الوقت المناسب لعملية الخصية المعلقة عند الأطفال

قلق كل أم طفلها عنده خصية معلقة بيكون كبير جدا , بتكون خايفه من العملية وخايفه برضوا من تأجيل العملية ومش عارفه اي انسب وقت ممكن تعمل فيه عملية الخصية المعلقة عند طفلها ودا اللي هنعرفه سوا
طبعا زي ما نتي عارفه ان الخصية المعلقة إختلاف خلقي البيبي اتولد بيه , لكن الإختلاف الخلقي دا ممكن في خلال 6 شهور من عمر الطفل يتعالج لوحده طب ازاي ؟
لأن في معظم حالات الخصية المعلقة مش بنعمل اي تدخل جراحي قبل عمر 6 شهور , لان في احتمال كبير أن الخصية تنزل لوحدها في خلال 6 شهور من عمر البيبي بدون ما نبدأ في أي علاج . 

طب لو عدى 6 شهور ولسه برضو الخصية منزلتش ؟

, في الحالة دي لازم نعمل عملية خصية في أسرع وقت , واوعي تفكري للحظه ان الخصيه هتنزل بعد 6 شهور او بعد سنه لوحدها , انتي كدا بتعرضي طفلك لمشاكل كبيرة جدا .
لأن تأجيل عملية الخصية المعلقة مش في صالح طفلك بالعكس دا هيضره أكتر , طب ليه ؟
لأن مكان الخصية الطبيعي هو كيس الصفن , وربنا خلق كيس الصفن بدرجة حرارة أقل من درجة حرارة الجسم يعني ( 35 درجة ) ودا عشان تقوم الخصية بوظيفتها بشكل سليم .
فلو كانت الخصية متعلقة في مكان تاني غير كيس الصفن دا يسبب مضاعفات خطيرة زي :
أنه يحصل ضمور للخصية , وفي الحاله دي الطفل هيخسر خصيته , وفرصته في الإنجاب بقت أقل من فرصته لو الخصيتين موجودين , وكمان ممكن لقدر الله الخصية المعلقة دي تتحول لبؤرة سرطانية .
ف طبعا لازم في خلال 6 شهور من عمر البيبي نعمل عملية الخصية المعلقة , بس نخلي بالنا أن في حالة واحدة لازم نعمل فيها عملية الخصية المعلقة قبل 6 شهور , اي هي الحالة دي بقي ؟
في حاله لو ظهر مع الخصية المعلقة فتق إربي وطبعا الفتق الإربي هو أخطر الاختلافات الخلقية عند الأطفال
, ولازم نعمل عملية الفتق الإربي حتي لو كان البيبي عمره يوم واحد , وبما اننا هنعمل عملية الفتق الإربي , وهي في نفس مكان عملية الخصية المعلقة , فبدل ما ندخل الطفل العملية مرتين , هنعمل العمليتين سوا ودا عشان ننقذ الطفل من خطورة الفتق الإربي الاول وننزل بالمره الخصية لمكانها في كيس الصفن .
و علشان نعرف أكتر عن أنسب ميعاد نعمل فيه عمليه الخصيه المعلقه ، تعالوا نسمع الفيديو ده مع بعض:

و عملية الخصية المعلقة مفيش منها اي خوف او قلق على الطفل , هي عملية بسيطة جدا وضرورية جدا مينفعش نهملها او منعملهاش خالص والعملية نجاحها مضمون جدا طالما كانت مع دكتور متخصص في جراحة الأطفال