحنا ممكن نكون بنضره؟
لأن ببساطة اللى لازم يطاهر الطفل هو جراح أطفال متخصص ، ليه؟
لأنه لازم يفحص الطفل قبل الطهاره ، لأن الطفل ممكن يكون عند إختلاف خلقى يأجل الطهاره ، و الإختلافات الخلقيه دى ممكن تكون :

1- إحليل سفلى : و ده بيكون عباره عن إختلاف خلقى الطفل بيتولد بيه ، و بتكون فيه فتحه مجرى البول موجود فى مكان غير مكانها الطبيعى ، اللى هو مقدمه رأس العضو الذكرى للطفل
طيب ليه بنقول إن الإحليل السفلى ده ممكن يأجل طهاره الطفل ؟
ببساطه لأننا علشان نعالج الإحليل السفلى ده ، بنحتاج نستخدم جلده الطهاره علشان نصلح بيها فتحه مجرة البول ، فلو كنا طاهرنا الطفل قبل ما جراح أطفال متخصص يفحصه ، ساعتها كنا هنسبب للطفل مشكله كبيره ، لأن جلده الطهاره اللى بنستخدمها فى علاج الإحليل هتكون اتقصت
علشان كده بنقول لو طاهرنا الطفل قبل م جراح أطفال متخصص يفحص الطفل ، ده ممكن يسببله مشاكل كتير

2- العضو المدفون : و ده بيكون عباره عن إن العضو الذكرى بتاع الطفل بيكون مش باين كله بحجمه الطبيعى ،
و العضو المدفون ممكن يحصل فى الأطفال لكذا سبب :
– ان يكون حصل مشكله فى العضو الذكرى وقت تكوين الجنين فى رحم الأم
او ان الطفل يكون عنده دهون كتير فى منطقه العانه
و فى الحاله دى إحنا بنستنى على طهاره الطفل حوالى 6 شهور لأن ساعتها بيكون عندنا إحتمال من اتنين :
اول إحتمال ان العضو الذكرى للطفل يظهر بشكل طبيعى بعد ال 6 شهور دول ، و فى الحاله دى نقدر نطاهر الطفل بصوره طبيعيه جدا
الإحتمال التانى اننا نحتاج نعمل للطفل عمليه بسيطه علشان نظهر شكل العضو الذكرى و ممكن نعمل الطهاره فى نفس العمليه

3- الفتق الإربى : و ده بيكون عباره عن ان جزء من الأمعاء نزل فى القناه الإربيه ، و فى الحاله دى لازم اول م الطفل يتشخص فتق إربى يدخل العمليات فورا ، لأن الفتق الإربى ممكن يحصله حاجه اسمها إختناق
و الإختناق ده بيكون عباره عن ان الجزء اللى نزل من الأمعاء جوه القناه الإربيه اتحشر و مش قادر يرجع تانى للبطن
و فى الحاله دى الأولى ان الطفل يدخل يعمل عمليه الفتق الإربى ، و ممكن نعمله عمليه الطهاره فى نفس العمليه

4- و لو كان فى التصاق مابين جلد العضو الذكرى و جلد كيس الصفن ، فى الحاله دى بنستنى على الطفل من 3 ل 6 شهور علشان بنحط إحتمال ان الإلتصاق ده ممكن يتفك لوحده
لكن لو متفكش ، ساعتها بنعمل عمليه بسيطه نفك بيها الإلتصاق ده و نطاهر الطفل فى نفس العمليه

و تعالوا نسمع أكتر مع بعض عن الإختلافات الخلقيه اللى ممكن تأجل الطهاره مع دكتور محمد علام :  

و بعد ما قولنا ايه هى الإختلافات الخلقيه اللى ممكن تأجل طهاره الطفل

تعالوا نعرف ايه تانى سبب يخلينا منطاهرش الطفل فى المستشفى يوم الولاده لو المستشفى مكانش فيها جراح أطفال متخصص:
لأن جراح الأطفال بيستخدم ادوات أمنه على الطفل علشان يطاهره بيها
زى جهاز الجومكو : لأن الجهاز ده بيكون عباره عن قطعتين : 

• قطعه شبه القمع كده علشان تحمى رأس العضو الذكرى من أى إصابه و بتكون مقاسات مختلفه علشان تناسب حجم العضو الذكرى لكل طفل
• و تانى قطعه بنستخدمها علشان نثبت بيها العضو الذكرى و نقص الجلد بمقاسات مظبوطه

و طبعا مننساش ان دكتور جراحه الاطفال بيدى للطفل بنج موضعى بطريقه معينه متخليش الطفل يحس بالألم اثناء الطهاره

و فى النهايه خلينا نقول ان لو المستشفى اللى هتولدى فيها ، هيكون فيها دكتور متخصص فى جراحه الأطفال ، يبقى فى الحاله دى تقدرى تطاهرى طفلك يوم الولاده و انتى مطمنه علي صحه طفلك
لأن مفيش أغلى من صحه أطفالنا علشان نحافظ عليها
ربنا يحمى و يحفظ كل أطفالكوا