متى تكون طهاره المولود؟

الطهاره من اول الحاجات اللى بتشغل بال الام اول ما الدكتور يبلغها ان ربنا هيرزقها بولد
فتعالوا نعرف مع بعض ايه هى الطهاره دى اصلا, و ايه انسب وقت نعمل فيه الطهاره

ده عباره عمليه بسيطه بنشيل فيها الجلد الزياده اللى بيكون موجود حوالين رأس العضو الذكرى للطفل 

طيب إحنا ليه بنشيلها طالما الطفل مولود بيها؟

القلفه ( الجلده الزياده ) دى بتكون مهمه , طول م الطفل جنين فى بطن الأم علشان تحمى رأس العضو اللى مليانه اعصاب حسيه فى جسم الطفل من حركه السوائل اللى موجوده فى بطن الأم اثناء حركه الطفل و هو جنين فى بطن الأم
, لكن اول م الطفل يتولد لازم نشيلها , علشان لو فضلت موجوده هتسبب: 

• التهابات فى العضو الذكرى للطفل
• ممكن تسبب التهابات و بكتيريا للطفل
• و علشان نسهل نظافه العضو الذكرى من اى التهاب او بكتيريا
• و كمان للحمايه من الأمراض اللى ممكن تتنقل جنسيا ( زى الإيدز)
• و بتحمى الطفل من خطر الإصابه بسرطان القضيب

طيب ايه احسن وقت نقدر نطاهر فيه الطفل بعد ما يتولد؟

فى الحقيقه إحنا نقدر نطاهر الطفل من و هو عمره يوم طول م الطفل معندوش اى موانع للطهاره زى الإختلافات الخلقيه:

• زى الإحليل السفلى : و ده بيكون عباره عن ان فتحه مجرى البول موجوده فى مكان غير مكانها الطبيعى ( رأس العضو الذكرى)
• او ان الطفل يكون عنده عضو مدفون: و ده معناه ان العضو الذكرى للطفل مختفى مش باين منه غير رأس العضو الذكرى بس
• او ان الطفل يكون عنده فتق إربى , وده بيكون عباره عن ان جزء من الأمعاء بيفضل ينزل و يطلع فى القناه الإربيه , و الفتق الإربى ده لازم عمليته تتعمل فورا لو الطفل اتشخص فتق إربى
• و رابع حاجه ممكن تأجل الطهاره لو الطفل عنده أى امراض فى الدم زى الصفرا التكسيريه
• او لو العضو الذكرى و كيس الصفن فى بينهم إلتصاق

و لو حابين تعرفوا اكتر عن مؤجلات الطهاره تعالوا نشوف الفيديو ده مع بعض :  

طيب بعد م فحصنا الطفل و اطمنا عليه و طلع معندوش اى حاجه ممكن تأجل الطهاره ,

ليه بنقول ان احسن وقت نطاهر فيه الطفل و هو عمره أقل من 3 شهور؟

1- لأن ببساطه إحساس الطفل بالألم و هو عمره صغير بيكون اقل عن لما يكبر شويه ,
2- تانى حاجه , تخدير الطفل اللى عمره أقل من 3 شهور , بيختلف عن تخدير الطفل اللى عمره اكبر من 3 شهور
لو الطفل اقل من 3 شهور: بنخدره تخدير موضعى قبل عمليه الطهاره
لو الطفل عمره اكتر من 3 شهور : بيتخدر ببنج كلى استنشاقى
و فى الحالتين التخدير بيكون على ايد دكتور متخصص فى تخدير الأطفال
3- تالت حاجه , لو الطفل عمره اقل من 3 شهور الطهاره بتكون فى العياده,
4- لو الطفل كان عمره اكتر من 3 شهور , الطهاره بتكون فى المستشفى ، ليه؟؟
لأن الطفل لو عمره كان أكتر من 3 شهور ف تأثير البنج الموضعى عليه هيكون ضعيف
تانى حاجه ان بعد 3 شهور حركه الطفل بتبدأ تكتر ، وده ممكن يخلينا نشيل جلد اكتر او اقل من المطلوب لو طاهرناه فى العياده
تالت حاجه ان الشرايين و الأورده اللى فى العضو الذكرى بدأت تكبر شويه ، فبيكون فى إحتمال و لو بسيط ان الطفل يحصله نزيف، ف لو احنا فى المستشفى هنقدر نسيطر على النزيف بسهوله جدا 

و كده نكون قولنا احسن وقت تقدرى تطاهرى فيه طفلك
دورك بقى انك تختارى جراح اطفال متمرس و يقدر يطاهر طفلك بأداه أمنه
و لو عايزين تعرفوا معلومات اكتر عن أأمن طريقه تقدرى تطاهرى بيها طفلك , تعالوا نسمع الفيديو ده مع بعض :