تأثير الفتق الإربى على القدره الجنسيه و الإنجابيه عند الأطفال

الفتق الإربى , هو الإختلاف الخلقى الوحيد اللى تأثيره فى القدره الجنسيه و الإنجابيه بيكون على الولاد و البنات , على عكس اغلب الإختلافات الخلقيه اللى بيكون تأثيرها على الأطفال الذكور بس , فتعالوا نعرف مع بعض التأثير ده بيكون ايه
بس قبل م نبدأ كلامنا , تعالوا نفتكر مع بعض , الفتق الإربى ده كان عباره عن ايه؟
بيكون عباره عن ورم بيظهر عند الأطفال فى المنطقه الإربيه (اللي مكانها بيكون أعلى الفخد و اسفل البطن )
و الفتق الإربى ممكن يظهر على ناحيتين او ناحيه واحده 

طيب هو الفتق الإربى ده ليه بيحصل للأطفال؟

فى الاطفال الذكور الخصيه بتتنقل من مكانها ورا الكليه فى البطن فى اخر شهر فتره فى الحمل ( الشهر السابع ) عن طريق ممر او قناه اسمها القناه الإربيه...بتعمل ايه القناه الإربيه دى؟
وظيفتها انها تنقل الخصيه من تجويف البطن لكيس الصفن فى اخر شهر فى الحمل زى م قولنا ...و بعد كده القناه دى المفروض تتقفل ...لكن لو مقفلتش و فضلت مفتوحه و الفتحه دى كانت اكتر من 4 مم بيحصل عندنا الفتق الإربى.. 

فى الأطفال البنات بقى :

برضوا بتكون القناه الإربيه مفتوحه ... و ايوه البنات برضوا عندها قناه إربيه, بس اكيد وظيفتها فى البنات مختلفه عن وظيفتها فى الولاد ...
دورها فى البنات انها توصل المبيض بالشفرات الخارجيه للمهبل عن طريق حاجه اسمها الرابط المستدير...
لو فتحه القناه الإربيه فى البنات أكبر من 4 مم هتاخد المبيض و قناه فالوب و تشدهم لتحت, و ممكن تاخد جزء من الرحم كمان

و تعالوا نسمع اكتر عن أعراض و أسباب الفتق الإربى فى الفيديو ده : 

دلوقتى بعد م عرفنا الفتق الإربى بيحصل إزاى , محتاجين نعرف احنا بنعالج الفتق الإربى إزاى؟؟

العلاج الوحيد للفتق الإربى بيكون عمليه جراحيه , و العمليه الجراحيه دى مينفغش نستنى عليها , و لازم نعمل العمليه اول ما الطفل يتشخص ان عنده فتق إربى , و قبل ما الفتق ده يحصله اختناق
و الإختناق ده بيكون عباره عن إن جزء من الأمعاء اتحشرت جوه القناه الإربيه , علشان كده بنقول اننا لازم نعمل العمليه في أسرع وقت , لأن الإختناق ده ممكن يأثر على حياة الطفل, و مش بس كده ده ممكن يأثر على القدرة الإنجابية للطفل لما يكبر 

• فى الأطفال الذكور : الفتق الإربى لما بيحصله إختناق بيضغط على الوعاء الناقل اللى بيغذى الخصية , و بالتالى ده هيخلى مفيش دم يوصل للخصية , فيحصلها ضمور

و لما الخصيه بيحصلها ضمور مبتقدرش تقوم بدورها, اللى هو انتاج و تخزين الحيوانات المنويه
و ساعتها فرصه الطفل ده فى الإنجاب لما يكبر هتكون قليله ( فى حاله ان الخصيه التانيه سليمه) 

• فى الأطفال الإناث : بنسبه كبيره بنلاقى ان اللى نزل فى القناه الإربيه , هو المبيض , و لو الفتق كبير شويه ممكن نلاقى المبيض و معاه أنبوبه فالوب, وساعات جزء من الرحم

فى حاله الإختناق المبيض مش بيكون واصله دم , و بنلاقى انه بدأ يكون اسود , و ساعتها ممكن نضطر بنسبه كبير اننا نشيل المبيض , و فى الحاله دى نسبه ان الطفله دى فى انها تقدر تخلف لما تكبر هتكون قليله ( فى حاله ان المبيض التانى سليم)
لأن المبيض هو المسئول عن تكوين البويضات , اللى بيخصبها الحيوان المنوى فى عنق الرحم , و يتكون جنين
علشان كده دايما بنقول ان الفتق الإربى من الإختلافات الخلقيه اللى مينفعش نستنى على علاجها
لأن بيكون فيه خطوره على البيبى
و علشان نعرف أكتر عن عمليه الفتق الإربى ، تعالوا نسمع الفيديو ده مع بعض:

و خلينا نقول ان عمليه الفتق الإربى عمليه مدتها بسيطه ، لكن هتحمى الطفل من مشاكل كتير ممكن تحصله لما يكبر
فبلاش نأجل قرار العمليه ، لان مفيش فى الدنيا أغلى من صحه أطفالنا
ربنا يحمى و يحفظ كل أطفالكوا