ختان المولود في المستشفى ولا في العيادة ؟

اول ما ربنا يكرمك ويرزقك بمولود ولد , بتفكري في اول واهم حاجه , هنطاهره امتي و فين وعند مين ؟؟ , وطبعا بتبقى خايفة ومحتارة وقلقانه عليه , بس لازم قبل ما تدوري هتطاهريه عند مين وامتي , لازم تعرفي الأول البيبي هيتطاهر في المستشفي ولا في العيادة عشان دي حاجه مهمه جدا , طب ليه مهمه ؟
عشان أن البيبي هيتطاهر في المستشفي ولا في العيادة مش حاجه اختياريه , دا له شروط معينه ولازم نلتزم بيها , وتعالي نفهم ايه هي الشروط وليه لازم نلتزم بيها ؟
في البداية خلينا عارفين أن البيبي نقدر نطاهره من اول يوم ولادة عادي , بس دا في حالة ان البيبي سليم ,ومعندوش اي مشاكل صحية ولا عنده اي حاجه من موانع الطهارة ولو عنده في الحاله دي هيبقي لازم تأجلي طهارة طفلك .

و لو عايزين تعرفوا معلومات أكتر عن موانع الطهاره ، تعالوا نسمع الفيديو ده مع بعض :  

طب تطاهري البيبي في المستشفي ولا العيادة ؟

• هنطاهره في العيادة لو كان البيبي عمره أقل من 3 شهور , وكمان هنستخدم بنج موضعي في العملية .
• لكن لو البيبي بقي أكبر من 3 شهور , هنا لازم البيبي يتطاهر في المستشفي , طب دا ليه ؟

عشان دلوقتي البيبي بقي كبير شوية , ولازم نستخدم بنج كلي استنشاقي , لأن البنج الموضعي هيكون مفعوله ضعيف , وكدا الطفل هيحس بألم حتي لو بسيط .
وكمان البيبي بقي حركته اكتر فبيكون صعب التحكم فيه وقت العملية , فممكن يتقص جلد زيادة او اقل .
واهم نقطه بقي ان الطفل لما بيكبر , الشعيرات واالاوردة الموجودة في العضو الذكري بتكبر اكتر , ودا بيخلي في فرصه يحصل نزيف , حتي لو بنسبه قليله ,فأحنا لو في مستشفي هيكون سهل نسيطر علي النزيف , لكن لو في العيادة هيكون الموضوع صعب وهنضطر نروح مستشفي , وهيبقي في خطورة علي حياة البيبي .
انا عارف ان ممكن تكلفه ختان البيبي في المستشفي هتكون أكبر من تكلفة الختان في العيادة , بس أحنا مينفعش نكون بنختار في الحاله دي اي الاقل في السعر , لا احنا بنختار الأمان لاطفالنا , وايه اللي مش هيسببله اي مضاعفات تأثر علي البيبي
, فلازم نلتزم بكلام الدكتور لو قال ان البيبي كبير ولازم في المستشفى يبقي لازم نطاهره في المستشفى , عشان نكون مطمنين أكتر وضامنين نجاح العملية بنسبة 100% 

لكن لو في حد قالك اني هطاهره في العيادة لو البيبي عمره كان اكبر من 3 شهور يبقي كدا هو يعرض حياة طفلك للخطر

و خلينا نقول ان مفيش أغلى من صحه أطفالنا علشان نحافظ عليها ، علشان كده دايما بنختار أفضل إختيار لصحه أطفالنا
ربنا يحمى و يحفظ كل أطفالنا