ليه الخصية المعلقة عند أطفالنا بتحتاج لتدخل جراحى؟

الخصيه المعلقه من الإختلافات الخلقيه اللى بيتولد بيها نسبه كبيره من الأطفال الذكور، و الخصيه المعلقه دى علشان نعالجها بنحتاج نعملها عمليه بسيطه مش بتاخد اكتر من نص ساعه او ساعه إلا ربع بالكتير
بس قبل ما نقول ليه لازم نعالج الخصيه المعلقه بعمليه
تعالوا نفتكر بسرعه الخصيه المعلقه دى كانت عباره عن ايه :

الخصيه المعلقه دى عباره عن إن واحده من الخصيتين ، او الخصيتين الأتنين مش موجودين جوه كيس الصفن
و فى الحاله دى بيكون عندنا كذا إحتمال الخصيه ممكن تكون موجوده فيهم :  

• اول إحتمال ان الخصيه تكون متكونتش أصلا
• تانى إحتمال ان الخصيه تكون اتعلقت فى القناه الإربيه أثناء نزولها من تجويف البطن لكيس الصفن، و دى بنسميها خصيه معلقه محسوسه
• تالت إحتمال ان الخصيه تكون لسه موجوده جوه تجويف البطن ، ودى بنسميها خصيه معلقه غير محسوسه

طب بعد ماعرفنا الأماكن اللى ممكن الخصيه تكون موجوده فيها

هنعالج بقى الخصيه المعلقه دى إزاى ؟ 

• –
  أول حاجه بنعملها أول ما الطفل يتشخص ان عنده خصيه معلقه إننا بنستنى لمده 6 شهور و مش بنتدخل جراحيا خالص لحد ال 6 شهور دول ما يخلصوا، لأننا بنحط إحتمال ان الخصيه دى ممكن تنزل بشكل طبيعى خلال ال 6 شهور دول و منحتاجش لأى تدخل جراحى

طيب لو عدى 6 شهور و الخصيه دى منزلتش بشكل طبيعى؟
ساعتها لازم نعمل للطفل عمليه ، بس فى الحاله دى العمليه بتتحدد على حسب نوع الخصيه المعلقه اللى عند الطفل ، يعنى :  

• –
  لو الطفل كان عنده خصيه معلقه محسوسه ، يعنى الدكتور حاسس وجودها فى المنطقه الإربيه ، ساعتها بنعمل عمليه الخصيه المعلقه عن طريق الجراحه
• –
  لكن لو الدكتور جه يفحص الطفل و محسش بوجود الخصيه فى المنطقه الإربيه ساعتها ، لازم يعمل حاجه اسمها منظار استكشافى علشان سببين :

• اول سبب علشان يشوف الخصيه موجوده فى مكانها ولا لا
• و تانى سبب لو كانت الخصيه موجوده فى تجويف البطن ، ساعتها الدكتور بيحدد مكانها فين بالظبط و لو كان الحبل المنوى بتاعها طويل ، ساعتها بنعملها تثبيت فى كيس الصفن فى نفس العمليه لكن لو كان الحبل المنوى بتاع الخصيه قصير ، ساعتها بنعمله عمليه إطاله ، و نستنى عليها 6 شهور و بعد كده بنعمل عمليه تانيه علشان نثبت الخصيه فى كيس الصفن

و دلوقتى بعد ما عرفنا ايه طريقه علاج الخصيه المعلقه ، تعالوا نعرف إحنا ليه لازم نعالج الخصيه المعلقه عند الأطفال؟

1- اول وظيفه للخصيه إنها مسئوله عن إنتاج الحيوانات المنويه
و الحيوانات المنويه دى وظيفتها تخصيب البويضه فى عنق الرحم علشان يحصل حمل

2- تانى وظيفة للخصيه هى إنتاج هرمون التستوستيرون ، او هرمون الذكوره ، و الهرمون ده بيكون مسئول عن :

فى سن الطفوله : هرمون التستوستيرون بيكون مسئول عن نمو الخصيتين
فى مرحله البلوغ : هرمون التستوستيرون بيكون مسئول عن :

• ظهور شعر الوجه و العضلات
• تضخم فى حجم الخصيتين
• خشونه الصوت
• زياده الرغبه الجنسيه

طيب بعد ما عرفنا ايه وظيفه الخصيه، لازم نعرف حاجه مهمه جدا
و هى علشان الخصيه تقدر تقوم بوظيفتها لازم تكون موجوده فى درجه حراره أقل من درجه حراره الجسم
و المكان الوحيد اللى درجه حرارته اقل من درجه حراره الجسم هو كيس الصفن

طيب ايه اللى هيحصل لو الخصيه مكانتش موجوده فى كيس الصفن ؟
ساعتها الخصيه مش هتقدر تقوم بأى وظيفه من الوظايف اللى المفروض تقوم بيها
و ده هيأثر على مستقبل الطفل بصوره كبيره

و تعالوا نعرف اكتر ليه بنقول الخصيه لازم تكون موجوده فى كيس الصفن ، فى الفيديو ده : 

علشان كده بنقول ان لو عدى6 شهور و الخصيه منزلتش ، ساعتها لازم نعمل للطفل العمليه
وربنا يحمى و يحفظ كل أطفالكوا