امتى نعالج الاختلافات الخلقية اللى عند البيبى ؟

فى البداية لازم نكون عارفين ان الاختلافات الخلقية اللى ممكن تحصل للبيبى مش حاجة تقلق ، و انها مش هتأثر على البيبى ولا تسببله اى ضرر لو عالجناها صح و فى الوقت المناسب ، عشان كده تعالوا نعرف اى هى اشهر الاختلافات الخلقيه اللى ممكن تحصل للأطفال و امتى المفروض نعالجها :

•  لو اكتشفنا ان البيبى عنده فتق اربى ، لازم هنا اننا ناخد قرار العمليه بسرعه جدا لان الفتق الاربى ده ممكن يحصله اختناق فى اى وقت و يسبب ضرر كبير جدا للطفل ممكن يوصل للتسمم الدموي
• أما لو البيبى كان عنده خصية معلقة ، فهنا احنا بنستنى على الطفل لحد ما يوصل لسن 6 شهور ، لان فى حالات كتير الخصية عندهم بتنزل لوحدها لكيس الصفن و الطفل مش بيكون محتاج لعمليه ، اما لو الطفل بقى اكبر من 6 شهور و الخصية مانزلتش ، وقتها لازم نعمل للطفل عملية ننزل بيها الخصية ، و مينفعش اننا نتأخر في قرار العمليه لان الخصية ممكن يحصلها ضمور ، ده طبعا هيأثر على خصوبة الطفل لما يكبر ، و هيقلل فرصته فى الانجاب
  
• أما لو البيبى كان عنده احليل سفلي ، فأنسب وقت نعمل فيه عملية الاحليل السفلي للطفل لما يكون عمره 6 او 8 شهور .
  
• و لو لقينا ان البيبى عنده قيلة مائية ، فالماية اللى على الخصية دى فى حالات كتير بتختفى لوحدها و مش بتحتاج لعملية ، لكن لو فضلت موجوده عند الطفل لحد ما يوصل سنه سنه ونص او لقيناها بتزيد ، وقتها بنعمل عمليه بسيطة عشان نشيل بيها القيلة المائية
  
• اما لو البيبى كان عنده فتق سري ، فده كمان بنستنى عليه لحد ما الطفل يوصل لسن 3 سنين ، لان الفتق السري غالبا بيقل لوحده ، لكن لو وصل الطفل لسن 3 سنين و الفتق السرى مقفلش وقتها بنعمل للطفل عملية بسيطة عشان نقفل فيها الفتق